Aldobrandino da Siena, Régime du corps, metà XIII sec.
Le régime du corps de maître Aldebrandin de Sienne. Texte français du XIII^{e} siècle, publié pour la première fois d’après les manuscrits de la Bibliothèque Nationale et de la Bibliothèque de l’Arsenal par Louis Landouzy et Roger Pépin, Paris, Champion, 1911.
Edizione digitalizzata a cura di Serena Modena
Marcatura digitale a cura di Luigi Tessarolo
Permalink:
DE GARDER CASCUN MENBRE PAR LUI
I. COMMENT ON DOIT LES CHAVEUS GARDER
[1] Or, commençons dont premierement des ca||viaus, et jasoit ce ke li cavel ne soient menbre à parler soutilment, mais soient por le cors enbielir, si vous aprenderons comment on doit garder les caviaus k'i<l> ne chient et comment vous leur porrés douner bele coleur.
[2] Sachiés tot vraiement ke li cavel sont engenré d'une matere fumeuse caude et seche que li nature cache fors jusques au cuir de le char, et ist par les petruis du cors, et <de> si faite matere wischeuse engenrent le poil et li cavel. [3] Et por ce ke puisqu'il engenre, par maintes ochisons puent chaïr, si com par le defaute de le matere fumeuse ke nous vous avons dit dont il s'engenrent et nourrissent, ou que c'est par le piertruis dont il vienent de estre trop ouvert ou trop clos, car quant il sont trop ouvert, li fumee en va trop hors, et quant il sont trop clos, li fumee n'en puet issir.
[4] Et ne mie tant seulement por ceste ochison puent li cavel caïr, || mais por le matere venimeuse ki mengue et desront les materes de chaviaus, si com par maladies ke phisique apele allopitia, tyriasis, ophiasis et autres assés.
[5] De prendre garde que li cavel ne cient par tels ocuisons n'est mie notre ententions. [6] Mais des autres .iij. ochisons, si com par defaute de matere et por le malvaistié des piertruis, vous dirons comment li defaute de le matere avient, si com par avoir petit à mengier, et sufrir grant faim, et par trop villier, et par avoir longes maladies.
[7] A chiaus cui li cavel kient par tels ochisons, si lor estuet mengier boines viandes caudes et moistes ki se cuisent legierement et bien norrissent, et eles ne soient salees, ne fors; ne qu'il ne boivent vin viès fort, mais qu'il soi[en]t entre viès et nouvel; si se doit on garder de gesir à femme, et se doit on baingnier en bains qui ne soient mie || trop caut, et laver d'ewe tieve, et se gart de savon metre; et en tel maniere puet garder ses caviaus cil à cui il kient par defaute de norrissement.
[8] Se c'est par le pertruis de le char qui soient trop ouvert, la quex cose avient maintes fois par trop travellier ou avient par trop caut ki puet avenir de le nature du cors meisme, ou par l'air, ou par autres coses c'on porte deseur le tieste, vous en porrés apercevoir k'il cherront à pla[i]nté: si se doit on garder de mengier caudes coses et seches, si com senevé, porions, oignons, aus, et totes autres coses de tel nature, et doit user coses froides et moistes, si com laitues airaces, melons, cohourdes, poissons, char de porc freke, piès de buef ou de mouton; et pains de soile est moult boins à mengier à l'ewe froide, mais qu'il ne soit viès.
[9] Et se doit on faire laver le tieste en ewe degoutant qui vient par tuiaus, et se doit on faire oindre le tieste d'oile rose et d'oile || <de> mirte, et faire ces esperimens ki gardent les caveus de caiir, et font les autres venir et naistre, si com de prendre ladanum et faire fondre en vin, et meller à oile mertin ou à oile de mastich, et oindre le tieste devant, et laver le apriès.
[10] Et se c'est en yver, si convient metre .i. pau de pinkenart por le tieste escaufer; et encore fleurs de pa<v>ot broiies en oile d'olive retient les caviaus de chaïr à chiaus qui s'en font oindre; et encore .i. herbe ke li phisique apele columbaria, qui le prent à tote le racine, et le met sechier, et en fait poure, et le melle à oile de mirte, et le face cuire en lessive, et en face laver le tieste et oindre, retient les caveus de caïr.
[11] Et encore, qui prent capilli veneris et fuelle de myrte, et le fait cuire en lessive, et leve se tieste si vaut moult; et encore prendre le racine d'une herbe qui croist en estans et en rivieres et a larges fuelles et rondes et || porte .i. gaune fleur, et le fait cauper en roieles et cuire en lessive, et en fait laver le tieste, retient les cavials, et croist, et enbelist.
[12] Et se c'est cose que li cavel cient et qu'il ne puissent revenir por les pertruis qui sont estroit, de che vous poés apercevoir k'il ne cairont mie à plenté, et li cuirs de le tieste commencera à luire: si convient que on use viandes [caudes] qui soient contraires à celes que nous avons dites caudes et seches, et se face froter se tieste, apriès l'oingne on de se<ne>vé, ou d'eufourbe, ou de casia qui plus forment weut ouvrer, et oindre apriès d'oile de camomille ou d'oile d'amandes ameres, et tot che vaut miex, mais ke li tieste soit rese avant et sovent.
[13] Et uns des esperimens certains et esprovés por retenir les caviaus et por faire naistre tout là où il n'en a nul, si est de prendre eis ki font miel, et faire ardoir sour .i. tiule caude, et apriès faire poure et mesler || avoec oile d'olive, et puis oindre le tieste, et se gart que il ne touche mie au visage, por chou qu'il feroit venir poil tot plain.
[14] Se vous volés les caviaus faire biaus et gaunes, si prendés fleurs de genieste et fleurs d'ongle cabeline, et les faites cuire en lessive, et le coulés, et en faites vo tieste laver; et encore prendés orpiument et faites pourre, et mellés à oile d'olive, et oigniés les caviaus: che fait les caviaus crespés et espès; et encore, safrans, alcanne cuit en lessive fait les caviaus rouges.
[15] Encore, por faire biaus caviaus et coulourés, faites lessive couler en cendre de sarment et laissier demorer .i. jor, et apriès prendés ferine de lupins .x. drames, et myrre clere et bausme .v. drames, et fleurs de saus et lie de vin seche, de chascun .iij. drames, et en faites poure et le destemprés à cele lessive que dite vous avons, et le soir, quant vous irés couchier, oigniés || les caviaus, et au matin soiiés lavés de lessive, et faites ces coses tant que mestiers sera, car li cavel en devienent tot rouge. [16] Se vous le<s> volés faire noirs, prendés achacie et escorce de nois vers, et les destemprés en vin aigre, et oigniés le teste. [17] Encore, lais d'anesse norrist les cheviaus; encore, alcanne <et> gales destemprés en oile d'olive en nourrist les chaviau.
[18] Si vous les volés blanchir, prendés fiens d'aronde et semence de ravene et .i. pau de soufre, et en faites poure, et le destemprés en vin aigre et à amer de vache, et oigniés le tieste, mais qu'il soient enfumé devant de fumee de soufre.
[19] Et se seuron avienent, prendés semence de lin .iij. onches, et les faites boulir en lessive qui soit faite de .viij. jors, et en lavés le tieste. [20] Encore, lavés d'ewe où il ait eu orge .i. nuit, si oste suerons; et oindre d'oile violat et rosat, et laver apriès de lessive ke nous vous avons dit oste moult les suerons. [21] Mais pour plus droitement ouvrer, ke l'umeurs se||che et caude soit purgie dont cele maladie puet venir.
[22] Puisque nous vous avons aprins à faire venir les caviaus, si vous aprenderons comment vous les porrés oster du poinil et des autres lius où il sont: prendés .iiij. parties de boinne chauc vive et .ij. parties d'orpiument, et les broiés soutiument, et metés <ewe> desus tant qu'ele soit mellee ensamble, et laissiés demourer [ensamble] .ij. jors, et alés estuver, et vous faites bien estuver et oigniés là où li poil seront, et il cheront maintenant.
[23] Et se vous le volés faire plus avenaument, prendés cauch .ij. parties, el d'arsenic citrin .i. partie, si les faites cuire tant ke quant vous i metés .i. plume qu'ele poile, et apriès metés .i. pau de cire et faites oignement, et por flarier souef, poés meller poure de girofles, d'encens et de musche, et autres coses de boinnes odeurs, et vous en faites oingdre à le maniere de l'autre.
[24] Et por cho que apriès, ces coses font cuire et ardoir là dont li poil chient, si oinderés apriès d'oile rosat ou de violat mellé à aubin || d'uef, à craisse de porc sans sel et se vous volés qu'il ne reviegnent jamais, faites vous oindre de sanc de tonue ou de cauve souris, ou de sanc de rainnes, ou lavés apriès de vin aigre où juskiame blanc et noir, mandegloires, apion soient cuites.
[25] Encore cest autre ki miex vaut: prendés argille set alun autant de l'un que de l'autre, et le meslés tot ensamble à jus de juskiame vert, ou ki[l] ne l'ara, à ewe meslee de vin aigre, et se oindera sovent là où li poil seront cheü; sachiés certainement ke ce ne laissera le poil revenir.
II. DES IEX, COMMENT ON LES DOIT GARDER
[1] Or, convient ke nous vous aprendons des ieux comment on les doit garder. [2] Car, jasoit che que [li] sans les ieux ne puet nus hom vivre sainnement, si vous convient savoir comment on les doit garder, por le biauté du cors garder et maintenir et por cho que par le veir eskive on maintes coses qui porroient le cors anientir, car, si com dist Avicennes, li oel furent mis ens el plus haut liu du cors por miex veir les coses qui le cors porroient gre||ver, et por leur noblece, leur donna nature assés de couvertures, si com sourciels, paupieres, et ce leur donna por garder à eskiwe<r> ce qui nuire lor porroit.
[3] Sachiés dont qui weut le santé des ieux garder, si li estuet garder de poure, de fumee, de vent, de solel en esté quant il fait trop caut, et de regarder coses qui sont de trop grant clarté, car c'est .i. des coses ki plus taut et destrait le veue, et por ce, dist li philosophes que trop grant clartés taut le veue, et li trop grans sons taut l'oiir.
[4] Et ne fait mie seulement mal li clartés au regarder, mais totes coses k'on regarde longement sans departir, especialment petites coses, si com de regarder en livres qui sont de menues lettres, et autres coses dont li veue empire. [5] Mais li trop plourers, et li trop dormirs, et li trop villiers, especiaument li dormirs k'on <fait> maintenant k'on a mengié, et li ongiers le femme grieve sour totes coses, et ce poés veir en ceus qui trop l'ont fait, car il [l]ont les ieux grevés sor tos les autres menbre.
[6] Et encore, se fait boin || garder de totes [autres] viandes et de buvrages gros dont fumees se lievent grosses et aguës, si com sont porrion, oignons, aus, olives, meures douces, fiens grec, cost, lentilles et basilicum qui especialment taut et apetice la veue, et totes coses trop salees et aguës, et devenir yvres, et user le vomir, jasoit ce que li vomirs face bien et espurge l'estomac des mauvaises humeurs dont fumees se porroient lever et grever le veue, mais il fait mal de ce qu'il remuet les humeurs de le tieste et les fait venir as ieux; et por plus briefment parler, totes coses qui raemplissent et wuident trop le tieste grievent à le veue.
[7] Apriès ces enseignemens, si vous aprenderons esperimens qu'il vous convient user por le veue garder et por eskiwer les maladies. [8] Sachiés .i. esperimens por le veue escla<r>cir et enforcier: si est bouter le tieste en ewe clere et froide et ouvrir les ieux dedens, et user d'ewe de fenoul faite à maniere de ewe rose, fait moult de bien à le tieste meisme.
[9] Encore, prendre tuschie ki soit faite en poure || delie destempree de calament, et apriès coulee deliement, mais qu'ele i soit demouree .i. jor, et metre as ieux, che garde mervelleusement le veue et ne laisse nule humeur venir ki grievece le veue.
[10] Encore, prendre le jus d'une pume gernate douce et le jus d'une autre qui soit aigre, et soient mises en .ij. phioletes cascuns par lui et soient bien estoupees et les laist on demourer .xv. jors, si en doit on oster le cler par deseure par lui, et le gros gieter, et puis faire ceste cose ki soit faite d'aloes, de poivre noir[e] et de poivre lonc, et de sel ermoniac, de cascum .i. drame, et soient deliement broié et destempree de jus de pumes, ingaument, que dit vous avons, et les faites coler et user; et de tant que ceste medecine sera plus viès, tant vaura ele miex, et ceste medecine est de mervelleuse nature por le veue espurgier, si com dist Rasis.
[11] Encore, prendés antimonum et tuschie, et les faites laver en ewe de pluie, mais que vous prendés antimonum .x. drames, || et de tuschie et de camea aurea lavee, de cascun .vi. drames, et d'une piere ki est samblans à or .iiij. drames, et petites perles qui ne soient mie pierçies et coral, de cascun .i. drame, et foli ind[a]ici et safran oriental, de cascun .i. drame, et de canfre le tierc d'une drame, et de musee le sietime partie d'une drame, et en faites pourre, et le destemprés en ewe de pluie et le laissiés .iij. a jors demourer, et apriès, le coulés, et le soir, quant vous alés couchier; le metés as ieus, et au matin, les lavés d'ewe de fenoul; et ce fait boin user à tous chiaus qui welent les maladies des ieus eskiwer.
III. DES ORELLES GARDER
[1] Tout ausi que nous vous avons dit et parlé des ieus, vous devés savoir des orelles, car ausi c'on ne puet vivre sainnement sans le veue, ne puet on vivre sans oiir. [2] Mais, por chou que por oïr a on perfection de savoir, si doit cascuns pener des orelles garder, car, si com dist Aristotles, quanke nous savons, nous savons por ce ke nous le trouvons de no enging, ou por chou || ke nous l'oons dire à autrui; et à ce meisme s'acordent li autre philosophe ki apeloient les orelles porte de savoir.
[3] Et vous devés savoir que les orelles, por l'ochison de l'oïr, sont bien necessaires. [4] Tant se pena nature de faire les orelles soutiulment qu'ele le fist de tenrun, car s'ele les eust faites de pure char, eles ne peussent retenir leur forme longement, et s'ele les eust faites d'os, eles seroient de maintes coses grevees; et fist les entrees des orelles à vis, <por> que le vois [por] <qui i vient puist> miex resouner et por garder que li airs n'i venist soudainement caus ou frois, qui l'oïr peust enpeescier.
[5] Or, convient donques, por l'oïr maintenir sain, c'on se gart de mengier grosses viandes et d'emplir trop l'estomac, et de dormir sus tantost c'on a mengié, et garder de froit et de vent, et de grant caut, et de grant son oïr, car c'est .i. cose qui destruit trop l'oïr.
[6] Et estuet, por le maladie eskiwer, chascun jor netiier les orelles de l'ordure, et prendre garde que ewe ne || autre ordure n'i puist entrer ne chaïr, car apostumes en vienent legierement, et especiaument li ewe taut l'oïr quant ele i entre; si vous hastés de metre le hors en tel maniere: prendés .i. tuelet de plonc ou d'argent, et le metés en l'orelle, et le suchiés hors; encore, estiernuers et tousirs i est moult boins, mais que li tieste soit clinee vers l'orelle où li ewe est entree.
[7] Et encore, por garder le santé des orelles, vaut moult à metre .ij. goutes ou .iij. d'oile d'amandes ameres, mais que li oile soit tieve, car coses caudes ne froides n'i doit on mie metre, si com dit vous avons.
[8] Et por garder les orelles d'apostumes et de boces qu'ele ne viegnent es orelles, et de che vous porrés vous apercevoir quant ou visage venront boces et li tieste sera caude, prendés jus de memith, et le mellés à vin aigre, et le coulés, et cascune semaine en metés .i. pau .i. fois ou .ij. es orelles; c'est .i. cose ciertaine et esprouvee por les maladies des orelles eskiwer.
IV. CAPITELES DES DENS ET DES GENCIVES
[1] Des dens et des gencives vous estuet aprendre comment vous les devés en santé et en || biauté maintenir. [2] Chascuns se doit pener de ce faire por che k'il dounent grant biauté as cors, et sont necessaires por les viandes maschier, et à che qu'ele se cuist plus longement à le fourcele.
[3] Ki veut donques garder les dens en santé, il convient garder de .viij. coses.
[4] Li premiere est d'eskiwer tant com il puist viandes et buverages qui à l'estomac legierement se corrunpent, si com lait, et poisson salé, et autres petis poissons frès; de buverages si com de ciervoise, vin de pumes et vin gros nostre.
[5] Li seconde, c'on se gart de vomir souvent, car li vomirs raemplist les dens et les gencives des humeurs qui ens se corrunpent.
[6] La tierce si est de mascier coses wisceuses, si com sont viandes qui sont faites de miel cuit, et dates, et autres viandes samblans.
[7] La quarte si est c'on ne brise as dens coses dures et fors, car se por ce doleurs avenoit, si porroit descendre tels humeurs qui grever li porroit.
[8] Li quinte si est c'on ne mete en se bouce coses engielees, si com sont noif, glace et autres samblans coses, por ce ke che destruit le vertu || des dens.
[9] Li sixte si est c'on ne prenge coses trop froides apriès coses trop caudes, ne coses trop caudes apriès coses trop froides.
[10] Li sietime si est de purgier et de netiier le viande qui l'ordure fait venir es dens, et ne mie si dedens c'on faice les gencives sainnier et les dens estormir. [11] Et li froters est boins de poure et d'autres coses tempreement qui confortent les dens et les gencives, si com nous vous aprenderons cha avant.
[12] Li viijmes si est de garder c'on ne menguce coses ki de leur propre nature <f>ont les dens destruire et grever, si com sunt porion, oignons et maintes autres coses; et ce sont les coses des quels il estuet garder por les dens sainnement maintenir, et ne mie seulement ces coses ke nous vous avons noumees, mais autres assés.
[13] Mais vous devés froter les dens des coses que nous vous dirons; ki les tient en biauté et lors fait maintes maladies eskiwer, mais ke li froters soit fais tempreement, ne mie si forment c'on destruise l'umeur qui est es dens et es gencives, et qu'il les face enfler et qu'eles || soient prestes de recevoir les fumees qui vienent de le fourciele et d'autre part; <et> si fais froters fait plus mal que bien por les dens garder.
[14] Prendés .i. once de corne de cierf arse, et semence de tamaris, de cyperi, et roses, et pinkenart, de cascun autant, et salse gemme .i. quart de .i. once, et en faites poure deliee et le metés en .i. drapel, et en frotés les dens, et apriès les lavés en boin vin caut; ceste poure garde moult et conforte les dens et les gencives.
[15] Encore, prendés le racine du titimal et le faites boulir en vin, et du vin où ele sera cuite, lavés le bouche .ij. fois ou .iij. le mois, car c'est .i. cose qui fait boinne alainne de bouce et garde les dens de doleurs et de maladies, si com dist Avicennes.
[16] Encore, por les gencives conforter et les dens enblancir, prendés marbre blanc, et coral blanc, et os de seche, et salse gemme, et encens et mastic, de cascun engaument, et en faites pourre deliee, et le metés en .i. sachet de toile, et en frotés les dens, et lavés de vin, et apriès, les frotés d'un drapiel || d'escarlate.
[17] Apriès, por les gencives ki volentiers sainnent, et por les dens blanchir, et por faire boinne alainne, prendés galia muscate, spume marine, sel rosti, corne de chierf arse, de cascun .iiij. drames, et alun, et nitre, et pume gernate, gale, balautie, de cascun .ij. drames, et podien, spic, cost, linaloes, cardamonde, cascun .i. drame, et en faites poure deliee et en frotés les dens.
[18] Se vous volés removoir le aacement des dens ki sovent avient, machiés pourcelainne, amandes, avelainnes, froumage rosti; et vin caut tenir en le bouce, et sel, et totes [ces] coses caudes ostent tels maladies.
V. COMMENT ON DOIT LE VISAGE GARDER
[1] Pour plus briement parler, si vous laisserons à dire des levres et du menton, si vous dirons comment cascuns doit le visage garder et le couleur donner, et <en> cest ensegnement, porra cascuns savoir le nés et les autres menbres du visage garder.
[2] Sachiés premierement que li natureus coleurs du visage et li biautés se cange as hommes par maladies, et en sains par maintes coses, si com par le solel, par vent, por froidure, por <pau> baignier, et por soi netiier de l'ordure, et por mengier coses salees et autres ki font sanc troble et melancolieus, et trop ongier femme, et por boire malvaises ewes, et por flairir et mangier coumin et amyos, et por user vin aigre, et por pensees, et por tristece, et por courous, et por autres coses assés ke nous ne dirons mie chi.
[3] Li mauvaise coleurs ki por maladies avient, si com gaunisse por fie escaufé, et palece por grant maladie que on mainne, et por autres maladies, les doit on removoir par les maladies oster dont eles vienent, et le maladie oster n'est mie no ententions, mais de faire bele coleur et removoir les malvaises qui vient par les malvaises okisons, si com nous vous aprenderons.
[4] Sachiés donques <que> coses qui esclaircissent le sanc font boinne coleur, si com sont borraces, oès maus, brouès de char humer, ciches, figes seches cuites et crues, especiaument valent à user || à chiaus ki de maladie se lievent à revenir à leur premiere coleur, car d'eles s'engenre sans soutiuls et ciers qui legierement vient au cuir de le char, et de che vous poés apercevoir que ki l'usera, si fait assés de pou.
[5] Et ne mie seulement ces coses esclairissent le sanc, mais autre si com sont mirabolan condi, et trifes, et autres laituaires que noumé vous avons ou daharrain <capitre de la premiere partie qui aprent comment on doit la viellesce targier.
[6] Encore a autres choses qui dounent biele couleur pour lor force, qui font le sanc au cuir de la char venir, si comme sont oignons, porrions, aus, poivre, rafle, senevé, poume de paradis, girofles, cyperis, safran. [7]
[11] Or vous aprendrons qu'il vous estuet user par defors, si com lavers et autres choses. [12] Prendés premierement aluisne, et fuerre d'orge ou d'avaine et vous estuvés le visage au soir quant vous irés couchier, et au matin, vous lavés de couleure de retrait de fourment: ce vaut à blanchir le visage et nectoier.
[13] Et ce mesmes faire: prendés ferine de feves, racine de flors de lis, warance, glu de pisson, de chascun une once, et en faites porre, mais que la gluis soit fondue et destempree en yauve, et la porre meslee apriès ensi qu'il deviegne à maniere d'ongement, et en oigniés le visage le soir; et au matin, le lavés d'iauve chaude.
[14]
[15] Encore en ceste meisme maniere, faites faire yaves de flours ou de foilles de brioine, et tous lavés le col et le visage de ces meismes yaves [vos lavés le col et le visage], car ceste jave vaut sor toutes choses à oster lentilles, et takes, et ordures qui vienent es visages.
[16] Et encore faites yaves de flors de noele en la maniere que dit nous avons, et se lavés le col et le visage, car ele vaut trop à ces meismes coses. [17]
[18] Se, pour solail, ou pour chaut, ou pour froit vient mauvaise couleurs, si vous estuet garder et faire chou que, ou capitre qui aprent comment on se doit garder en chemin, nous apresimes.
VI. LI .\Mvi\M. COMMENT ON DOIT GARDER L'ESTOMAC EN SANTÉ
[1] Devés savoir que la premiere ovre que la nature de chascun fait ou cors, si est de cuire la viande en l'estomac, et pour ceste ovre faire bien et acompliement, si couvient que la viande soit maiscie en la bouche. [2]
[3] Li une si est que l'estomac en soit pour norris tout premierement, et dou remanant se norrist trestous li cors. [4] Et ne devés mie entendre que la viande se cuise en la booche de l'estomac, chou est à dire en la forchele, mais li propre> lius du cuire le viande si est ou fons, et ch'est por le caleur du cuer et du fie et des autres menbres qui sont environ, car de se nature ne porroit il cuire viandes, sans le caleur des autres menbres que nous vous avons dit.
[5] Por ce que li sustance soit nierveuse que c'est .i. des menbres du cors qui plus longement sent coses qui grever puent, et de tant nierveuse sustance ke nous vous avons dit, li douna nature une fourme longe et reonde.
[6] Reonde li dona qu'il ne puist iestre encraissiés, car si com vous savés, coses rondes se maintient plus sain||nement et por ce li dona nature longe, et reonde, et large pour retenir et soufrir grant plenté de viandes, pour soi nourir et tot le cors, et li fist .i. bouce deseure por prendre le boire et le mengier, et .i. autre par desous por espurgier l'ordure et le superfluités des viandes qui s'en vont par les bouiaus, et jasoit ce que ce soit [grosse chose, n'est ele mie si grosse que li boiel n'en prengent nourissement.
[7] Et encore le fist nature] aussi com enmi liu du cors por le norrisement douner à tous les menbres plus legierement, et por ce, li philosophe apeloient l'estomach despense du cors, car ausi com vous veés ke de le despense de l'ostel sont aministré li norrissement à ciaus de l'ostel, ausi de l'estomac issent li norrissement à tous les menbres du cors.
[8] Par ces paroles, devés savoir que cascuns doit metre tote s'entente et se painne à le santé de l'estomac garder, car c'est fondemens de garder le santé du cors et tous les menbres, et de cui partent pluseurs maladies qui garder ne s'en set.
[9] Sachiés que, en garder le || santé de l'estomac, convient garde prendre en boire et en mengier c'on soit si amesurés, que li premiere oevre que nature fait, si com cuire le viande, ne soit destourbee par outrage, car qui prent viandes outre chou qu'il ne doit, et boit; la vertu de l'estomac en afoiblist; ensi remaint li viande crue qui s'en va parmi les menbres, dont maladies avienent mainte fois.
[10] Et ne doit on mie garder seulement le viande a prendre por le santé de l'estomac garder, mais garder l'eure que li estomas le demande, et de douner cose qui li soit delitable, et por ce, dist Dyogenes que appetis de mengier aide à cuire le viande. [11] Encore dist Ypocras que se li viandes est plaisans et amiable, car jasoit que li une ne soit si boinne comme l'autre, si vaut ele miex, car li estomas amende se malise et le cuist plus legierement; et entendés que totes voies, doit on le malise de le viande amender, qui puet, devant chou que on mengut, mais por l'amendement, ne soit mains plaisans ne mains delitables à l'estomac.
[12] Et encore devés savoir ke nus ne puet garder bien le || santé de l'estomac, qui ne connoist se naturel complexion, car maintes gens sont ki ont l'estomac froit et sec de lor nature, et autre ki l'ont froit et moiste, et autre qui l'ont caut et moiste, et autre qui l'ont caut et sech; por ces natureus complexions connoistre, si vous dirons les signes.
[13] Li estomas caus cuist plus legierement les grosses viandes que le<s> soutix, si com char de buef, oès, awes, et assés d'autres; les soutiuls viandes, si com char de poucins, lait, chievrel et autres assés ardent et corrunpent, et por ce, cil ki a l'estomac de tel complexion doit avant mengier les grosses viandes ke les legieres, et se doit garder de mengier aus, et poivre, et totes coses caudes, et boire vin fort, se che n'est vins verdelès foibles.
[14] Cil qui a l'estomac natureument froit si mengue plus volentiers qu'il ne cuist le viande, et ne puet cuire, fors que legieres viandes, car, por les grosses, enfle et bruit, et plus legierement prent les froides que les caudes, et n'a mie trop grant talent de boire, et pot ce, cil || qui ont l'estomac de tel complexion si se gardent tant com il puent de mengier caudes viandes, et s'il les mengut, si les mengut à boinnes especes, si com de caniele, de gimgenbre, gyrofle, cardamon et autres caudes especes, et k'il boivent boin vin meur.
[15] Chil qui ont naturel complexion de l'estomac seche, si ont soief souvent et boivent por ce volentiers, et souvent, et pau ensamble, et prendent plus volentiers le<s> seces coses que les moistes. [16] Cil doivent user seches cose <pour la santé de lor estomac garder. [17] Cil qui ont l'estomac naturaument moiste si n'ont mie soif, et regetent legierement la viande, et prendent plus volentiers choses moistes que seches; et cil qui ont tel complexion doivent user coses seches. [18] Et> en totes complexions natureus, là où on connistra ke li quatre qualités habundent, si doivent user totes coses contraires, car c'est li particulers abstinence ke dist Platons.
[19] Encore dist Constentins, par auctorité de Galiien, ke quant à Galiien fu demandé por coi il apetiçoit cascun jour se viande, si repondi k'il n'avoit entention de mengier fors tant qu'il peuist se vie alongier, et n'avoit cure de mengier tant que li fourciele li enflast et bruisist.
[20] Et convient que || on menguce ordenement et que on boive devant et dériere les viandes, si com leur nature lor requier<t>. [21] Et ne mie seulement che que nous vous avons dit en ces capitres vaut à garder li santés de l'estomac, mais savoir le capitre du mangier de le premiere partie.
VII. CAPITELES DU FOIE
[1] Sachiés que li foies est uns des .iiij. principaus menbres du cors où li sans <est> engenré dont tot li cors se norrist; et fait boin metre entente de lui garder en santé, por che que les humeurs que li cors nourist, si com li sans, est engenrés illuec, si com dit vous avons; et por che, devés entendre et savoir que li viande ki vient à le fourciele ne porroit cuire sans le caleur du foie, et por che, li fist nature .v. brances, por bien porprendre le fons de l'estomac et por miex le caleur douner.
[2] Si que, quant li viande est ruite et espurgie, ele remaint ausi com ewe d'orge à l'estomac, lors se part cele ewe de le fourciele et s'en va au foie par vainnes que li phisike apiele mesarache, et illuec se re||cuist, et quant ele est bien cuite, de cele partie ki cuist atempreenent si devient sans, et s'en va par les vainnes par tot le cors, dont cascuns menbres reçoit sen norrissement; de l'autre partie, ki se cuist à outraige, si devient cole, si le kace li nature à une vesie qui se tient à .i. des brances du foie, qui est apelee l'amer.
[3] La partie qui est ausi com loiie de sanc qui est apelee melancolie si s'en va à le rate; de l'autre partie qui ne se cuist mie bien qui est apelee flume, si s'en va avoec le sanc par tot le cors por ce que, si sans faut, li nature recuist cestui et doune nourissement as menbres.
[4] Et ceste viande qui est ou foie dont les humeurs s'engenrent, si a unes superfluités que li nature cache par les rains, et c'est orine.
[5] Et devés entendre que, jasoit ce que ce soient superfluités, si sont eles aucunes fies necessaires au cors de l'homme aidier à vivre, et por ce, lor douna nature propre liu, et por eles user quant on en ara mestier. [6] Et ne doit nus iestre negligens à le santé du foie garder, puisqu'il est necessaires au || cors, si com vous avés oii.
[7] Et por le santé garder, si vous dirons les signes del <caude> naturel complexion du foie, si com avoir les vainnes larges et enflees, et le pis pelu, et avoir grant talent de mengier et de boire, et avoir le coleur du cors qui tient en gaune por l'abundance <de la cole> qui ou fie est engenree. [8] Et cil qui le complexion ont tele si doivent user coses froides et soi garder de totes coses caudes, si com d'aus, de poivre, oignons, porions, rafle, senevé et de vin fort, et doivent user vin mellé à ewe, especiaument vin verdet.
[9] Li signes del naturel complexion <froide> si sont contraire chiaus ke nous vous avons dit, car li sans qui est engenrés en cel foie si est delié[e]s et eweus, et sont totes les vertus du cors foibles et est tous jours maladius. [10] Cil qui est à tel foie doit user les coses contraires à celes que dites vous avons deseure.
[11] Li signes del naturel complexions <seche> si est à avoir petites vainnes à pau de sanc, et trestout a le cors sech, et assés de paus et crespés, || et avoir plus grant talent de boire que de mengier; à chelui fait boin user coses moistes.
[12] Cil qui ont le naturel complexion du foie moiste, si ont les signes contraires à ciaus qui ont le seche, et doivent user coses seches.
[13] Et entendés que se ces complexions habundent outre ce qu'eles ne doivent, si doit on user coses contraires à le complexion, et se c'est cose qu'eles ne soient trop à outrage, si doit on user coses samblans, car par samblans coses doit on user en santé <por> cascune complexion garder, et par contraires les maladies removoir. [14] Et sachiés generaument ke por destruire le santé du foie si est de metre l'une viande sor l'autre devant qu'ele soit cuite, et de boire ewe froide à grant abundance à enjun, et apriès baignier, et apriès l'user de le femme, et apriès grant travail, ke tels vous refroide le foie et fait legierement venir ydropisie.
[15] Et des coses qui sont convenables au foie si sont douces coses, mais c'on n'en prenge trop por ce qu'eles estoupent legierement les voies por || le grant atration ke li foies en fait. [16] Et de ces coses douces, celes ki sont plus amiables et ki miex font si sont roisin sech, et figes, et noisetes de caure et boin vin, mais que li foies ne soit trop caus.
[17] Ches coses sont boinnes à garder le santé du foie, et se maladies avienent, si convient faire ce que li aucteur de phisique enseignent.
VIII. CAPITELES DU CUER
[1] Devant tous les autres menbres est créés et engenrés li cuers premierement, et apriès li foies, et apriès li ciervele, et apriès ordeneement li autre menbre, par le vertu Notre Signeur.
[2] Et sachiés que li cuers est ausi com fontainne dont li commencemens vient de caleur et de vertus dont tous li cors se maintient en santé et en vie, et mis ou miliu du cors por douner plus longement vie à tous les menbres; et por che qu'il est commencemens de le vie du cors, si le mist nature ou plus sauf liu, ensi com vous veés por lui garder des coses contraires. [3] Car, por lui garder, ele fist costes d'os devant et deriere, si com li pis devant || et les rains deriere, et fist .i. autre menbre si com le poumon qui li est couché et li doune l'air, quant mestiers est, pour se caleur atemprer. [4] Et ne mie seulement li dona nature ce ke dit vous avons por le garder, mais assés des autres ke nos vous laisserons à dire.
[5] Et devés savoir que li fourme du cuer est large par desous et aguë par deseure, à maniere de pume de pin, et demeure ou cors de l'homme à rebous, car li chiés demeure par devers les piès, et li rachine par devers le chief; et jasoit ce qu'il soit enmi liu du pis, si com dit vous avons, totes voies, li chiés pent .i. pau plus vers seniestre.
[6] Donques, puisque nature mist tote s'entente, si com vous avés oï, si se doit cascuns pener por lui garder en santé. [7] Si vous dirai le naturel complexion de cascun, car selonc les diversités des complexions, doit on user diverses coses por le santé du cuer garder. [8] Li signes de le caude complexion naturel du cuer si est avoir le pis large et pelu, et le pous fort et erant, et longe alainne; et est preus et hardis ki l'a caut, et se courouce volentiers. Iceux gens ki || on<t> ceste complexion caude se doivent garder tant com il puent de coses caudes user, et prendre les contraires si com les froides, car en tel maniere gard<e> on le santé, si com dit vous avons.
[9] Li signes de le complexion froide est d'avoir estroit pis, s'il n'i a contraires d'autres menbres, c'est à dire qu'il porroit avoir bien le cuer caut et le cerviele froide, si que, por le caleur du cuer, ne porroit li pis iestre larges, ançois seroit estrois por le froidure de le cerviele; et li pous sera petis, et lens, et faibles, et tous li cors lens et peurès, et resamblera femme en totes manieres.
[10] Li signe de le complexion seche sont samblant à chiaus de le <caude, et est li hons mal acoustumés. [11] Li signe de le complexion moiste sont samblant à chiaus> de le froide, et se li complexions du cuer est ensamble caude et seche, caude et moiste, ou froide <et> seche, ou froide et moiste, si se diversefieront li signe si com dit vous avons; et cascune usera les coses contraires à se naturel complexion, et por savoir les queles sont plus especiaus medecines du cuer, si les vous noumerons.
[12] Ce sont jaconces, or, argens, bougloses et basilicum qui porte .i. || flourete noire: che sont coses temprees ki confortent le cuer.
[13] Coses caudes por user à chiaus ki ont le cuer froit si est: ecidoiare, musc, ambre, soie, safran, girofles, siloes melise, cardamon, cubebes, fuelles de citre, fuelles <indes,> enula.
[14] Coses froides por user à chiaus ki <l'>ont caut si sunt: parles margerites, canfre, sandales blances et rouges, coral blanc et rouge, roses, carabé, spode, terre sigillata, et pumes, et coriandre sec et vert. [15] Che sont les propres coses por le cuer maintenir en santé.
[16] Et vous meterons fin à ceste seconde partie et ne vous en parlerons plus, par che que, ki set les principaus menbres des quels nous vous avons parlé garde<r> en santé, il sara garder les autres menbres legierement.
