RIALFrI

Enanchet, 1226-1252

Das “Livre d’Enanchet” nach der einzigen Handschrift 2585 der Wiener Nationalbibliothek, Inaugural-Dissertation zur Erlangung der Doktorwürde genehmigt von der Philosophischen Fakultät der Friedrich-Wilhelms-Universität zu Berlin von Werner Fiebig aus Berlin, Jena-Leipzig, Gronau - Agricola, 1938 («Berliner Beiträge zur Romanischen Philologie», 8.3/4).

Edizione tratta da http://scrineum.unipv.it.

Marcatura digitale a cura di Luigi Tessarolo

Permalink:

 

 

[13] La dotrine dou mercheant.

Hai jounes! Entand, tu qui voiz avoir honor en cest monde! Tu ne doiz humilier a Deu, a ce qe il soit a toi en aide; por ce que nulle chouse puet florir en bien, se il n’est por soe doucece. Apres tu doiz amer tes paranz qui t’ont engandrez et norriz en cest monde ou toz caus de ton parenté. Il te covient avoir le coll lons, por retenir les mauveses paroles; car por mal dire gahaingne l’ome grant desenor sanz aucun preu. Mes a cele despense ou mein se puet parler a pleisir a celui, qu’il parole le contreire; don il pormanra ses amis. Mes il est grant mesaventure ne pooir teisir les maus, dont maintes foiz se changent d’amis enemis. Se tu veuz estre cortois, il te covient estre veritable et no eser plains de mauveis paroles. Ton delit ni doit pas estre a reconter les maus trepassiez. Car il ne li est se perde non. Tu doiz aler la ou sunt li sage et doiz noter ses paroles, a ce qe tu poisses conostre lo voir de ce qe tu veuz. Apres doiz-tu aprendre randu, por qu’ele est lumere des mercheant. Apres les monces, a ce que tu n’i soies deceu en autre terre, quant tu il seras. Quant tu veuz merchier, tu doiz enquerir d’autres terres, por savoir quel merchié li est meillor. Et quant tu i es, te covient aovrer ton san en ce qe tu i gahagne. Car il est grant desenor et domage a perdre son avoir por folie. Et por ce t’estuit fuir les pecheuroses, et les gieu des dez, et no converser pas avo les mauveis home, a ce qe tu n’i soies deceu por aucun forfeit. Car celui qui a avoir et il lo perd por sa folie, il i seroit mieuz morir confes, qe plus vivre d’or en avant. Tu doiz merchier loialment et sanz mentir, et gahagnier petit ou raison, qe mout plus a tort. Et se tu auras por lui tot ce qe tu voudrais en cest monde et en l’autre pardurable gloire. Don tu lo doiz loer et glorifier dou gahaing, et partir as povres por la soe amor, et de la perde regracier lui et sa vertu ausi come fontaine de tote misericorde.


 

 

 

 

 

 


Notice: Undefined index: query in /home/francige/rialfri.eu/rialfriPHP/application/controllers/TestoController.php on line 52