I

En honor et en bien et en gran remembrançe

Et offerant mercé, honor et celebrançe

De Celui che par nos fu feruç de la lançe

Par trer nos e nos armes de la enfernal poissançe,

5

Et de son saint apostre, qi tant oit penetançe

Por feir qe cescuns fust en veraie creançe

Que Per e Filz e Spirt sunt in une sustançe

- C'est li barons saint Jaqes de qi faç la mentanze -.

Vos voil canter e dir por rime e por sentençe

10

Tot ensi come Carles el bernage de Françe

Entrerent en Espagne, et por ponte de lançe

Conquistrent de saint Jaqes la plus mestre habitançe.

Ne laserent por storme ne por autre pesanze:

S'il n'aüsent leisié par une difirnanze

15

Que lor fist Gaenelonz, le sire de Maganze,

Coronez eüsent, n'en soiez en dotançe,

Roland, par chi l'estorie et lo canter comanze,

Li melors chevalers que legist en sianze.

Ben le vos dirai jé, s'un poi fetes sillanze.

II

20

Segnors, ceste cançons feit bon ver escouter

Par çascuns q'en bontez veult son cors amender.

Ceste feit asavoir cum hom se doit pener

D'esamplir la loy Deu et as povres aider

Et li chevalers pobres au besoing visiter,

25

Les orfanes et les veves mantenir e saucer.

Par ces vers qi ci sunt poroiz oïr conter

Cumant le bons rois Carles, il et li douçe per

Entrerent en Espagne par Rollant coroner

E le chemins l'apostre saint Jaqes recovrer.

30

En sagrament l'avoit Carlemaine au vis fer,

Mais oblïez l'avoit et n'i voloit aler.

A loi de peregrins li vient a reveler

Li bon sant il meïme, sil prist a menacer

Que, se il no li aloit, il avroit engombrer.

III

35

Or poroiz vos oïr por veritez provee

Comant dou parlamant fu fete l'assemblee

Et li sagramant feit de conquerre la stree

Que as boens peregrins stoit tolue et vehee.

Molt avoit grant mester ch'ele fust recovree:

40

Par tote gent estoit guerpie et oblïee;

Mais por le bon Rollant fu forment chalonçee.

Feragu en recuet la primere soudee,

Quant se combatirent amdos terce jornee:

La cars au Saracins, que stoit fors et faee,

45

Ampués trenza li cons decique la coree.

Savez por quoi vos ai l'estorie començee?

L'arcivesque Trepins, qi tant feri de spee,

En scrit mist de sa man l'istorie croniquee:

N'estoit bien entendue fors que da gient letree.

50

Une noit en dormand me vint en avisee

L'arcevesque meïme, cum la carte aprestee:

Comanda moi e dist, avant sa desevree,

Que por l'amor saint Jaqes fust l'estorie rimee,

Car ma arme en seroit sempres secorue et aidee.

55

Et par ce vos ai jé l'estorie comencee.

A ce qe ele soit e leüe e cantee.

IV

Sa cort tient Carlemaine a Asie - la - Capelle;

Ses barons li avoit d'iloc trosqu'en Bordelle,

Bertons e Pitaïns; gent li avoit tro belle:

60

Grant honor lor a feit li rois qe les capdelle.

El paleis fu Carlons, par delez la torelle,

Sor aute sege assis, en mains une verçelle,

Entor lui ses barons, dont i avoit a mervelle.

Un poi pense le rois, sa mains a sa maselle,

65

Pués a levez son cief, les barons en apelle.

« Segnors », dist l'inperere, « per la Virge pulcelle,

« Miracle vos dirai que Dex nos aparelle:

« Troi nuet a trapaseis que moi part in ma çelle

« Uns peregrins davant, que manace e revelle

70

« Qe je aille ostoier sor la gient de Tutelle,

« Qe ne creent Jesus e sa santisime ancelle,

« E qe trosqe saint Jaqes, qui est eu reng de Castelle,

« Je afranche son chemins e sa droite santelle.

V

« Oiez, barons », feit Carles a la barbe florie,

75

« Troi nuet l'une pres l'autre, que ne dormoie mie,

« Demonstrez m'est saint Jaqes, que fort moi contrallie

« Que je aile ostoier sor la gent Paganie,

« Si com je l'ai promis au filz sante Marie

« Et au barons saint Jaqes, cui ai ma foi plevie

80

« Que je restorerai son chemins e sa vie.

« Jel jurai soz Vïene, en mé la praerie,

« Quant de moi e Gerard fu la gere finie

« E fu la pulcelle Aude por Rollant creantie;

« Et vos lor promitistes, avant vostre partie,

85

« La corone d'Espagne, si Dés vos donast vie:

« Je demand la promise, saciez qe ne la oblie.

« E pués ne veul q'il soit ma parole mentie

« D'aler en la Galiçe: je vos en quer haïe.

« Jameis non finirai si ert la voie ravie

90

« D'aler au saint apostre que tient la Paianie.

« Mon tresor met avant et ma grant manantie;

« E je meisme i firrai de ma spee forbie

« Plus que ne fis quant je tornai en segnorie,

« Quant je fui forscacez de France por envie.

95

« Respondez li meilors; ma parole est finie ».

VI

Segnors, vos savez ben que travail e repois

Contralïent l'uns l'autre cumme triaqe e thois.

Quant l'om a reposer s'est mis del jor al mois

E qe il n'a sintiz ni afan ne sordois,

100

Quant vient al chef de l'an, se metre le vorois.

A traval de labor, grant poine li avrois.

Tot ensi la ferent e mostrerent François

Que molt les agrevast la parole le rois.

En desduit herent mis de rivere e de bois

105

E a spendre et doner et diners et hernois.

A donoier pulcelles e dames en secrois:

Enruçenés herent lor acerez corois.

Dex aing avoit pascez, ce nos conte el cronois,

Qu'il n'avoient estez en guere n'en campois.

110

Quant oirent q'il iront et al cault et al frois,

La moitez des barons mostrerent qu'il l'in pois.

Primers levant parla Galés de Vormendois,

De plus sages en cort n'avoient mie trois.

« Par foi », feit il, « seignors, il ni est mie drois

115

« Que nus sire de tere, roi ni dux ni marcois,

« Por ensogne q'il face se mete en tiel destrois

« Q'el n'en posse torner senz mervellos sordois

« E qe ses animi de lui facent gabois.

« Si Deus me dona bien et grant pas e repois,

120

« Je firai grant folie se je ne le conois.

« Mais le force au diable est si montee el dois

« Que nos firont seillir al doloros gallois.

« Qui tot veult, trestot perd, ce savez, mantes fois.

« Donc non cognoisez vos Galliciens et Speignois,

125

« E qi sunt Catallains et les Aragonois?

« Ne se lairont tolir del lor veilant un pois,

« Qe cier non soit vendus as branz Saracinois

« Tard estes avehuz d'abatre lor bofois.

« La conquise saint Jaqes, s'il sera par mon lois,

130

« Laserez sor nos filz qe veniront depois;

« E n'encargez tiel fais que voz morez del pois ».

VII

- Se Diex m'ait », fet Rollant, « qe ben parle Galés,

« Il et cescuns qi sunt d'altretel voluntés!

« Car qi dit son voloir non doit estre blasmés.

135

« Dan Galés, ge voil ben que une riens saciés,

« Que noz voz conoisomes, ne voz an corocés,

« Vos et vestres lignaje, et comant nos amés:

« L'onors vestre seignors ne amastes jamés.

« Mal ait qui vos fist duc ni de consoil privés,

140

« Quant en ses grant domaje vestre sir conseilés!

« De cui conoscez voz le bien que vos avés?

« Da Deu et da Carlons: or les en mirités!

« Ores oit bien, ce croi, .x. ou nuef anz pasez

« Q'en periloz repois et plains de vanités

145

« Et vos et tot cestor sunt estez et regnés

« Et a deseriter les pobres orfanés;

« Les criminaus pecez sunt sor vos amassés,

« Les armes et les cors de voz sunt engajés

« Au diables d'anfers: quant les rechatarés,

150

« S'a cist pont orendroit ne voz en empensés?

« Et je di et consoil qe le primer soiés

« A entrer en Espagne, ne plus mot non parlés.

« Ne voz amerai mays par vestre malvaistés:

« Mielz valt sovant taisir q'estre trop averbés.

155

« Seignors barons », dist - il, « q'estes ci asemblés,

« Remembre voz la grant desloiautés

« Qe vos a feit Marsille des le tenz trapassés,

« Qe promis a cist roi, de soz Vïene al prés,

« Fealté et homaje, et menti son hom liés,

160

« Quant Girard le mena, l'orguelos deu Fratés,

« Por confondre et destruir vos et Cristinités.

« Se vos avois vis d'omes et conosanz soiez,

« Jamés cil grant oltraje oblïer non devés.

« Par lui ne fu manqise et de sa voluntés

165

« Qe ne fusez destruz, oncis et esilés.

« Or est venuç le terme et le pont arivés

« De venger Deus et vos. Ja sui je aprestés,

« Cun .xx. ^M homes de la Glixe soudés,

« De estre primirans trestot entallentés.

[...]

X

Aprés li contes Gaines se dreça Salamon.

« Segnor », dist il, « vor dist dan Gaenellon,

« Car qi puet achever sans gerre et sans tençun

240

« Ce qe volomes querre au roi Marsiliun,

« Qe il nos devroit rendre de droit et de reison

« E mander les trebuz des trepasiez seison,

« Je ne voi ci nus home cui ne fust biax et bon.

« Mais il oblia dire et mostrer la reison

245

« Por quoi mander Marsille seroit ben en perdon:

« Il nos a tant qe rendre que nel valt Aragon.

« Et nos afermez somes qe ne lui ne nus hon

« Por forçe non tendra dou nostre un esperon.

« Se lui mandons mesajes, ne le sant si bricun

250

« Qe il n'entende bien que le desfïeron;

« Lors se poroit garnir tantost en un randon,

« Que pois ni il toresez ni castel ni dongon.

« Mais, al loer de moi, savez que nos faron?

« N'i soit plus afiaille com dau los au montun.

255

« Ci a li mois de mai et la douce seison:

« Da cist jors a troi mois le ost asenbleron,

« Le primer jors d'agust, qe la semenason

« Sera ben recolue, et nos departiron.

« Mais ne se veult la cose spoblier a nus hon,

260

« Que si tost n'ait Marsille mesaje ne spion

« Com serons in sa terre a coite d'esperon

« A ardoir le peïs, ni i remagne maison.

« Avant qu'il s'an perçoie, tiel schec lor doneron,

« Mal le savroit mender ne il ni Falsiron.

265

« E qi ne veult venir a ceste enqisiçon,

« Merci claim a Celui qi sofri passion

« Q'il en face venjance qui s'afeit a fellon.

« Qui veult venir, sun anime ara remision

« E por rendre dou bien a Rollant geerdon.

270

« Troi conquises façomes, la prime en venjason

« De Deus, le Rois cellestre, et de sa passion;

« La segunde por Carles, qe l'on doit por reison

« Mantenir ses honors, en qel part qe il son;

« La terce por cestui, che moi senble a bricon

275

« Quant il veult contrafere li filz roi Filipon:

« Il a bien le voloer, mais trop li falt li don.

« Diex! car alons por lui sor la jeste Neiron;

« Atendomes a lui nostre promission:

« Il en avra l'onor et nos l'avoir prendron.

[...]

CCCLXXXVI

De cevaucer a Noble Rollant dou tot pensa;

Pues qu'ensi dise Bernars, ja por riens non leira.

9020

A l'oriflame torne, Ogier en apella:

« Duc, tenez l'orieflor et remaniroiz ça;

« Cevaucer veul en leu o gaagne sera,

« E .v. ^c chevalers avec vos remanra. »

Le Denois, quant l'oï, par pué non forsena.

9025

« Mal dehait », feit le duc, « qui rier vos estara

« E la u Rollant veit qui nun le segira!

« Mal ait, quant sir folloie, qi non folleiera! »

Aprés ceste parole Aymier en apella

(Quens estoit de Caalluns, en lui mout se fia);

9030

L'orie ensaigne li baile, dousemant le preia:

« Remerroiz ici, frere, tant qe li roi venra.

« E n'aquisez Rollant: Diex seit qeil part el va! »

E cil seisi l'ensaigne, qe de paor trembla.

Cinque cent chevalers li Donois lui baila.

9035

Aprés ce dan Rollant son oliphant sona

Par si tras grant vertuz qe le camp tentina;

S'ansaigne feit partir; Yvolie la porta.

Li quens dist a ses homes: « Seignor, or i para

« Qi por peine sofrir honor conquier voldra;

9040

« Seüremant venez, ne vos esmaiez ça. »

Lor cevaucent a force, pues q'il le comanda.

Les doçes piers de France formant s'en esfrea;

Hestous, le duc de Lengres, Oliver regarda.

« Ja verois vos », fet il, « ou cist fols alera;

9045

« Ja verois qu'en bataille son oncles garpira

« E menra nos en leu o mai non estordra. »

Oliver respondi: « Diex seit qe divira!

« Avegne ce qe poit, que mun cors n'i faudra. »

CCCLXXXVII

Se la fusez le jor es prés soz Pampaloine,

9050

La ou li quens Rollant son oliphant retoine:

O lui cevaucerent tantes noble persone

Qe por honor conquere ont durez mainte poine;

O lour ne porterent pains ni vins ni avoine.

E Bernars treit de dos sa sclavine esclavoine

9055

E le capius de cief, dont senbloit un canoine;

Au plus tost qe il puet a vestue la broine,

L'eume s'alace, et cent le brant de Macedoine,

E monte au bon destrer qe Tiris li amoine,

Le escüer Rollant qe pués fu duc d'Ardoine.

9060

Vers Noble s'adrecerent, pres le poi de Jeroine,

Tasans et enbruncez, qe nuz mot non i soine.

Or les condue Diex et sante Madeloine

E cil buen saint par cui il sont en tiel estroine!

CCCLXXXVIII

Un pué chevaucherent François ainz la vespree

9065

E segirent l'ensaigne Rollant escarteree;

Asez i a de ceus a qi mult desagree

Laser l'anpereor en dure e fort meslee.

Par delez uns boscaje ont la plagne pasee,

Del tertre de Jeroine poierent la montee,

9070

D'autre part descendirent en la scure valee;

Par une gaste lande s'est l'ost achaminee.

Bernars bien les conduit, qe savoit la contree.

Les baruns cevalcerent, cescuns teste basee;

Ne savent en qual part soit lor voie adrecee;

9075

Li uns regardent l'autre coiemant, a celee.

« E Diex! » feit l'uns a l'autre, « cum feite desevree

« Feit Rollant de son oncle, sainte Vergen loee!

« Par lui puet encui estre tote l'ost periliee.

« Quel part alomes nos? Ou est nostre oubergee?

9080

« Ne troveromes tere ne soit deseritee. »

Al trepaser d'un'eive se fu l'ost arestee;

Avant qe tote l'ost soit d'autre part pasee,

I avroit maintes paroles dites e divisee.

CCCLXXXIX

François s'aresterent devant le guez parfunt.

9085

Hestous e dan Gerard a Oliver s'an vunt.

« Jantil duc de bon aire », ce dist Gerard le cunt,

« Tu qe des feiz Rollant seis plus d'ome dou munt,

« Di nous de ceste gient qeil part il alerunt.

« Comant avuns lasiez li rois a si greu pont? »

9090

Oliver respondi: « Nun croi qe noir ni blunt

« Sace la volanté au conte de Clermunt.

« Ne vos en sai respondre; mal feit qi m'en semunt.

- Par saint Jaqes l'apostre », Hestous ce li respont,

« Se ne sai ou cestor e moi cevalcerunt

9095

« E le conte de Blavie le voir non m'an respont,

« Hestous non li venra, si Jesus bien me dunt.

« E qi an fara autre, soit pendus contremunt! »

Adunc broce Olivers le destrés de Çaumunt,

Rollant prent, si le treit soz un aubre reont;

9100

Ja oirois le parler qe l'uns l'autre ferunt.

CCCXC

« Rollant, mon frans seignor », feit Oliver le saje,

« Par Diex pardonez moi se je disis outraje;

« Ne dirai mais qe bien e nen l'ai an coraje,

« Ains amai ton honor an trestoz mon aage.

9105

« Le partir qe vos feites resenble mout savage

« A cestor q'amenez, e laser l'anperage:

« Encui poroit le rois perdre par cist follage.

« Se vos n'estes partiz par trop grant avantage,

« Dites moi ou alez, et manduns un mesage

9110

« E feisuns asentir Carluns de cist viage,

« Car soz ceste qeisons poroit nostre avoaige

« Avoir, il e ses homes, an cist jors grant daumage.

« Je ne teing a prodome le preus quant il arage,

« E quant sages folloie, doplez est son follage.

9115

« Sir, di moi, s'il puet estre, qu'is nostre gionage,

« Queil part nos amenrais, ou feruns albergage. »

Dunc l'a gardez li quens tres par mi le visage;

Respondi lui parole dunt oit ire et ontage.

CCCXCI

« Sire Oliver », dist Rollant le marqis,

9120

« Par riens qe me disoies non seroges ahis.

« An breu vos respondrai dunt vos m'avois reqis:

« Ne fust par avantaje q'avrai sor mes nemis,

« Si com je croi avoire, nen seroie partis

« Ne n'avroie mun oncle a bataille garpis,

9125

« Car plus l'aim de coraje d'ome dou siegle vis.

« Vencuz a l'anperere les cuvers maleïs;

« Par le partir de nos ja nun sera maumis.

« Je vos menrai an leu, croi el saint Esperis,

« Qe nus non tornera ne pobres ne mendis.

9130

- Sire », dist Oliver, « qeil sera cist peïs? »

Rollant lui respondi: « De ce seez toz fis,

« Qe je nel vos diroie por un quart de Paris,

« Ne a vos ne a nus autres: jurez l'ai et plevis;

« E se dir le devoie a nul, ne blans ne gris,

9135

« Sil savroit Oliver, li cosins Aymiris.

- Sire » ce dist le duc, « vos m'aveiz tot aquis;

« Je ne veul plus savoir cum estes talentis.

« Se grevez vos en ai, si m'en claim repantis. »

Dou cont se part, si est ariere revertis.

9140

Hestos en vient a lui, Gerart et Anseïs.

« Avois », feit les barons, « de cist aler reqis?

- Oïl », dist Oliver, « mais rien n'en m'a geïs.

« Mais qe cescuns soit preus, corajos et ardiz,

« Con cils qi vont traver lor mortels enemis. »

CCCXCII

9145

Dist Hestous: « Foi qe doi au ber saint Nicolai,

« Je sui bien uns de ceus qe plain pié non movrai

« Por aler a morir en leu o je nun sai;

« Si ai feit grant folie quant mon seignor leisai,

« E sui dou tot certan penetence n'avrai. »

9150

Quant Rollant l'a oïz, si dist: « Je obliai,

« Sire coisins Hestous, quant dou camp me sevrai,

« Qe nus choars ne vos ansenble o moi menai;

« Par pué que je ne di qe nun acheverai

« Bien de cestui viage quant avec moi vos trai.

9155

« Car tornez vos ariere; si non ferois arai.

« Je pri vos e les autres qi sunt an tiel esmai

« Qe retornez ariere; bon griez vos en savrai.

« Si Diex ploit, le mainant sains vos esploiterai;

« E, se folie faiz, encor amenderai.

9160

« Il feit asez grant pieçe qe coneü vos ai.

- Sire », ce dit Hestous, « de tot ton dit m'apai;

« Bien sai qe sui ceitis, autre tieche non ai.

« Mais de cil pué qe puis jamais non te faudrai;

« Autre verais de moi avant le mois de mai.

9165

« Cevauce pur avaint, qe bien te segirai;

« Mout m'ais bien segondié a soner de mon lai. »

CCCXCIII

Le baruns a grant piece sunt entr'eus ranpoignés,

Mais Hestous repantis se clama de son griés;

Gerars et Olivers andeus les ont sevrés.

9170

E Bernars feit paser nos François d'autre lés;

Quant il furent tut outre, si sunt achaminés.

Le jor fu mult oscur et le ciel anublés;

Un petit pluvina; auquant en sont moilés.

Une riens lor vaili, q'il troverent un prés

9175

O il cevaucerent ensamble tut serez:

Ce fu lor gran defanse al plovoir, çe saciés.

De ceus vos canterai c'au camp furent remés,

Qu'encaucerent Paiens come lous enavrés;

Detrençent pié et poing et spaules et costés.

9180

Carles au primer chef, cum hom entalentés,

Le brant tient en son poing, roge et ensanglentés;

Ou Saracins fusent a la cité entrés,

Quant un Thiois escrie: « Tut sumes engignés.

« Ariere! arier! » fet il, « frans chevalers prisés.

9185

« Con sa gient est Rollant departiz et anblez;

« Vers Françe s'an repaire, si nos a renogés. »

François, quant l'oïrent, si an sunt effraés;

Li uns le dist a l'autre; es les vos arestés;

E bien en petit d'ore fu l'encaucier lasés.

CCCCXXIII

La bataile fu grant qe Rollant lor dona.

Devant ou chief dou pont le baron s'aresta,

Les escus a quartier devant son vis torna,

9780

E Paiens maintes lances e maint darz li lança,

En plus de douçes part son escu li estroa

E maint autres prodomes dejoste lui navra.

Quant or voit le niés Carles por force n'i entrera,

Il an jura Celui q'en la Vergen s'aonbra

9785

S'a force les puet prandre, nulle merci n'avra

E la mort son baron Bernars chier lor vendra.

En autre gise dist qe dedenz entrera:

El a guenchi la reine e l'oliphant sona,

Pués a dit a ses homes: « Chevauchiez por deça. »

9790

E il ensi ferent, pués q'il le comanda;

L'ensaigne segirent qeil part il l'en porta;

La citez costoierent, qe nus nes engonbra,

E vinrent a la porte por ont Hestous entra;

L'entree demanderent, e cels la lor dona.

9795

Quant il furent tut denz, « Saint Jaqes! » s'escria.

CCCCXXIV

Joianz est le niez Carles quant en la citez fu,

Damediex en mercie et saint Jaques son dru.

Lez le mur de la ville ont li paset mohu;

Deciqe a porte Lice n'ont los frains retenu,

9800

La u il avoient par defors combatu;

La porte ont tollue e les Paiens prendu;

Por ce q'il avoient l'entree defendu

E le proz Bernars mort, sis a Rollant pendu:

Pués a garnie la porte de quatre vint eschu.

9805

Pués en vont vers la place a force et a vertu,

Escriant « Chevalers saint Jaqes! » a un hu.

Le sires de la ville apellent, Gilaru;

Asiez fu il proz d'armes, neporquant stoit cenu.

Droit a la prime noise estoit a fer vestu,

9810

D'escuz e blans obers, d'espee et d'eume agu,

E seili sor la place sor son destrer crenu;

Son confenuns desploie, ovrez d'un chier bofu,

E l'ensaigne Marsille, un draguns d'or batu,

Feit porter sor la tor a le nom Belçebu,

9815

Pués a dit a ses homes: « Les Diés nos ont vendu.

« Desgarniz sui de gient, et les Frans sont venu.

« Se perdomes la ville, par ceschuns soit seü

« Ne nos remaniront le chief desor le bu,

« Car trop avons François deci arier ofendu.

9820

« Mantenons nos ici as branz d'acier molu,

« Car fortisme est la place, si somes mil e plu.

« Tote fois vient le pouple por torner a salu. »

Aprés ceste parole respondi Dardanu.

CCCCXXV

Dardanus fu de Noble seneschaus son seignor;

9825

De bon consoil doner estoit maistre dotor.

Le prince de la ville apella por amor:

« Gilares, gentil sire, ne fu pais le meilor

« Quant envoias tes homes Mauçaris l'Aumansor

« E desgarnis ta tere por esforcier la lor;

9830

« Se bataille avront fete enver l'enpereor,

« Deu place qe ta gient non aient le peior.

« Retorner devoient encui anz l'escuror;

« S'il encui arivent, je di bien qe cestor

« Avront feit chavauchie de grandisme follor.

9835

« Tot quant qe il ont feit encui aprés l'aubor

« Ne pris je dos diners, car ne feront retor

« Senz merveilose perte: j'en sui profeteor.

« Car divise tes homes desor cist carefor;

« Devers porte Paris, dunt insirent pastor,

9840

« Prendrai ci prés la vie au treit d'un arceor;

« Entre al palés tes fils el tanple Veneor

« Ferai barer l'estree de grant travaus d'albor,

« E par deça dariere serunt li arceor.

« Ne dotez par dela e ne aiez paor;

9845

« Devisez les trois strees: car la quarte a soudor.

CCCCXXVI

« Sire », dist Dardanus, « hastez vos, si mandez

« Par devers porte Lice a garder Felidés

« O troi cent chevalers, estier les pié - armés. »

Gilares lor comande, es les vos aprestés;

9850

Par une large rue, o mout oit de palés,

Chevaucherent ensanble, toz rangié et serés,

E les borjois da pié lor vient d'anbesdeus lés,

A lances et a guivres et a dars enpenés.

De la place se sunt dui arpant eslongnés

9855

E verent les François venir tot arengés,

Les ensaignes Rollant, de palie escarterés,

Contre vent baloier, dont mout sont effraés.

Ou la vie est plus stroite e l'entrier plus serés,

Traverserent caretes e grant toniaus cerclés

9860

E par derier les ont de grant traviaus barés.

Asez lor ont François crïé; treit et lancés;

Mais d'arbalestres groses orent Paiens asés,

Nes leisent aprocer, ploisors en ont plaiés.

La oit un grant estor, fiers et desmesurés;

9865

François lor lancerent lor esplié acerés.

Outre lor forterece, ou plus sont amasés,

Felidés les a mout tenuz et confortés.

Les dames et les enfanz de .xiiii. ans pasés

Furent sor ces maisons, dunt les hus sont fermés:

9870

A grant pieres poignaus ont François domajés

Si qe por vive force sont arier regités.

CCCCXXIX

Or voit bien le niés Carles, quant voit Paiens defendre,

Qe sains orible perde ne puit la ville prendre.

Oliver se combat a la rue plus mendre

9915

Vers la gient Dardanus, qe bien les font rependre,

E d'une part et d'autre, au partir dou contendre,

Avront asiez plaiés qe donier e qe spendre.

A prandre une citiez, tesmoign vos an puis rendre,

Jusquez au tens Cesaire et dou magne Alexandre,

9920

Ne oïstes lancier tant darz ni ars destendre.

« Cil Diex », dist Oliver, « citez, te puse ofendre

« Qi dou saint Paradis fist Lucibel descendre! »

CCCCXXX

Mout par fu traveilos le frans quens Oliver

A prendre la citez dun stoit en disirier,

9925

Mais trou cruaus reveus trova a l'encontrer

Par devant la fort barre de treir et de lancier.

De Gerarz e d'Astous vos puis je bien contier:

Volantier venisent da lor part asauter,

Si fesist d'autre part le bon Denois Ogier,

9930

Mais ne porent lor gient retinir de rober,

Si en fist Hestous pandre dous, par mielz castoier.

Qe caut? Qar covotus herent dou gaagner,

Tant par estoit la ville rice, n'en stoit parler,

De rices drais de pailes, d'or, d'argient, de diner,

9935

Par nul fuer nes porent tenir ne arester,

Si en furent mort, ce cuit, pres le terç d'un miler

Parmi celes meisons de Paian et d'Ascler

E de fainz et de fames, a gros espli d'acier.

Novelles en vinrent dam Rollant le gerer;

9940

Par ceschune des host fist da sa part crïer

Se nus plus i robast e le poroit bailer

Maintenant le feroit apendre e desmembrer.

Lor poüst hom veoir maint hernois destorser;

Paor e grant amor lor fist tot ce laser

9945

Come gient q'amoient lor seignor droiturer.

CCCCXXXI

Cristïens atendirent au bien combatre humeis;

Paiens se defendirent a buen darz Espaneis,

De guivres et de fausars lor trarent demaneis.

Grant maus lor fasoient les dames des borgeis,

9950

Qe geitent grant perons aval de ces paleis;

Lor portes ont bien closes, poi dotent nos François.

Mais Rollant fist descendre da trente a trente trois

De sa gient des chevaus e tolir feu greçeis;

A caschune maisons venirent a esleis

9955

E manacent as dames, se ne steront en peis

E ne se rendent tost au cont palatinois,

Homes, enfanz e dame ardront sanz nul defeis;

Ne perdront ja dou lor valant un jeneveis,

Ainz lor donra dou suen plus q'il n'ont qatre fois.

9960

E se qe non, entriez sunt en mau meis.

CCCCXXXII

Quant orent entendue Saracins la franchise

Qe de part le niés Carles lor ert fete e promise

E verent qe la ville lor stoit tolue et prise,

Ne ja n'avoient porte par ont il fors s'en ise,

9965

Verent de feu greçois mainte lumiere aprise,

Paor orent Paiens de morir en tiel gise.

Por treir heus et lor fames de mort a garentise,

A Rollant se rendirent, n'i oit autre divise.

E li quens an jura Jesu et saint Donise

9970

N'i a nul de sa gient, se par sa convotise

Lor tolisent dou lor valant une cemise,

Q'il ne perde la teste, si fust fiuz de marchise.

En une grant meisons d'une sale perise

Orent de part li quens tote celle gient mise.

9975

Pués qe celle gient fu par tiel maniere aqise,

Li jantil quens Rollant, qe largece jostise,

La bataile comance e la grant asalise,

E da toz quatres part les barons s'en atise.

Adunc fu nostre gient en si grant orguel mise

9980

D'ardimant, de proece, sainz nulle coardise.

Ce feit large seignor, sainz autre maiestrise,

Ne mais ne sanplira seignor por avarise.

CCCCXXXIII

Li soudoier Rollant monstrerent bien le jor

Qe douz et largie e sinple avoient a seignor;

9985

En poverté jamais n'ama son servior,

Ainz en hosta cascuns, pur q'il fust de valor.

E cil bien aparuet a Nobles por s'amor,

Qe da quatres parties rendirent tiel hestor

Qe le maigne Alexandre, a cui parla l'aubor,

9990

A la cité de Tir nel dona mais greignor.

Par mi celes maisons poierent al desor

A giter darz e pires e n'oncirent ploisor.

Mais Paiens se defendrent par la mortiel peor;

Maintes foiz rehuserent e maintes font retor.

9995

E Diex! quant les conforte Gilares l'Almansor:

.v. ensaignes de feu feit monstrer sor la tor

Par ce que nuble estoit le jor et tenebror;

Les verent dou païs les castellans meilor.

Le uns l'envoie l'autre, e s'arment a furor

10000

Par aider la cité dont il sunt en heror;

Mais trop ferunt, ce cuet, a besoigne demor,

Car Hestous desandi sor un treis de verdor,

A Gerarz comanda l'ensaigne de color,

De sa gient feit desandre troi cent des milsoudor,

10005

Cerchier feit les meisons environ et entor,

La paile e le torqier feit portier sainz demor;

Cent homes s'en cargerent, ce tesmoigne l'autor.

CCCCXXXIV

Or veut li quens Hestous dou tot entrevenir,

Si fera Saracins d'ileque departir,

10010

Par fu les caçara, nel poront sotinir.

Qui donc oit long escu e large por covrir,

Si les a feit portier et tos devant bailir

E des hus des meisons a feit bien .xx. tolir;

Coverz pasent avant nos François por haïr,

10015

Par davant lor forteces vont Paiens asalir,

Lancerent splié et darz, maint en ferent morir.

Iluec ne se porent Saracins sostenir:

Tot droit enver lor place se mestrent a fuïr;

E quant le ber Hestous voit la vie gerpir,

10020

Lor bares feit de paille et de fain raenplir;

Le feu mestrent aprés. Lor veïsez broisir,

Ardoir traus et toniaus sainz autre contredir;

E Paiens n'avoient d'eve point ne leisir

Dont le feu poüsent estaigner ne fornir

10025

Ce q'il avoit a feire enfracique al complir;

La calor nes leisent aprocier ni venir.

Hestous monte a ceval, a Rollant mande dir

E Ogier le Denois, q'a paine put sofrir,

Q'il ne se deüsent de noient afeblir,

10030

Car ja verunt la place dou Paiens desgarnir.

Quant les barons l'oïrent, n'orent qe esjoïr,

Mais ampués ne savoient com ce puse avenir.

CCCCXXXV

Mout fu li quens Rollant lié e joians e baut

Quant Hestous li envoie novelles qe li caut.

10035

Lor bondist l'olifanz, reforcier fist l'asaut.

Quant la flanbe dou feu vient a meins e le caut,

Estous sist el varon qe fu noriz el gaut,

Qe plus cort de randons ne descent faucons d'aut;

Ses chevaler montent, n'i a un seul rebaut,

10040

Plus desirent bataile, se Damediex me saut,

Ne feit baçalier dame basier soz son blïaut.

Or saçent cels de Noble que paine ne lor faut;

[...]

CCCCXXXVII

10080

Seignor, dou tot avoient nos Cristïens vencus,

Mais de tote autre part sont Saracins meüs:

A ce que cil entrier ne fust dou tot perdus,

Guerpirent toz les autres, dont furent deceüs,

Car de la gient Rollant sunt a pié desandus,

10085

Quant li quens lor escrie: « Traiez vos tot en sus;

« Reüsier voi mes homes, dont li cuer ai confus. »

Adonc se fist le seing ou Diex fu suspendus;

Ja fera il tiel couse qe droit au tems Febus

Seroit grant inmpossible e miracle tenus.

CCCCXXXVIII

10090

Devant trestoz les homes armez sor Velantis

Esperone Rollant, le pier des enpovris;

Un roit esplié paumoie a un penuncials de lis;

Par tiel randons le porte le destrer Arabis

C'a celor que le garde tres bien li est avis

10095

Qe ainz q'el le retaigne n'en soit amanoïs

Ferra dedanz lor bare et del col et del pis.

E quant il en fu prés, si a le frain repris,

Tiel saut fist le destrer, dont maint crous oit en vis,

Une toise et dimie d'aut e piez trente sis

10100

De long outreseili le buen Amoravis:

Ancor i a le terme de trois perons massis.

Quant il fu d'autre part, si a gitez un cris,

Diex el barons saint Jaques andeus a beneïs.

Paiens verent tiel saut, si en furent esbaïs;

10105

Gillares esperone, le pas a contredis,

E veit ferir li quens, dont fist qe asotis,

Sa lance li peçoie en l'escuz a vernis

E li quens lui trença l'iscu e l'obers terlis,

La carne et l'os li trance e tot li cor neïs.

10110

L'arme dolant s'en part, lou cors enpaloïs,

Qe davant a Minos fu portee en judis;

Le destrer regimba dejoste un degrez bis.

Sire Diex! quantes lances, ai! dame Genetris!

En fiautre e sor mains furent sovre au marquis!

10115

L'escuz li ont cassez en .v. leu o en sis;

Mais tant oit bones armes, par voir le vos devis

Qe colp de cels ni d'autres redota mout petis.

CCCCXXXIX

Les petit pensonciaus en estez por calor

A .c. et a .ccc. s'asenblent entre lor,

10120

E quant l'on li li giete o pains o autre sor,

Entr'aus se deronpent e fuient por paor;

Quant l'on en son estant en rier a feit retor,

Por ferir sor le pain s'arengent tot entor,

Le petit i fert bien, asez plus le greignor:

10125

Tot ensi sor li quens, d'orfnes avohieor,

S'asenblerent Paiens quant mort fu lor seignor;

Qi fiert de darz, qi d'ace, qi de mace fortor.

Mais si com le mastins qi est de grant valor,

Quant les scerp l'aastent en stree alïenor,

10130

O q'il veult si les chaçe soul mostrant ses retor:

Ensi con Durendart et as cous senz amor

Les cace onciant li niés l'anpereor.

L'arcivesque Trepins desant deu milsoudor,

E plus de mil des autres d'entre grant e menor;

10135

L'estree ont desbaree, pués montent sens demor,

Escriant « Chevaler saint Jaqes! » a une hor.

[...]

CCCCXLIV

10220

Filidés descendi au palés principal;

Por garentir sa vie a garpis son cheval.

Cels qe porent fuïr dou doloros estal

Se mestrent el palés enz el mestre portal;

Mais bien dit e tesmoigne l'estorie cronical

10225

Qe cinque cent en fu al dereans jornal

Qe furent en la place enversez contreval.

Al fuïr en la porte dou palés gineral,

François et Alemans, Bertons e Provençal

I entrerent bien .l. soudoier natural,

10230

S'i entra Engeler, un des doçes loial.

Desor la porte avoit un trop anple toral

E une porte paine qe descent por aval;

Aval la leiscent core cele gient criminal.

Cels q'entrez li herent aurent fier batistal,

10235

Tut .l. furent retenus par engal.

CCCCXLV

Pris furent li .l. o li quens Hengeler;

Paiens nes ouserent oncir ne domajer,

Tant dotent cels defors qe bien feit a douter;

Tolus lor ont les armes, ses ferent bien garder.

10240

Cels qi herent la enz vont as crinias monter.

Mout fu fort le palés, ne feit a demander.

S'il heüsent da treire leianz et qe mangier,

Ne l'eüsent, ce cuit, rendus d'un mois enter.

Mais, si come celui qe se voit presoner

10245

E qe ne puet ensir fors por merci clamer,

Conseilerent entr'aus de lor vie eslonger.

« Seignor », dist Filidés, « par Diex vos voit proier,

« Ne vos caille a morir, se porois escamper.

« Qe legist tot les feit q'ainc fu de ci arier

10250

« De defandre citez, nos devroient loer

« Tant com por bien defandre tres qu'al pont dreoner.

« Soz ciel n'a hom qu'a droit nos in puise blasmer;

« Encor de nostres ovres canteront menestrer.

« Mais ne peomes plus cist grant fais endurer:

10255

« Entrevenuns de peis, sanz plus de resploiter. »

Les autres responderent: « Tot si soit volanter;

« Al retreitier de peis, soiez nostre avoher,

« Salves avoer et vies et enfanz e moilier. »

CCCCXLVI

As .l. prisons vient Filidés corant,

10260

Demanda lor le queil estoit le plus meinant.

Adonc ferent drecier Engelier en estant:

« Sire, cel est des .xii. qe tot vont conquerant,

« Qe Carles outroia au filz Miles d'Anglant. »

Filidés se mervoile et respondi: « Comant?

10265

Venistes vos ça outre por le conduit Rollant?

- Oïl vor, sire, et por un drugemant.

- Par Machon », dist le Turc, « bien venistes a grant;

« S'aviomes heüz ci nostre garnimant,

« Mal i fusez venus, s'estïez quatre tant.

10270

« Mais pués qe del tot somes de la ville perdant,

« Faites nos peis avoir par itiel convenant:

« Salves avoir et vies et fames et enfant,

« Le fort palés rendromes dont or somes tenant.

- Segnor », dist Engeler, « il n'en sera noiant:

10275

« Se tut non garpissés Machon e Trivigant

« E croire Jesu Crist, le roi dou firmament,

« Morir vos feront tot, jel sai. Mais neporquant

« O vos venra je bien a cestui parlemant

« E si vos en serai a mon peoir aidant »

10280

« E de torner arier vos en faz sagramant.

- Seignor », dist Filidés, « ja plus ne vos demant. »

Le Paiens se desarme de tot mais qe dou brant;

Desfermer feit la porte, Engeler mist avant.

CCCCXLVII

Entre Engeler le cont et l'ardiz Filidés

10285

Paserent anbesdeus la porte dou palés;

Cels bien la fermerent qe remanent aprés.

Frans laserent l'asaut quant les ont avisés;

Rollant vit son baron, s'en fu joians e lés,

François a derumpuz, si les a debrisés,

10290

Contre lor est venus e li dist: « Bien venés.

« Ja vos en unt mandé Saracins desarmés;

« Par le mien esciant, chier sera comparés.

- Sire », dist Engelier, « ançois sui envoiés

« De part celor la sus; cel est lor avohés.

10295

« Merci mandent a querre, se vos la lor deignés;

« Sol que lor e lor gient de la mort resploités,

« Dou palés vos rendront la maestre fermetés. »

Felidés li dist: « Sire, il vos dist verités.

- Volantier », dist Rollant, « tot an sui aprestés:

10300

« Mais seul qe soiez tut batiçés e lavés

« E qe Diex et Jesu et sa mere aorés,

« Pier et Filz et sant Spirt en une Trinités,

« Tot primerans serois de vie asegurés

« E ne perdrois dou vestre valisans dos diners,

10305

« Ainz vos sera l'avoir et l'onor redoblés.

« Bon segnor vos ai ja doné et restorés.

« Mon compaing Oliver, sir duc, avant venés:

« La citez vos otroi, si an serois casés;

« De la ville e des homes a vos ploisir ferés. »

10310

Oliver descendi dou cheval de son grés,

Merci li en va rendre, beiser li volt li pés;

Mais li quens le retient, qe li dist: « Sus estés.

CCCCXLVIII

Sire », dist Oliver, « par vestre cortoisie

« La citez me donez, si ne la refus mie;

10315

« Mon ploisir en ferai, se nus nel contrelie. »

Felidés en apelle devant la baronie: