Laisse 1

Sor tot les autres fu de major renon.

Bovo no le querì ni merçé ni perdon:

Ver lui s'en voit cosi fer cun lion,

E ten Clarença, chi à a or li pon,

5

Qe li donò Druxiana a·l çevo blon.

Gran colpo fer desor son elmo enson,

Qe flor e pere n'abatì a foson.

La spea torna qe ferì en canton,

De l'aubergo trença davanti li giron;

10

Le brando desis sovra li aragon,

Le çevo li trençe, quel caì a·l sablon.

E Bovo escrie, "Munçoja sunon!

Ai, fel traites de mala legion,

Questo fino donè anbi de Gujon!"

15

Celu d'Antone, qe tenpo fo prodon,

E Teris fer un altro ses conpagnon;

Morto l'abate, sença nosa e tencon.

Bovo le vi, si le mis por rason:

"Bel dolçe frere, no·l tenez a perdon;

20

E mo e nos, se bon soldi me denon,

Nu seremo freri e conpagnon."

Li cento soldaer ferì tot a bandon;

Çascun abate li so a·l sablon.

Grande fu la bataile defora li dojon;

25

E li so çivaler son venu a Duon

E si le fa monter sovra li aragon.

E quando Dodo fu monté en arçon,

Elo dist a sa jent, "Lì retornarè non."

Sorvenu ert una grant legion;

30

Uno trovi qe porta li on.

Deo li maldie qe sofrì pasion!

"Tel colpo me donò sor mon elme enson,

Fendu m'averon trosqu'a. 3 lines missing

Qi me donast tot li or de·l mon, (37)

35

Un altro colpo... desor li giron

Si me resenbla eser un garçon."

Lor se partent e lasent la tençon, (40)

E lasent de morti plus de cento on

Qe mais non verent li dojon;

40

Si delasò tende e pavilon.

Rubric 1

Coment Do de Magança retorne / a'Ntone cun soa jent.

Laisse 2

Do de Magançe fu retorné arer

E lasa ato... er (45)

.. .facer... siter

... çivaler

45

Ven a'Ntone, entra sens entarder,

E quando fu dedens, prist Deo a'orer,

Qi li oit delivré da cele soldaer: (50)

El g'era vis qe il le fust darer.

Dama Blionda le prist a derasner:

50

"Avez preso li çastel de·l malfer?"

"Dama, "fait il, "No me fai enraçer!

A li castel ai eu engonbler, (55)

Qe in ma vie ne deverò oblier

Venu lì sont, no è li soldaer.

55

Un est perigoloso e fer;

S'ele no fust... l projer

Le parenti faites da (60)

Qe poit ver...

Fendu m'averoit tros li baudrer

60

.... li uno dona fo França e Baiver

Un altro colpo ne li averoie..."

Dist la dama, "Deo ne poso gracier,

... vos ç... (65)

Qe de...

65

Un...

Fost...

Quando...

Et a (70)

France li [24 lines missing here]

70

XX. milia son arma, tot a destrer,

E altretant furent li peoner;

Segurament poent çivalçer.

Synibaldo no à cent da l'incontrer,

Ma la merçé de Deo e de·l bon soldaer (75)

75

Le farà si malament retornar arer

Q'elo no atenderà lo fiolo lo per.

Rubric 2

Coment Do fi bandire oste / E vene a san Simon.

Laisse 3

Dodo çivalçe cun soa oste grant,

Por li çamin i s'en vont erant,

Tantq'i furent a san Symon d'Ariant. (80)

80

E si le venent una doman por tanp

Bovo era levé a l'aube aparisant,

E reguardò fora por me li canp.

Vi loçe tendere e pavilon tirant;

Quela grant oste elo vi lì davant. (85)

85

Quando la vi no se smaiò niant,

Q'el vi Synibaldo si li dist en ojant:

"Porqe me donés vos vestre soldo,

A moi e a quisti altri qe vos sirve pro besant?

E no son soldaer por star seré çadant; (90)

90

Anci son soldaer por aler a li canp.

Ne no son preste ni çapelant,

Qi de soldo serve, mete sa vita por niant!

Fà·me avrir la porte alo demantenant,

Colsa como no, li çoncé vos demant."(95)

95

Synibaldo li responde, "Bel fils, or m'entant;

Tu po ben fora ensir a salvamant.

Gran perigolo est aler contra cotant

Sor un de nos i sont plus de çant."

E dist Bovo, "de ço son plu çojant;

100

... por en mi canp

... d·i Persant

... e sarçant

... c'a li Deo comant

... n li sant

105

... con tradimant

... te farò li to comant

... tosto et isnelemant."

... monta en auferant

... armarent tre çant

110

... si ne fu molto çojant

... ent amuniscant

... u ten dos mile a taant

... uer colpo davant

... alirò por li canp

115

a le en avant

... or nen vos doté niant;

Qe anchoi seron toti riche e manant.

E se vos me verés aler malemant,

Qe ço caist de sella en avant,

120

E qe de bataile eo fuse recreant,

E fose pris da cele male jant,

Segurament nen vos tardés niant.

Vu averés retorner a guarant

En le çastel a vestre salvamant.

125

Ne vos so altro dir; a Jesu vos comant,

Qe naque de Marie là jos en Beniant."

E qui li respondent, "Non parlez pluss avant;

Nu vos tenon por sire e por guarant,

Ne vos faliron por le menbres perdant."

130

La porte fu averté e li ponte atant;

E Bovo ese defors con cele poche çant

E por amor de Bovo, Teris ensì ensemant.

E Bovo si fo pro, si le fi saçamant;

Avantiqe qui de l'oste montese en auferant,

135

Ne aust preso arme ni guarnimant.

Bovo si li asalì si vigorosamant

Cum fait le lion quant soa caça prant.

Qui de l'oste stava seguremant,

De qui dedens ne se dotava niant.

140

Nen cuitoit mie par nesun convenant

Qe cellé dedens fust gent tant

Qe avec lor i venise a·l canp,

Ne qe casu fose defors a li torniamant.

E Bove li asalì mantenent destant,

145

E morti n'abatì tanti e de sanglant

Qe cuverta n'era la verde erba de·l canp.

L'oste si fu scremie e darer e davant;

Çascun prende arme, monta en auferant.

Lor se començe la bataile si grant,

150

Qe Ideo tonast: non olderia hon vivant.

Rubric 3

Coment Bovo con ses cunpagnon si s'en voent

En la bataile, e con Do de Magançe se ferì con Bovo.

Laisse 4

Do de Magançe fo en cival monté,

E tota sa jent avec lui aroté;

Lora verisi començer gran meslé.

Bovo va pur davanti, li soldaer va dre;

155

E li prode Teris, tuta or a son costé,

Quant le aste son frate, mete man a le spe.

Cu il consegue, son morti e delivré.

En Do de Magançe Bovo se fu encontré;

Do le ferì de un dardo amolé.

160

Grant colpo li donè, si le oit li scu frapé;

Tota la tarça fendu en do mité.

L'auberg fo roto, da mort li oit tansé;

La spea fu fraita, li troncon vola a·l pié.

Bovo par lui non fu d'arçon plojé,

165

E Bovo fer lui cum li brant amolé.

Nen fust qe Dodo se çitò a li pre,

Fendu l'averoit jusqua no de·l baudré.

Ma noportant, tosto fo redriçé

Monta a çival, si oit trata la spe,

170

E ferì Bovo desor l'eume çemé.

E quel fo bon, non trença una deré;

La spea torne, ne l'oit ren dalmacé.

Adoncha verisi començar gran meslé:

Teris e Bovo sonto molto aprisé.

175

Cu i consegue, ont morti çité.

Bovo va avanti, e Teris va dre,

Ma la çent de Dodo sento si enforçé

Qe nostri çivaler ont reduti aré,

Plus d'una arçée ver li çastel torné.

180

Quando Bovo li vi, oit un cri çité,

"Arestés vos, me çivaler prisé,

Aprés de moi venés tot aroté!"

E cil le font volunter e de gre,

Ne le fo nul qe fust desghiré.

185

E Bovo guardò fora por la caré,

E si vi Dodo da li altri delunçé.

A gran mervele el fo ben armé,

E son cor fu molto ben açesmé.

Bovo oit Teris queri e demandé,

190

"Qi est quel, qi mena tel ferté,

Ses armes a bicor pituré?

Sor tot les autres, el par eser doté.

Est el cont, o grant amiré?

Gran colpo me donò de sa spe."

195

Dist Teris, "Sire est de la contré,

Et è colu qe à l'oste ça mené;

Do de Magançe el est apelé.

Elo oncis men segnor, donde fi gran peçé,

E un son filz oit desarité;

200

Petit enfant, Bovo era apelé.

Por una feme, qe in malor fu né,

Fo quel tradimento fato et ordené;

E qi de lui en fust delivré,

Q'el fose morto oncis e detrençé.

205

Nen dotaresemo li altri una poma poré;

Par lui avemo guera, e d'inverno e d'esté."

E dist Bovo, "Eo le conoso asé.

Quando da moi el serà desevré,

El porà ben loldar Damenedé.

210

Doncha est il cil qe fe quel gran peçé,

Contra quel dux qe fu si engané!"

Bovo oit pris una lança feré,

Qe un de sa gent li avoit presenté.

Bovo prist la lançe a li fer amolé,

215

Davant da soi oit la tarça çité;

E punçe Rondel de li speron doré

E va a ferir Dodo sor la tarça doré.

Le scu li speçe, l'auberg li oit falsé;

Ne li valse la bruine un diner moené.

220

Entro li flanco oit li dardo fiçé,

Siq'elo l'oit durament ennavré.

O voja o no, l'oit abatu a·l pre,

E questo fu voluntà de Dé,

Qe se l'aust plu de·l canpo pié

225

Por me li cors fu li dardo alé;

E s'el fust alore mort e delivré

Nen fust l'ovre cosi ben alé.

Como il alò si cum vos e·l dirè,

Et en tal mo fo presa la çité

230

Qe non seria en tota quela ste.

E Bovo trapase fora, por me li pre;

El cre q'el sia morto, e son pere vençé;

E Dodo stava reverso i·me li pre,

E quando se ne fu desevré,

235

Sa jent li ven sovra, si l'oit suso levé.

Quando vivo le trovent, si n'oit Deo aoré;

I descenderent, si l'ont reconforté.

A çival li tornent, e si l'ont via mené.

Da cele ora en avanti, si remis la meslé;

240

E por quel colpo fo l'oste sbaraté.

Ne se ge ferì plus de lança ni de spe,

Ni tuto mejo po, fuçe ver la cité,

Non atendoit li fiolo li pe.

Quelo davanti era çojant e lé;

245

Nen voroit eser por l'or d'una cité

Eser darer atrové.

E Bovo oit cun li brant açaré

Alé darer, donando gran colé,

E avec lui, Teris cun li soldaé.

250

La merçé de Deo, la vora majesté,

Bovo oit la proja guaagné.

A ses conpagni l'oit partia e delivré;

Grant fu la çoja qe qui ont mené:

Çascun oit plu roba qe ne oit demandé,

255

Donde furent richament ostalé.

En le çastel i furent retorné,

A salvamento tuti çojant e lé,

E Synibaldo li fo encontra alé,

E tot li altri qe in le çastel era torné.

260

Si ont çoja, or non m'en demandé,

Quando... da cile ost è delivré.

Rubric 4

Coment Bovo fo in lo castel Siginbaldo

E con la mulier Synibaldo gardoit Bovo.

Laisse 5

En le çastel s'en retornò Bovon;

A salvamento conduse ses baron,

E Sinibaldo cun tot ses conpagnon.

265

Ne le remist veilardo ni garçon;

Asa ont guaagné robe e pavilon,

Çival et armes, or coito e macon.

De quela robe oit a si gran foson,

Qe plus non demandent per nule cason.

270

Synibaldo oit una muler de gran renon,

E pro e saça e Oria oit non,

Qe bailì Bovo quando fu petit garcon,

E si le alatò cun fust ses façon,

E plus l'amava de tot ren de·l mon;

275

E si fasoit li son per Gujon.

E quant fu morto, qe fu pris li garçon,

De lu avoit si gran conpasion

Major ne la poroit avoir en tot li mon.

E cesta dame qe oit benecion

280

Sovento guardava Bovo por la façon,

E de lu oit senpre sospicion

Qe non fust li son fantin Bovon.

E porço, la dame si le asaçon;

Sovente fois li metoit por rason,

285

Donde estoit e de qual legion;

Sempre Bovo si çelava ses non.

Rubric 5

Coment la dama de Synibaldo conoit Bovo / En le bagno e si ne fe grande çoja.

Laisse 6

La çentil dame, qe tanto fo pro e ber,

Quant ela vit Bovo ses nome çeler,

Ne por losenge ne por projer

290

Da lui non poit la verità trover,

Qe droitament se volust palenter,

Dont se porpense d'altrament asaçer:

Un bagno fe fare en una çanbra a·l çeler,

Bovo apela: "Veneç avanti, frer,

295

Vu sì tot camufés por le arme porter,

E por li gran colpi reçever e doner.

Entrés in bagno, si vos averés laver;

El vos farà tot quanto refrescher."

E Bovo lì entre de greç e volunter;

300

Quant fu en le bagno, q'el se cuita repolser,

E quela si le voit a freger;

Donde Bovo s'en prist a vergogner.

"Dama, "dist il, "por Deo, tra vos arer!"

Dist la dama, "No te diça nojer."

305

E como ela prist por lo peito a laver,

Desor la spala droita ela le pris guarder;

Ella vi li segno qe li lasò sa mer,

Ço fo una cros qe Deo li volse segner;

Por gran miracolo qe in lu volse mostrer.

310

E quella dama qe tanto fo pro e ber,

A quel segno lo prist ad aviser.

Non fi mia la dame cun femena forsoner;

Ela prist Synibaldo a clamer,

Nean Teris nen volse oblier.

315

Qi donc veist la dama cella cros baser,

E tuto Bovo e davant e darer,

"Bel filz, "dist ila, "Cun te posi çeler,

A moi, e a celu qe doit eser ton per,

Qe averì dura par toi tanta pena et engonbrer,

320

Ne se poroit dire ni aconter?"

"Deo, "dist Bovo, "Laseç star li noser;

Q'el no·l sa nul hon qe soit né de mer

Se no Synibaldo, e Teris mon frer,

Qe avec lor me vorò conseler,

325

Como nu poron nos ennemis mater."

E quela li dist, "De grez e volunter."

Atanto ven Synibaldo fora por le soler,

La dama li foit in la çanbra entrer,

E quant conoit Bovo, se voit a çenoler,

330

E durament el prist a larmojer

Por la gran çoja q'el oit de·l baçaler,

E por la mort la quale si fe son per.

Elo li voit le janbes a'braçer,

Baser li volse li pe, quant cil le foit lever.

335

"Pere, "ço dist Bovo, "ben vos devés penser

Quant me volun avec vos mener.

Mon çival me caì en meço la river,

Donde in Antona i me torno arer

Et a ma mer me dè por presoner.

340

Quela malvés, qe Deo doni engonbrer,

La qual cun un paon me volse atoseger,

Eo m'en foçì; Deo m'à volu aider.

Se vos dovese tuto e dire e conter,

Le pene e le travaile qe m'è convenu durer,

345

En un mois ne vos poria derasner.

Unde nu se dovon en tute mois penser

Como Dodo posemo amater,

E vençer la mort de Gujon mon per."

Dist Synibaldo, "Tu parli como ber."

350

E dist Bovo, "Ben ò veçu la via e li senter.

Quant fu en l'estor, en le grande torner,

Ferì quel Dodo si le fi trabuçer;

Si forte li navre qe vi li sangue rajer.

A gran pena le fi soa çente monter;

355

El mandarà por mires par tot la river,

A burgi et a vile a çité et a docler,

Por li milor q'elo porà trover.

Et eo a mo de mires me farò adober,

E portarò unguenti de plusore mainer,

360

Si le farò croire a·l mondo non ò me per,

Ne qe mejo saça una plaga curer.

Se en la çanbra eo porò entrer,

Et eo avese qualche amigo e frer

Qe me doust secorer et aider,

365

De tal medesine li averia porter

Qe in soa vita no li averoit salder."

Dist Synibaldo, "Ben est da otrier."

Rubric 6

Coment Siginbaldo amunisoit Bovo / Comant doit entrare in Antone.

Laisse 7

"Bel filz, "dist Synibaldo, "entendì mun talant;

Quant ton pere fu morto eri petit enfant,

370

Asa à tu en Antona amisi e benvojant,

Por amor de ton per qe amò dolçemant.

Daqe te plas fare ceste convant,

El se vole faire saviamant.

Quant serà en Antona non demorarà niant;

375

A un albergo descendì, meravilos e grant;

Ilec troverà un oster molto saçant:

Uberto da la Cros si se voit anomant,

Q'el amò plu ton pere de nul hon vivant,

Plu qe non fasoit nesun so parant.

380

A colu te palenta seguramant,

E prendi son conseil e fà·l çelcemant,

Qe plu no·l saça nesun homo vivant;

Qe da traitor ne se poit cir guardant."

Lor dist Bovo, "Tropo sto longemant."

385

Adonc se parile de cele robe grant;

Teris vait avec lu, qe fature saçant;

Oit cançé e le visaço davant.

Ensent de·l çastel, e si s'en vont erant

Tantq'i fu ad Antone, a la porta davant.

390

Et ilec davanti si desant;

Li portoner li apelle, si li dist en ojant:

"Qe querés, segnors, qe aleç demandant?"

Bovo li responde, qe fo plus en avant,

"Nu semo mires, li miler qe fu anc;

395

Por guarir sen venu Does amantenant."

Dist li porter, "Or m'atendés atant,

Qe nostra dama saçe li convenant.

Nesun lì po entrer sença li so comant,

Por la guere c'oit dure e pesant,

400

La qual li fait un çastel qui davant."

E dist Bovo, "Serà a li Deo comant."

Li porter se partì, vait a·l palés corant;

O vi la dame, a derasner la prant:

"Dama, "dist il, "saçés a esiant,

405

A la porta son venu dos mires molto grant;

Dient qe in tot li mondo de le segle vivant

No sonto dos milor ne qe aça plu siant."

Dist Blondoja, "Vegna seguramant,

Ma si li diés qe me vegna davant."

410

E quant li porter vait arer tornant,

Qui entra en Antona, a l'albergo desant,

D'Uberto da la Cros, li saço e li valant.

Ses palafroi fa ostaler mantenant,

Pois vont a li palés a la sale plus grant

415

Por veoir Dodo, e sa plaie de·l flanc;

Et entrent en la çanbre, trova la dame plurant.

"Dama, "dist Bovo, "no aça spavimant,

Qe deman, avanti none, se Jesu li consant,

Entro ses plaie meteron tel unguant

420

Qe tosto li guarirà; farò·lo sano e manant."

Pois à cerché la plaie darer e davant

I dient a la dama, "Questo si è niant.

Meno n'est a guarir qe un trepaso de vant."

La dama quant l'intent, si li fa bel senblant,

425

E dist, "Signur mires, vu si starì çadant."

"Nen faron, "dist Bovo, "mille marçé vos rant.

El ne conven aler a far nostri onguant;

Nu avemo veçu ço qe mester li atant."

Dist la dame, "Aleç a Deo comant;

430

E si vos pre qe vos venés por tanp."

E Bovo li responde, "A l'aube parisant

Seremo revenu cun tot nostri onguant,

Si le faron e sano e çojant."

I se partent, nen demorò niant;

435

A so oster retornent erant.

E Uberto li reçeve molto alegramant,

Si le apareille ben e cortoismant.

Quanto ont mançé si fu de bon talant,

Bovo en una canbre entrò çelcemant

440

Et apella son osto; por me la man li prent.

En la çanbra li mene cun Teris ensemant,

E quant fu dedens, si li dis li convenant,

Con il fo filz de Gui, li bon conbatant

Et oit nome Bovo en la bataile de canp.

445

A cort endure tant pene e tormant,

E çerche li mondo darer e davant.

Quant Uberto l'intent, a li pe li desant,

Si legro non fo unqua a son vivant.

El s'ençenocle, ma Bovo no li consant

450

E si li fe lever suso en estant,

E pois li parle, si le diste bellemant,

Q'elo vada a querir amisi e parant,

Qe a·l matin a l'aube parisant

Sia a li palés cun tot son guarnimant;

455

E porti soto le cape li bon brandi trençant.

E quando i oldirà lo corno de l'olifant,

Si le secora ne no se faça lant.

E dist Uberto, "Non parlés plus avant;

Qe plus de doa milia saverà li convant,

460

Qe tot sont amisi e benvojant

E qe amava vestre pere lojalmant.

Volunter li vençaroit a li brandi trençant

Ver li traitor culverti seduant,

Qi le venent oncire a tradiment;

465

E quel fo Do le segnor de Maganc."

El se depart, nen demore niant,

Ne non mena scuero ni sarçant.

Tota la noit li voit apelant,

E çercha la tere darer e davant.

470

Quando qui le soit, sen molto çojant;

Çascun parele tuto son guarnimant.

Atant s'en va la noit, vene li jor aparisant;

Bovo e Teris se levarent por tanp

Por aler a·l palés a porter son unguant.

475

Dist Uberto, "Alé seguremant,

E farés quelo qe aveç en talant;

Quant sonarés li corno de l'olifant,

Vu averés secorso bell e jant,

Qe ça sont a·l palés plu de mile sesant;

480

Qe çascun oit li bon brant trençant."

E qui s'en voit droit a li pavimant,

Ben resenbloit mires a li vestimant.

Ancor non estoit levé de Do la soa jant,

Mais de qui de Bovo li estoit ben tant

485

Qe preso avoit li palés tot quant,

Qe toti stava atenti d'oldir li olifant.

Rubric 7

Coment Bovo e Teris retornent / A·l palés e recovrerent la cité.

Laisse 8

Ora fu Bovo en la çanbra entré;

Dama Blondoja li est encontra alé

E si li dist, "Bei mires, benvené."

490

"Dama, "dist Bovo, "nu n'avon a planté.

Ora ne dites coment il est esté."

Dist la dama, "Molto s'è travalé;

Petit avoit en questa noit polsé

Por la gran plaga c'oit en le costé."

495

E Teris non oit mie l'ovra oblié;

L'uso de la çanbre oit ben seré,

Porqe la dama ne s'en fose scanpé.

Aprés li leto fu Boves apoçé;

Enverso sa mere oit dito e parlé:

500

"Dama, "fait il, "e vojo qe vu saçé,

Ma non fu mires, Deo soit la verité,

Nean nesun de le mun parenté.

E son ben mires a çostrar en un pre,

E si vos di, par droita verité,

505

Qe a Dodo donè la plaga de·l costé.

Colu qe son dirò en verité:

Or vos remenbri li or e·l tenporé,

Quant en la çanbra vu m'avisi seré,

Si me mandasi la pavon tosegé?

510

Vos estes ma mer, e çeler no·l poé;

Mais nule mere non fi tel crudelté.

E cun cestu, qi est qui amalé

Qe in cesto leito si case ennavré,

Ordenasi li tradimento e la falsité,

515

Donde me per fu morto e le vinte donçé.

Saçés li ben, no li ò oblié,

La pena e li tormant qe por quel ò duré.

Par tot li mondo, e d'inverno e d'esté,

Et en preson lungo tenpo pené."

520

La dama l'olde, tuto fo spaventé;

Volunter s'en foçist de la canbra pavé.

Quant Teris oit ben li uso seré,

E si li dist, "Dama, tra vos aré!

Filz son Sinibaldo, qe tant aveç guerojé;

525

Segondo le servisio vu serés merité.

E ben guardés qe moto non soné,

Se non voleç estre por la gorça schané."

Adonc la dama de dolor fu pasmé,

E Bovo oit l'olifant soné

530

Quant qui defors, qe erent parilé,

Li oldirent si ont trato lor spe,

Por li palés son coru et alé,

Uberto davanti qe li oit escrié,

"Mora li traitor, presa è la cité!

535

Bovo est venu, qe l'oit conquisté,

Le nostro segnor, qe Deo l'oit mandé,

Qe lungo tempo avemo aspeté."

Por li palés sonto corant alé,

E por le çanbre e davant e daré.

540

Quant i n'oit ne veçu ni trové,

De qui de Dodo ni de son parenté,

Tot furent morti, a martirio livré.

Quant per la tera fu la novela alé,

Ad arme corent tot qui de la cité,

545

Ne non remist nesun, ni bon ni re,

De qui de Dodo qe s'en furent scanpé;

Ont quel çorno molto ben aovré.

Or entendés de Bovo gran lialté;

Non volse ocire Dodo, porq'era navré;

550

Qe en soa vita en seroit avilé,

Et el meesmo en seroit blasmé,

Q'el aust son per vençé

Desovra un hon qe estoit navré.

Bovo prist Dodo, cun ses man l'oit levé,

555

E si l'oit ben e vesti e calçé,

E ses plage stroitamente ligé.

Entro ses braçe qelo l'oit engonbré,

Çoso de·l palés elo l'oit aporté;

Desor un palafroi l'oit via mandé,

560

E dist, "Amigo, ora si vos alé,

E quant vu serì e guari e sané,

Et eo ve trovi, ve serà calonçé.

La mort mon per, e di. XX. donçé,

Qe a tradiment vos furent envojé

565

Defor Antone por caçer a li pre;

Quela qe vi traì ne serà ben pajé,

Avantqe da moi ela soja desevré."

E quel s'en voit, ben fu aconpagné,

Q'el non fust da nul hon engonbré.

570

E quant i l'ont a salvamento mené,

Da lu se sevrent, sont arer torné.

S'el non fust qe Bovo li oit comandé,

Mais a Magançe el non fuse alé.

Adonc Bovo oit sa mer pié;

575

De le oncir si li parse peçé,

E da la jent el seroit blasmé,

Porqe l'avit in son corpo porté.

Ma segondo quel qe le fo conselé,

Ne l'ancis; mais anci, l'oit aseré

580

Entro dos mura elo l'oit muré.

Por una fenestra qe era ben seré

Vedea li cor Jesu quant estoit levé

Da una çapela qe era ilec fermé.

Et en quela preson stete en soa viveté;

585

Ben se pote amendar de li ses gran peçé.

Da boir e da mançer avea a gran planté,

E quela donçela Bovo li oit delivré,

Qe li servia d'inverno e d'esté,

Qe li aportò li paon atosegé

590

Quando in la çanbra il estoit seré.

Rubric 8

Coment Bovo oit recovré sa cité; e de Drixiana / Ni de ses filz non save niant; e coment / Braidamont li mandoit mesaçer.

Laisse 9

Bovo fu en Antona, li pro e·l conbatant,

E Teris avec lui, si li vene ses parant,

E Synibaldo, e Latro, son enfant.

Grant fu la cort e darer e davant

595

La novela fu alea por li mondo en avant,

Por vile et por cité e por li çasté grant,

Jusqua a Sydonia, la porta li merchadant.

Braidamont l'oì, fa·se legra e çojant,

Porçoq'ela·l scanpò da li stacon pendant,

600

E de la tore o fi li sagramant.

Son per estoit morto, non avea hon vivant

Qe a la corone pertinist de niant.

Asa era rois prinçes et amirant,

Qe prender la voloie; m'ela no li consant,

605

Qe in Bovo avoit metu tut son entant:

Plus l'amava de nesun hon vivant.

Ora s'en voit ces roman enforçant;

Si cun questa Braidamont fu saça e valant,

Mandò por Bovo e letere e senblant,

610

Q'el se remenbri quant fi li sagramant.

De Druxiana ancor non è dito niant;

Como ela s'en focì cun anbes ses enfant,

De la gran selve, quant morto fu Pulicant,

Cum li lion o el estoit conbatant.

615

Asa durò Druxiana e pena e tormant,

Çercando la çasté, cité, vile e pendant.

E fe·se çugoladra, si aloit sonant

Un arpa onde n'inparò tant

Qe molto ela plaxea a petit e a grant,

620

Si·n guadagnava robe et ar coit et arçant

Donde oit nori ses dos petit enfant,

E si le fe bateçer ad un bon çapelant.

L'uno oit nome Synibaldo a li bateçamant,

E l'altro Gujon, qe molto fu saçant.

625

Quant l'infant fo cresu q'el soit parler niant

Ela li fe enparer de romant,

E de çanter dolçi versi e çant,

Si le foit baler e salter en avant.

Tant fu alea por le mondo en avant

630

Q'ela vene ad Arminie, et ilec la desant.

Son per no la conoit, ne nesun so parant,

Ne qui qe l'avoit noria primemant.

Tante so dolç i versi e·l çanter d·i enfant,

Qe li rois Armenion si le amava tant;

635

Non era ren e·l mondo se ella li demant,

Qe ne li sia doné alo demantenant.

E si grant amor prist ad ambesdos li enfant,

Non poit mançer, si no era davant.

Ora lason de Druxiana qe sta a bon convant;

640

De dama Braidamont ben est qe je vos çant,

Cum per Bovo mandò et il lì aloit atant.

Bovo cuitoit morti fust ses enfant,

E Druxiana la bella a li cor franc.

Rubric 9

Coment Braidamont dapoische son / Pere fo morto, mandò por Bovo mesaçer.

Laisse 10

Braidamont la polçele nen volse demorer,

645

Quant el la vi qe morto era son per;

E de Bovo oit ben mesaçer,

Q'el oit sa tere prise sença engonbrer,

Morti ses enemis et in preson sa mer.

Druxiana morta plu de sete ani enter,

650

De·l sagramento s'en prist a remenbrer,

Q'elo li fe a li son desevrer,

Dedens la tor o oit tant engonbrer,

O il oncist li serpant malfer,

E li malvés qe li voloit liger,

655

A li soldan e condur e mener,

Et a·l stacon li volea apiçer.

Ela sa qe il est li milor çivaler

Qe se poust en tot li mondo trover.

Poisqe il oit morto Luchafer son frer,

660

Nen volse pais lungament entarder.

D·i meltri de son reame li mandò mesaçer,

Q'el vegna a le a tor·la por muler.

Richa corona d'or li farà in çevo porter;

Rico reame averà governer,

665

E s'el venist, non volese otrier,

De li stacon li devés remenbrer,

Quant ne·l fi e partir e sevrer.

Li mesaçer ne se volse entarder;

Tant alirent de noit e de jorner,

670

Venent a'Ntone, si se font ostaler,

Pois vont a li palés a Bovo parler.

S'anbasea le dient con homes pros e ber,

"Ai, sire Bovo, nu semo mesaçer,

D'una rayne qe molto se fait priser.

675

Non è plu bella trosqu'a Mont d'Oliver,

Nian plu saçe por rason ascolter:

Braidamont oit nome, fila fu l'amirer.

Son per è morto, ne s'en po governer,

Ni son reame tenir ni guarder.

680

Por vos nos manda, qe la veneç aider,

E si la prenderés a per e a muler.

Rica corona vos farà in çevo porter,

E rico reame avereç a governer;

Negan de qui non demanda ni quer;

685

Por vostro amor se farà bateçer,

Macon et Apolin averà renojer,

Si averà Jesu aorer."

"Segnur, "ço dist Bovo, "laseç moi conseler."

E cil li respondent, "Ben est da otrier."

690

Bovo ven a Synibaldo, si·l prist a demander:

"Synibaldo, "dist il, "veés ces mesaçer,

Qe m'aporta novelle da loer,

D'una rayne, fila d'un amirer,

Qe me fe de Syndonia de la preson scanper,

695

E da·l stacon si me scanpò en primer,

Dont malament me volea apiçer.

Et eo si le çure a le retorner,

Se Druxiana fust morta, de tor·la por muler.

Son per è morto, manda·me mesaçer,

700

Q'ela se vole bateçar e laver,

E vada a Syndonia mon sagramento a'quiter;

Unde a vos eo le digo en primer,

Qe de ço me diça conseler;

Qe in vos ò tuta moja fe e ma sper.

705

Ço qe dirés, averò otrier."

Dist Synibaldo, "Non è da intarder;

Questa venture qe Deo vos vol mander,

Se vos averés riame a governer,

Poco porés vos enemis doter;

710

Par tot tere li farì descaçer.

A li anbasaor tosto respondì arer,

Qe vu sì prestes senpre de l'otrier.

Trosqu'a un mois vos diça aspeter,

Qe vos farés ves arms pariler,

715

Qe aler li voli a mo de çivaler,

Siqe quela poeç honorer,

E son riame e tenir e guarder."

Bovo ven a li mesages, si le prist gracier,

E grant onor le fi, si le foit aconvojer;

720

E si le donò a çascun un destrer,

De riche robes si li fe adober.

"Segnur, "dist Bovo, "ça çeler nen vos quer;

A·l retornar quan tornareç arer,

Salués ma dame, si le dites sens nojer,

725

Trosqua a un mois se diça pariler

De tute quele colse qe li oit mester,

Qe si altament l'intendo ad honorer,

Como raine qe se poust trover."

E qui li dient, "Ben est da otrier;

730

Vestra anbasea ben averon finer."

Conçé li demandent, si s'en retorna arer,

E si menent qui coranti destrer.

Molto prendent Bovo a loer,

De cortesie e d'altro berner.

Rubric 10

Coment li anbasaor de Braidamont / Parlerent com Bovo.

Laisse 11

735

Li mesaçer ne son pais demoré;

Da Bovo se partent, conçé ont demandé,

Por la bona anbasea gran çoja ont demené.

Por le çamin tanto sonto eré,

E pasent qui po e valé

740

E qui gran porti de la mer salé,

Qe a Syndonie i furent torné.

A la rayna la novella conté,

E quant li soit, molto li fu a gre;

Doncha oit mandé par tota sa contré

745

A ses barons, princes e casé,

E a totes autres çivaler aprisé.

De vitualia fu molto ben parilé;

Plu de mile robes son coxi e talé,

De richi pani de samite e de çendé.

750

Avantiqe Bovo fust a Syndonia alé

Era ça la corte e bania e crié,

Par tot part environ e da le,

Quela novella si le fu aporté.

Mile çubler furent aparilé,

755

Qe vont a la cort como est usé;

Altri sonent enstormant et altri ont çanté,

Por tel mester ont robe guaagné.

Druxiana fo in Arminia, la saça e la doté;

Quella novella oit ben ascolté.

760

Quando la soit, molto li fo a gre;

A li rois d'Arminie conçé oit demandé,

Por aler a la cort, por eser anomé,

E por veoir li baron de celle contré.

"Nient valt avoir ne dignité,

765

Qi de·l mondo non avoit cerché;

Le ben e·l mal s'atrova en le cité,

E vi le cort d·i baron alosé;

Por boir ni por mançé ne seroit desevré,

Qi m'en donés asa a gran planté."

770

Dist li rois, "Se croire me volé,

No lì alirés, ne le meterì pe.

Non avés ben ço qe vos est a gre,

Robe e avoir e diner moené?

"Si, ò, "dist Druxiana, "mille marçé n'açé.

775

E no li vo por robe; anci, n'averò doné,

E vo por veoir cella nobilité

De cella rayne, d'oltra la mer salé,

Qe dient qe avoit cotanto de belté

E de la cort como serà finé.

780

Mes enfant la verà, qe serà plus doté,

E si serà plu saçi e maistré."

Dist li rois, "Li seno m'avés cançé;

Ora alés e pasé, non tardé,

E quant la cort seroit delivré,

785

Por Deo vos pre, qe tosto torneç aré."

Dist Druxiana, "Ben serà otrié."

E Druxiana nen fu pais oblié;

De robe fi far plu de quaranta sé,

E d'arnise oit un somer carçé.

790

A palafro è la dama monté,

Et avec le, anbesdos ses rité.

Deverso Syndonia oit le çamin pié,

Tant oit la dama alé e çaminé,

Pasa qui porti in nave et en galé,

795

E monti e plan oit asa pasé,

Molto gran poine ela li oit enduré,

Avantiq'ela fust in Syndonia intré.

Era ça Bovo a la corte alé

A do cento homes, çivaler coroé;

800

No lì è quelo de menor parenté,

Non abia robe devisé

Nen una sola, mais n'oit plu de le.

Avantiqe Druxiana fust ostalé,

Si era la dama cun qui de la cité

805

En santo fonte lavé e bateçé;

E qui qe no volse croire in Dé,

Ni Macometo avoir arenojé,

Furent morti et inpresoné.

A gran mervele fo Bovo doté,

810

E quela Braidamont molt l'avoit amé;

Le primer çorno q'ela le vi en primé,

Oit en lu son amor apojé.

Una corona d'oro li avoit aparilé,

Donde le peres qe lì sont sajelé,

815

Valent d'avoir molto gran riçeté.

Grant fu la cort par tota la cité,

E desor li palés en la sala pavé,

Bovo cun Braidamont asa s'avont parlé;

E de çoie et amor parlé e conselé.

820

E ordenent li terme qe doit eser sposé,

E in leito anbesdos colçé.

Si cun li termen se fu aprosemé

Q'elo no lì era se no una jorné,

E Druxiana fu en Syndonia entré,

825

Ad un grant oster ela fu desmonté,

Et oit ses robe e mué e cançé.

E quando ella oit e bevu e mangé,

A li palasio vent cun anbes ses rité,

E so arpa aporta, ne l'oit pais oblié,

830

E quando la sona li çubler aprisé,

Se le arotent e venent apreso le.

Et ela fu cortois si le ont honoré

E si le dona robe e manté aflubé.

Dist l'un a l'altro, "Cun questa à ben soné!

835

E qui çubler qe va por le contré,

Si va por robe, e questa ne le à doné.

Or soit ella beneoita da Dé;

Nen poroit estre por tot l'or de Dé,

Q'ela non fust de çentil parenté."

840

No li fo çivaler conte ni amiré,

Qe a Druxiana no le sia daré.

Metesmo Bovo l'avoit aconvojé,

A mançer a sa table l'avoit aseté.

E quando ela avoit e bevu e mançé,

845

En pe se driça, sa arpa oit pié

E si la sonè, un verso oit çanté,

E ses enfanti ont e balé e dansé.

Tota la cort s'en fu alegré,

E la cançon q'i ont çanté,

850

Dient en l'arpa e menu e soé,

"A, Bovo, Bovo, molto son mervelé,

Qe no conosi Druxiana e vestre dos rité,

Qe pitete fu de la boscho sevré,

Quant Pulican fo morto e delivré

855

Da li lion en la selva ramé.

E m'en partì cun l'ovra fu finé,

Por venir enver la mer salé.

Ma in le boscho e fu aradegé,

Por altra via eo fu açaminé.

860

Asa son por li mondo pené e travelé,

Tantqe nu semo en sta cort arivé."

Quant Druxiana çanta li fanti restont aré,

Ne le fu en la cort nesun si ben doté

Qe la cançon aust anoté,

865

Porqe li enfant l'avoit si ben çanté.

Ma Bovo no l'à mia de nient oblié,

E quant ela oit asa e soné e çanté,

E qui enfant e balé e dansé,

Donde la cort fu tota resvigoré,

870

Bovo s'aprosme l'arpa oit pié,

Ver Druxiana estoit acosté,

E si l'apelle si la oit arasné,

"Ora me dites, dama, la verité;

Quella cançon qe vos avés çanté,

875

Donde l'avés vos, qi vos l'oit ensegné?

Ne la oldì çanter .vii. ani son pasé."

Dist Druxiana, "Daqe savoir le volé,

Ça vos serà tot l'afar conté."

Rubric 11

Coment Bovo demande la dama de la çançon / Et ela li contò tot ço qe li ert avenu.

Laisse 12

"Bovo, "dist Druxiana, "e no ve·l vojo çeler;

880

Questa cançon eo inparè primer,

En una stalle da un cortois palmer,

Qe me facea croire q'è un bon scuer

Quan Machabrun si s'en foçì arer,

D'una poson ben me pois menbrer;

885

E de Rondel, li corant destrer,

D'una fontane no me poso oblier.

Non veés vos quest dos baçaler,