Aldobrandino da Siena, Régime du corps, metà XIII sec.

Le régime du corps de maître Aldebrandin de Sienne. Texte français du XIII^{e} siècle, publié pour la première fois d’après les manuscrits de la Bibliothèque Nationale et de la Bibliothèque de l’Arsenal par Louis Landouzy et Roger Pépin, Paris, Champion, 1911.

Edizione digitalizzata a cura di Serena Modena

Marcatura digitale a cura di Luigi Tessarolo

Permalink: https://www.rialfri.eu/texts/regimine|001 Copia

VII. D'ABITER AVOEC FEMME

[1] Cascuns ki a sens et discretion doit metre sen entention et tout son pooir de savoir comment on doit habiter à feme, pour chou que c'est une principaus cose dou cors sainnement maintenir, et dou cors metre à nient, ki tempreement ne le fait et use. [2] Et pour chou, si vous en dirons le bien et le mal ke il puet faire, et l'eure à le quele on le doit faire pour le cors maintenir en santé, et les maladies ki en pueent venir, eskiver.

[3] Saciés dont ke la matere ki se part dou cors de l'home à user le feme si est superfluités de humeurs ke tout li membre norissent, et pour chou entendre, si vous couvient savoir ke toutes coses ki norissent le cors de l'home sis quisent premierement en l'estomac, et cest quisement apiele fisike premiere digestion; apriès, ou fie, et ceste apiele seconde digestion; apriès si quisent es vainnes ki vont par mi le cors, et çou est apielé tierce digestion.

[4] Et encore quant cil norissemens ist fors des vainnes || et retorne en sustance de char et d'os et d'autres menbres, lors dist phisike que c'est quarte digestions, si depart le matere ke nous vous avons nommee, à jugier que Ypocras dist qu'ele se part plus de le cervelle que des autres menbres; et cest prouve <par> esperiment, car il dist s'on colpoit .ij. vainnes qui sont desrier les orelles, cil à cui on les colperoit, n'aroit ponir d'engenrer ne de gesir à femme.

[5] Or vous dirons comment et queles maladies avienent par le trop user. Tous li cors en afloiblist, et tot[e] li veue, et tot li talent dé mengier, et fait malvaise alaine, et fait malvai||se couleur, et fait venir doleur de flans, et foiblece de niers, et souvent avenir mauvaise alaine, et trestout le cors refroide, et les viertus de cascun membre met à nient, et sour toutes coses fait enviellir. [6] Et fait plus, il fait pierdre l'engenrer et fait venir autres maladies asés ke nous ne vous contons mie pour plus briement parler. [7] Et pour les maladies eskiver ki en avienent, si vous aprendrons le tans et l'eure ke on le doit faire.

[8] Premierement se doit garder cascuns ke il ne le face quant il est plains de boire et de mengier, pour chou ke maladies en avienent, si comme pour traveillier apriès mengier, si comme nous avons dit cha ariere. [9] Et se cose avient c'on le face, si se doit on mouvoir et aler un pau pour le viande avaler, et puis apriès coucier, dormir. [10] Et encor se doit on garder ke on ne le face quant il est vuis et a grant faim, et ce chou est k'il soit magres et sès, pour chou k'il le fait etique et met le caleur naturel à nient.

[11] Mais la droite eure dou faire si est quant la viande est prieske quite en la tierce digestion, et c'on soit widiet d'orine et d'autre cose faire, et ceste poés savoir par les enseignemens ke nous vous disimes ou capitele dou traveillier. [12] Et ceste eure n'est pas ingaus à cascun, car la viande se cuist plus tos à l'un ke à l'autre; pour chou, cascuns se gart quant il cuidera ke sa viande soit quite, se le face, car saciés ke c'est bonne eure pour engenrer enfans, speciaument se la feme est delivre un jour devant de sa privee maladie.

[13] Et saciés ke hons yvres, et hom ki l'use trop, et jovenes enfans, et hom de grant viellece, et ki se lievent de maladie ne pueent enfans engenrer. [14] Mais cil ki sunt de bonne complection forte, et ne sunt pas ne trop cras ne trop magre, et ont les vaines larghes, tel home <le> puent plus faire et enfans engenrer.

[15] Et pour l'atempreement faire, si comme nous avons devisé, fait le cors plus legier et fait demorer l'ome liet, et tot toutes pensees, et assouage les anguisses des amors dont maintes gens sont souspris, et fait eskiver maintes maladies ki pueent avenir ou cuer et en la cierviele par fumees ki sont detraites, ki par chou faire se puent vuidier.

[16] Et saciés ki a chou apris à faire nel doit pas del tout entrelaissier pour chou ke tel matere, quant on le retient, s'a nature de venin, si comme vous poés veoir en femes veves, et à homes et à femes de relegion, et à pucieles ki trespassent l'eure de marier, ki muerent maintes fois soudainement si com dist Hali; et en avienent maintes maladies ke nous ne vous conterons mie.

[17] Et ki ne puet dou tout tenir ces ensegnemens, il vaut mius ke on le face quant on est plain ke quant on est vuit, et vaut miels à faire quant li cors est caus ke quant il est frois, si comme Galiens commande et ensegne.