Aldobrandino da Siena, Régime du corps, metà XIII sec.
Le régime du corps de maître Aldebrandin de Sienne. Texte français du XIII^{e} siècle, publié pour la première fois d’après les manuscrits de la Bibliothèque Nationale et de la Bibliothèque de l’Arsenal par Louis Landouzy et Roger Pépin, Paris, Champion, 1911.
Edizione digitalizzata a cura di Serena Modena
Marcatura digitale a cura di Luigi Tessarolo
Permalink:
IV. CAPITELES DU DORMIR
[1] Vous devés savoir que li dormirs fu trouvés por vertus du cors douner repos et assouagement du travail qu'il suefrent ou vellier por le travail et por le besoignier qu'il convient faire, fors que as vertus qui cuisent le viande, qui enforçent et se travaillent plus en dormir por le caleur naturel qui dedens le cors revient.
[2] Sachiés que li dormirs, s'il est fais selonc ce qu'il doit, il garde mont le santé du cors por ce qu'il fait bien le viande cuire, et boines humeurs engerrer; et si fait trespasser maintes maladies qui vienent par courous, et par trop gesir à femme, et par trop || penser, et par viandes c'on prent qui metent le cors à nient.
[3] Et li dormirs atempreement vaut miex as viex que as jovenes, por ce k'il garde les humeurs où li caleurs naturex se nourist, et por ce, dist Galiiens en se viellece, je mengue cascun jor, costes de laitues por ce qu'eles mi font dormir, et li dormirs me gaaigne et engenre l'umeur où me caleurs est nouries.
[4] Sachiés encore que li dormirs fermement est trop boins à qui le fait ordeneement selonc ce que nous deviserons. [5] Car qui velt dormir por le santé de sen cors garde<r>, il convient qu'il dorme apriès ce que li viande est avalee de l'estomach, et doit iestre plus lonc li dormirs de celui qui prent assés de viande que de celui qui en prent pau; et cis dormirs doit estre de nuit, ne mie de jor; et quant il commence à dormir, qu'il gise sor le destre costé, et puis se tourt sor le senestre, et soit li cavés du lit haus, et bien couvers de dras, car ce aide mout, avoec le dormir, à cuire le viande: c'est li drois dormirs et li naturex.
[6] Mais qui dort de jors, si en avienent maintes maladies, si com || malvaise coleur, maladie de rate, s'en devient on pesant et lens, si engenre apostumes et fievres et autres maladies assés. [7] Donques, por ces maladies eskiver, si doivent cil ki ont acoustumé à dormir le jor, de jor en jor entrelaissier et revenir au naturel dormir de le nuit, et se les nuis sont petites, si dorment anchois le matinee que sor jor.
[8] Encore devés savoir que dormirs adens est boins por ce qu'il retient et conforte le caleur naturel à bien cuire le viande, et li dormirs à envers est malvais por ce qu'il fait maintes maladies venir, si com apoplesie, frenesie, fantosme, que li phisitiien apelent incubus, c'est à dire en françois apesart, car les superfluités de le cervelle se traient par devers le haterel desriere et ne vont mie le droite voie par le nés et par le bouce, <si com eles deussent aler. [9] Et pot çou, la bouce tenir> ouverte en dormant n'est mie folie por les superfluités espurgier; et li dormirs apriès ce c'on a prins le viande est malvais por ce qu'il fait le ventre enfler et bruire.
[10] Encore li torne<r>s de l'.i. costé sor l'autre souvent est malvais et ne laisse mie cuire le viande à || point, et quant il avient ensi que li ons a mengié, et il li prent talent de dormir, il se doit aler .i. pau esbatre por le viande avaler.
[11] Du vellier ne vous estuet mie moult dire. [12] Car qui set le maniere de dormir il doit savoir le maniere du vellier. [13] Car li velliers ne fait autre cose quant il n'est fais naturelment ke d'escaufer et damagier et de metre totes les vertus du cors à nient.
