Aldobrandino da Siena, Régime du corps, metà XIII sec.
Le régime du corps de maître Aldebrandin de Sienne. Texte français du XIII^{e} siècle, publié pour la première fois d’après les manuscrits de la Bibliothèque Nationale et de la Bibliothèque de l’Arsenal par Louis Landouzy et Roger Pépin, Paris, Champion, 1911.
Edizione digitalizzata a cura di Serena Modena
Marcatura digitale a cura di Luigi Tessarolo
Permalink:
XI. DES SANSSUES ET A COI ELLES VALENT
[1] Vous devés savoir qu'il i a .i. maniere de sansues qui sont venimeuses si com dient li phisitiien, et por conoistre les queles sont boines et les queles sont venimeuses, si vous en dirons ce ke Avicennes en dist.
[2] Il dist ke celes ki ont grosses tieste, et qui ont coleur entre noir et vert, et qui sont glaireuses, et ki sont roiies d'inde, et ki demeurent en marès, de celes se doit on garder, car por le venim qu'eles || portent puent avenir fievres, apostumes, malvaises plaies, pasmers, foiblece de menbres.
[3] Celes ki sont boines sont celes ki demeurent en ewe courant et où raines sont, et ki ont coleur obscure et sont roiies de coleur rouge, et ont le tieste petite, et sont samblans à cheuwe de souris. [4] Mais celes qui miex valent sont celes ki ont le ventre rouge et sont verdes deseur le dos, mais qu'eles soient en ewe courant: ce sont les melleurs. [5] Et puis que vous savés les queles sont boines, or vous dirai à coi eles valent.
[6] < Eles valent > à ciaus ki sont lentilleus, et à chiaus qui ont goute rose, et à malvaise coleur rouge et boutonnee, et à plaies faites de lonc tans ki ne puent saner; mais c'on soit ançois sainniet de vainne, car, si com dist Avicennes, li sans qu'eles espurgent vient plus de parfont que ne fait cil des venteuses.
[7] Encore couvient ke nous vous aprendons ke devant ke vous metés les sansues, ke vous les wardés .i. jor puis qu'eles seront prises, et les metés en ewe froide et clere pour espurgier ce qu'eles aront || ou ventre, et seroit boin de les nourir de sanc d'aigniel ou d'autre cose devant chou c'on les mesist. [8] Et apriès, couvient que là où on les doit metre, c'on soit bien frotés et que on i mete .i. poi de sanc de buef por plus tost prendre; et quant ele seront plainnes et vous les volés oster, prendés .i. pau de cendre, ou .i. pau de sel ou verde soie arse, ou lin ars, ou esponge arse, ou laine arse et le degoutés sus, si kaïra maintenant.
[9] Et puis qu'eles seront cheues, si couvient c'on leve le liu de boinne ewe caude, et ke li remanans du sanc soit espurgiés par ventouser; et se li sans ist plus qu'il ne doit et vous le volés estancier, si metés par deseure .i. drapel mollié en vin aigre. [10] Se ce ne vaut, si ferés che ki plus fort estraint: prendés .i. piece de tille, et le faites ardoir, et en faite delie pourre, et le metés par desus. [11] Autant fait pourre de galles arses, et pourre de tiere arse rouge, et pourre de cendres bien delies, car merveilleusement totes ces pourres estraing||nent le sanc.
