Aldobrandino da Siena, Régime du corps, metà XIII sec.

Le régime du corps de maître Aldebrandin de Sienne. Texte français du XIII^{e} siècle, publié pour la première fois d’après les manuscrits de la Bibliothèque Nationale et de la Bibliothèque de l’Arsenal par Louis Landouzy et Roger Pépin, Paris, Champion, 1911.

Edizione digitalizzata a cura di Serena Modena

Marcatura digitale a cura di Luigi Tessarolo

Permalink: https://www.rialfri.eu/texts/regimine|002 Copia

V. COMMENT ON DOIT LE VISAGE GARDER

[1] Pour plus briement parler, si vous laisserons à dire des levres et du menton, si vous dirons comment cascuns doit le visage garder et le couleur donner, et <en> cest ensegnement, porra cascuns savoir le nés et les autres menbres du visage garder.

[2] Sachiés premierement que li natureus coleurs du visage et li biautés se cange as hommes par maladies, et en sains par maintes coses, si com par le solel, par vent, por froidure, por <pau> baignier, et por soi netiier de l'ordure, et por mengier coses salees et autres ki font sanc troble et melancolieus, et trop ongier femme, et por boire malvaises ewes, et por flairir et mangier coumin et amyos, et por user vin aigre, et por pensees, et por tristece, et por courous, et por autres coses assés ke nous ne dirons mie chi.

[3] Li mauvaise coleurs ki por maladies avient, si com gaunisse por fie escaufé, et palece por grant maladie que on mainne, et por autres maladies, les doit on removoir par les maladies oster dont eles vienent, et le maladie oster n'est mie no ententions, mais de faire bele coleur et removoir les malvaises qui vient par les malvaises okisons, si com nous vous aprenderons.

[4] Sachiés donques <que> coses qui esclaircissent le sanc font boinne coleur, si com sont borraces, oès maus, brouès de char humer, ciches, figes seches cuites et crues, especiaument valent à user || à chiaus ki de maladie se lievent à revenir à leur premiere coleur, car d'eles s'engenre sans soutiuls et ciers qui legierement vient au cuir de le char, et de che vous poés apercevoir que ki l'usera, si fait assés de pou.

[5] Et ne mie seulement ces coses esclairissent le sanc, mais autre si com sont mirabolan condi, et trifes, et autres laituaires que noumé vous avons ou daharrain <capitre de la premiere partie qui aprent comment on doit la viellesce targier.

[6] Encore a autres choses qui dounent biele couleur pour lor force, qui font le sanc au cuir de la char venir, si comme sont oignons, porrions, aus, poivre, rafle, senevé, poume de paradis, girofles, cyperis, safran. [7] Mais que dou safran prengne peu, et ysope puet on prendre en ceste maniere, si comme prendre .ii. dragmes de ysope, et demie dragme de safran, et demie onche de sucre, et destemprer en vin et boive. [8] Teil beverage user fait boine couleur venir. [9] Encore traveillier, et jouer, et courechier atempreement, et joie, et leece, et chanter, et oïr estrumens, et demorer avec gens bien vestus et plaisans, et victore, font boine coleur et clere. [10] Ces coses sont qui par dedens le cors font boine coleur venir.

[11] Or vous aprendrons qu'il vous estuet user par defors, si com lavers et autres choses. [12] Prendés premierement aluisne, et fuerre d'orge ou d'avaine et vous estuvés le visage au soir quant vous irés couchier, et au matin, vous lavés de couleure de retrait de fourment: ce vaut à blanchir le visage et nectoier.

[13] Et ce mesmes faire: prendés ferine de feves, racine de flors de lis, warance, glu de pisson, de chascun une once, et en faites porre, mais que la gluis soit fondue et destempree en yauve, et la porre meslee apriès ensi qu'il deviegne à maniere d'ongement, et en oigniés le visage le soir; et au matin, le lavés d'iauve chaude.

[14] Encore, pour faire le cuir dou visage delié et blanc et pour toutes ordures oster: prendés fluers de feves et en faites iauve à maniere d'iauve rose, et vous lavés le visage et le col, et se plus fort le volés blanchir et nectoier, prendés ental dental, borrache, sarcocol, marbre blanc, coral blanc, cristal blanc, ferine de feves, gis, et goume dragant, et en faites porre et destemprés à l'iauve que noumé nous avons et en faites petis torcis; cist torcis sont piles scachees à maniere de lupins, et les faites sechier en l'umbre, et quant user les volés, si les destemprés a .i. pau d'iauve rose ou d'iave de flors de feves, et oigniés le visage, et de ces meismes iauves vous lavés au matin.

[15] Encore en ceste meisme maniere, faites faire yaves de flours ou de foilles de brioine, et tous lavés le col et le visage de ces meismes yaves [vos lavés le col et le visage], car ceste jave vaut sor toutes choses à oster lentilles, et takes, et ordures qui vienent es visages.

[16] Et encore faites yaves de flors de noele en la maniere que dit nous avons, et se lavés le col et le visage, car ele vaut trop à ces meismes coses. [17] Et, se de la semence de la noele volés faire porre bien delié, si le meslés à alun de plume, et .i. pau de bresil, et le destemprés à iauve faite de sa flour, et en faites pilles grossetes, et quant user en volés, si en destemprés une once en l'iauve rose, ou en l'iauve de flours de noiele, et en oigniés le visage, ce fait le visage blanchir et estre bien coulouré.

[18] Se, pour solail, ou pour chaut, ou pour froit vient mauvaise couleurs, si vous estuet garder et faire chou que, ou capitre qui aprent comment on se doit garder en chemin, nous apresimes.