Rubric 68

[Coment li rois Pepin por g(r)ant avoir qe / li dona Do de Magançe (f)i bandir sa oste et/ Civalçoit ad Antone desor Bovo.]*

Laisse 69

Pla vos oldir une nove çanson? (1170)

Nen fu milor oldie pois li tenp Sanson,

2920

De stormeno e de bataile e de gran capleson.

Oldi avés cum fu morto Gujon

A tradimento de le dux Duon,

Cil de Magance, qe oit malecion, (1175)

E de dama Blondoja qe è en la preson;

2925

E cun Bovo tanto à peneson,

Q'el oit Druxiana da la belle façon.

Asa durò par le pene et aflicion,*

Ma mo q'elo cuitoit stare en sa rason, (1180)

E seçornar cum ses dui garçon,

2930

Sovra li vene grande aflicion,

Qe le malvés de le dux Duon

Alò a Pepin por mala entencion.

Tant li donò et or coito e macon (1185)

Q'el fe bandir oste en Françe et a Lion;*

2935

E questo fe·lo por soa malecion, *

Contra li voloir de le dux Aquilon,

(Morando) de Rivere e (Bernardo) de Clermon.*

Li rois n'avoit ço qe li convenon, (1190)

E si fo morto quelo dux Duon,

2940

So frer don Albrigo, cun plus de mil baron.

Da qui avanti se comença la cançon,

Si la oldirés tota quanta por rason.

Rubric 69

[Qui se comença li roman coment li rois Pepin / Contra li volir de li ses baron por grant avoire . . .]*

Laisse 70

Do de Magançe, quando el fu sané (1195)

De ses plaie qe Bovo li oit doné,

2945

E Antona perdue, la cité

Qe il avoit prise a grande falsité,*

E sa muler estoit enpresoné,

Entro dos muri e clusa e seré (1200)

El oit ben, e soit por verité,

2950

Qe son daumaje nen serà mais stauré,

Se por Pepin el non ert vençé.

Conseil demande a li ses plus privé:

Coment il poroit avoir cella ovra ovré. (1205)

E cel li dient, "Nu l'avon ben pensé;

2955

Andemo a li rois; tanto li soit doné

O(r e)t avoir e diner moené,*

Qe nu l'açamo de son seno cançé.

Se poon faire qe il soja airé (1210)

Encontre Bovo, nu averon ben ovré;

2960

Qe a Antone el meterà l'asé.*

Nu averon Blondoie cun tota la cité;

Por mal Bovo unchamais fu né."*

E dist Doo, "Eo l'avea ben pensé;* (1215)

Et eo le farò, dache me l'otrié.*

2965

Za por avoir non serà stratorné."

Savés qe fi celle traitor proé?*

El voit a la cort cun li ses parenté;

Avec lui, e dux e casé. (1220)

Saçés par voir, e quest'è verité,

2970

Qe la cha de Magançe fu la plu honoré,

E la plu riçe e mejo enparenté*

De nulla qe fust en la Crestenté.

Ma una colsa avoit donde furent blasmé: (1225)

Q'i no portent ni fe ni lialté,

2975

Ne non ament qi l'avoit usé.

Doo fu a la cort con li ses parenté;

Conti lì furent plu de quaranta sé.*

Avantqe a li rois ausent de ren parlé, (1230)

De cope d'oro e d'altri vasé

2980

N'oit a li rois asa doné,

Qe por mile marches non seroit conpré.

Quant a li rois furent ben aconté,

E qui li ont asa doné e livré,* (1235)

Davanti li rois en fu Doo alé,

2985

E si le quer merçé e piaté:

"Merçé, bon rois, por la vestre bonté;

Vos me devés faire rason e lialté

De un traites qe m'oit desoré. (1240)

Ma muler prisa, e tolta ma çité;

2990

E mo ferì e durament navré.

Non ò fiançe d'omo de mere né,

Q'el de lu me posa avoir vençé,

Se vu non estes, çentil rois coroné." (1245)

E dist li rois, "No l'ò pais oblié;

2995

Tosto en serì de quella onta vençé."

Et Aquilon estoit ilec aseté,

Et oit oldu cun Doo oit parlé,

E com li rois se n'est aconversé* (1250)

De far a Doo la soa volunté.

3000

El dist a li rois, "Guarda qe vu façé;

Bovo è prodon, e de bon parenté.

Son per li fo morto, e presa sa çité;

S'e l'oit recovra, non dè esere blasmé.* (1255)

Par mon conseil vu no lì aliré,

3005

N'e(n) cel ovra ne vos trometeré."*

Rubric 70

[Coment Aquilon e li altri baron donarent / a li rois li conseil de non çivalçer a Antone; E (de çes) li rois non volse quel conseil.]*

Laisse 71

Aquilon parloe a li rois en ojant:

"Çentil rois de Françe, non creés por niant,

Ne far asenbler ves homes ni vestre jant (1260)

Par lo voloir d·i segnor de Maganç.

3010

S'el g'è forfaito, i ne prenda vençamant;

A lor parten, a vu no dè niant."*

E dist li rois, "Farò li mon talant.

S'el no me rende Antone primemant, (1265)

Ma non averà cun moi pax ni acordamant."

3015

E dist le dux, "Non farés a siant;

E se le faites e nesun mal ve prant,

Dirà la jent qe seno avì d'infant,

Quant prendés guere la qual no vos aprant."* (1270)

Quant li rois l'olde e le intant,*

3020

El dist ad Aquilon, "Vu parlé de niant.

Doncha no sont e rois, ni corona portant,*

Se non fi obei da una cotal çant?

Eo lì alirò malgra qi li contant; (1275)

E se prendo Bovo, farò·ne tel çuçemant

3025

Como traites, culverto seduant."*

Dist Aquilon, "Non farì a siant.

Ora nen faites a li vestre talant,

Qe de questa colsa ne vo dir plus avant." (1280)

Rubric 71

[Coment li rois Pepin fi bandir soa oste / Par tota Fra(n)çe por aler ad Antone.]

Laisse 72

Li rois Pepin nen volse demorer,

3030

Ni d'Aquilon li son consel otrier;

Ni de Bernardo, ni de Morando de River.

Non fe qe sajes, cun oldirés conter;*

El fe ses brevi e letre sajeler; (1285)

Mandò por Françe la novela nonçer,

3035

E par tot e bandir e crier,

Q'el s'apareil peon e çivaler

De venir a Paris con tot son coruer.

Avant un mois, fi sa jent asenbler: (1290)

Vinti milia furent a corant destrer;

3040

E qui de Magançe n'avoit .XX. miler.

E quando Bovo oldì quella novella nonçer,*

Demantenant fa breve sajeler,

Et a Syndonia envojò mesaçer (1295)

A·l rois Teris, e dire e conter,*

3045

Qe li rois de França e de Baiver

Oit fato sa oste e bandir e crier.

"Tanto li oit Doo dona de ses diner,

A 'Ntona vol venir par moi desariter. (1300)

El se dè ben celle jor remenbrer,

3050

Qe de Sydonia le fi coroner.

S'elo m'ama, ni Synibaldo son per,

Si nos vegna secorer et aider."

Adoncha se parte, va s'en li mesaçer; (1305)

Trosqu'a Syndonia ne volent seçorner.

3055

Teris trovò avec soa muler;

Quando vi li mesaçi, si le vait a 'coler,

Si le oit dito, "Benvenés, mesaçer.

Qe est de Bovo, mon segnor droiturer?" (1310)

E cil li dient, "Vu le porés saçer,

3060

Qe queste letre vos dirà le çerter."

Teris le prende, si va la çira oster; *

Vide l'afaire, prist Deo a 'orer,

E posa dist enverso sa muler, (1315)

"Li mon segnor oit de secorso mester,

3065

Car li rois de Françe con li ses guer *

Ont çuré de lu desariter."

Dist Braidamont, "Quant da·l staçon e·l fi desevrer,

E de la tore l'insegna de scanper, (1320)

Neanche mo ne le vojo abandoner.*

3070

Par mon conseil e vos vojo en projer,*

Qe vu li diça secorer et aider.

De nostra jent mena .XX. miler,

E vos meesmes le diça çivalçer, (1325)

E se cun quisti ne poi si ben ovrer,

3075

Et eo de vos veese mesaçer

E vos averò secorer con plus de .XXX. miler."

Quando Teris l'à oldu si parler,

A soa dame vait le viso baser, (1330)

Et in apreso dolçement merçier.

3080

Dont oit fato soa jent asenbler;

Vinte milia furent a coranti destrer,

Tot li milor q'il pote trover.

Quant à ço fato, si dist a li mesaçer, (1335)

Qe demanes diça tornar arer,

3085

E dir a Bovo, no se diça doter;

Secorso averà de .XX. mil çivaler,

A bone arme et a corant destrer.

E qui s'en torne, tant vont por la river (1340)

Venent a Antone, o Bovo po trover.

3090

Quando çi le prendent la novella nonçer,*

S'el oit çoja, non è da demander.

Li rois non dota plus valisant un diner,

Ne qui de Magançe una poma porer. (1345)

Ora devon a li rois reparier,

3095

Qe oit fato sa oste e bandir e crier.

Rubrics 72-73

[Coment li rois çivalçò cum sa oste ad Antone / e coment Bovo mandò a Sydonie e T(e)ris li dona . . .]*

[Coment Dursiana parole a Bovo por far savoir / a li rois d'Armune qe Bovo si è revonu et oit pris . . .]*

Laisse 73

Li rois de Françe, qe Pepin oit non,

Por grant avoir qe li donò Duon

Fi asenbler de França li baron (1350)

Por aler ad Antone desovra li cont Bovon,

3100

E questo fe contra li voloir de le dux Aq(ui)lon.

Li rois çivalçe a cuita de speron,

Con sa grant oste, çivaler e peon.

Tant çivalçent a soe guarison, (1355)

Et avec lui la soe legion,

3105

Venent ad Antone avanti l'Asension.

Apreso Antone, a·l trato d'un bolçon*

L'etendirent tende e pavilon;

L'oriaflama levarent contramon. (1360)

Bovo le vi, qe estoit a li balcon;

3110

O el vi Druxiane, si la mist por rason:

"Dama," fait il, "el nos crese tençon.

Dodo è venu a prender nos dojon;

Pepin oit (m)ené por avoir guarison, (1365)

Qe rois est de Françe e de Lion.

3115

Veeç l'oriaflame desplojea contremon,

E tant ensegne e indoré penon?

Li rois oit eu consejo de guarçon,

Se Teris ven, cun per letere avon, (1370)

Partir nu li faron a paso e a·l tron!"*

3120

Dist Druxiana, "Deo gracia nos le don!

Or le saust mon per Arminion,*

Qe vu scanpé sì de morte e de preson,*

Qe donea fose a cosi nobel hon. (1375)

E fose quella qe in la soa mason,

3125

Avea li dos petiti garçon,

Qe li çantava li versi e le cançon.

S'elo·l saust, par nul ren de·l mon,

Ne s'en aliroit li rois sença destrucion."* (1380)

Rubric 74

[Coment Teris vene en secorso de Bovo a 'Ntone / Cun .XX. mil çivaler, e si le salue da part la dame.]

Laisse 74

Segnur baron, Deo vos soit en aie,

3130

Le glorios, le filç sante Marie!

Grant fu l'oste e grande (la) baronie*

Qe li rois Pepin avoit establie;*

Atorno Antone fu la çivalerie. (1385)

Bovo s'estoit con Druxiana, sa mie;

3135

Atant ven Teris con soa conpagnie,

Vinte mil homes avoit a bataile remie.*

Non poit remandre qe bataila non sie

Quant en Antone entrent celle baronie. (1390)

Bovo le vi, à sa çoja conplie,*

3140

El acolla Teris, por amor le disie:

"Teris," fait il, "de la vestra sperançe non m'à vos falì mie.*

Çeste filz d'Ançelo, qe le cor Deo maldie,

Por grant avor m'à tolu en aie;* (1395)

Con qui de Magançe à fato conpanie.

3145

Non lasaroie par nul ren qe sie

Qe eo non vada defor a la meslie."

Laisse 75*

"Bovo," dist Teris, "e no vos quer çeler;

Da part de Braidamont e vos don saluer. (1400)

Ela vos manda .XX. mil çivaler,

3150

Si n'oit fato .XXX. mil pariler,

Qe vos manderà, se vos farà mester."

E dist Bovo, "Molto la poso gracier.

Ben poso par voir e dir e conter, (1405)

Quando me poso de le aremenbrer;

3155

Quant a·l stacon ela me vi en primer,

De la schala me fe çoso desmonter,

Pois me menò davanti da son per.

Se fose ste cativo e lainer, (1410)

Za Druxiana non aust soa sper,

3160

Qe la dama averia tolta a muler;*

En mia vita l'averò regracier.*

Sire Teris, e no ve·l quer nojer;

E so par voir qe por oro e por diner (1415)

Li rois Pepin m'è venu a guerojer.

3165

Jamais li rois Angelo, li qual si fu son ser,*

Si como e poso oldir e desrasner,

Ne li plaqe mais traimento user,

Ne guera prendre con li ses çivaler. (1420)

Ançi, le deveroit, se le fose mester

3170

Par tot tenpo secorer et aider.

Avantqe a li canp voja aler a çostrer*

Avec li rois e voria parler;

Se por amor el s'en volese aler, (1425)

Lasar la guera a qi qe l'oit mester,

3175

E qi qe cuitent soa muler vençer;

E se le rois no le vol otrier, *

Da lor avanti se mal le po encontrer,

Jamais non do eser plu da (blasmer)." (1430)

Dist Teris, "Vu parlés como ber.

3180

Or le mandés a lui un mesaçer,

E se li plais e li vol otrier,

Avec lui (v)orisi parler,*

En celle pre avec cil verçer. (1435)

E no serà con vos se no dos çivaler,

3185

Et aça avec lui Aquilon de Baiver,

Et ensement Morando de River.

De qui de Maganç, non demando ni quer."*

Adoncha Bovo no se volse entarder; (1440)

El l'invoì Bernardo da Mondiser,

3190

Qe a mervile savoit ben parler,

E de rason dir e conter.

Un palafroi el se fe coroer;

Elo li monte si s'en vait sens tarder. (1445)

Quant Bovo li oit dito ço q'elo doit crer,*

3195

Via s'en vait Bernardo da Mondiser;

En men el porta un ramo d'oliver:

Quel senefie q'el est mesaçer.

Rubric 75

[Coment s'en vait Bernardo, qe porta / a li rois Pepin la novelle].

Laisse 76

Bernardo çivalçe, qe cor oit de lion; (1450)

Saçes homo ert, si soit ben rason.

3200

Quant de Pepin el fu a·l pavilon,

Dodo de Magançe e le dux Aquilon,

Et avec lor Bernardo de Clermon,

Morando de River e le dux Sanson. (1455)

Le mesaçer desis de·l muleto aragon,

3205

E ven davant li rois, si le dist sa rason:

"Salu vos mande Bovo, le filz Gujon;

Parler ve voroie, a vos et a 'Quilon,*

E a Morando e a Bernardo de Clermon. (1460)

Ne vol qe avec vos aça plus conpagnon;

3210

Et el averà avec lui Teris, rois de Sindon

E de Baldras - de tot la legion,*

E Synibaldo, qe bailo fu Bovon."

Li rois l'intende, s'infronçì li gregnon; (1465)

E çura Deo, qe sofrì pasion,

3215

"S'el no me rende d'Antona li dojon,*

E sa muler el non rende a Doon,

Et el non ven a ma subecion,

Apendu ert cun pesimo lairon! (1470)

Tota sa jent meterò a confosion,

3220

Nen scanperà ni veilardo ni garçon."

Dist Bernardo, "Perqe vos çelaron?

Ne son qui venu por far vosco tençon.

Dites le moi, se le verés o non." (1475)

Rubric 76

[Coment Aquilon parlò a Pepin/Por li (mesacer).]*

Laisse 77

"Bon rois," dist Aquilon, "ben aveç ascolté;

3225

Li mesaçer v'à dito sa anbasé.

A lu non dè eser nula ranpogna doné,

Ne nul mesaço non dè eser destorbé.

Honor e bel senblant li doit eser mostré (1480)

Davanti çelu q'il oit qui envojé;

3230

Le devés dire la vestre volunté."

Dist le rois, "El est un malfé.

Aleç, mesaço, e plus non entardé,

E si le dites qe son aparilé. (1485)

Vegna a moi defors en cele pre,

3235

Ne non aporte arme, fors li brant amolé."*

Quel responde, "Ben serà otrié."

El se depart, si s'en fu alé,

Ven a Antone, nen fu pais demoré. (1490)

Bovo le vi, si li est encontra alé;

3240

E cil li oit li mesaço nonçé.

Quan Bovo li soit, si·n fu çojant e lé

Por dir a li roi la soa volunté.

E li rois Pepin non oit l'ovre oblié; (1495)

Dux Aquilon oit a soi apelé,

3245

Et avec lu fu Morando de Rivé,

E Bernardo de Clermon nen fu plus demandé.

A palafroi i furent monté;

Deveir Antone i furent açaminé.* (1500)

E Bovo estoit a·l balcon apoçé;

3250

El vi li rois, Teris oit apelé;*

A Sinibaldo oit li rois mostré:

Non oit pais li rois mie oblié;

"Or tosto enscamo de la cité, (1505)

Qe tel dos homes oit avec lui mené,

3255

Qe sont amisi de le nos parenté."

Dist Sinibaldo, "Eo le conosco asé."

Rubric 77

[Coment s'en vait Bovo a p(a)rl(e)r a li rois / et avoit avec lui Synibaldo e Teris.]*

Laisse 78

Bovo desis de palés eramant;

Sinibaldo e Teris font lo somiant; (1510)

En palafro entrent isnelemant,

3260

D'Antone ensirent por la porte davant.

Bovo, quant vi li rois, tosto a tere desant,

E Sinibaldo ne le parse mie lant.

Teris, avec loro, mais Bovo va davant; (1515)

Bovo si s'ençenoge davant li rois de Frant.

3265

Et Aquilon por me la man li prant,

E Bovo le salute, da Deo onipotant.

Dist li rois, "Qe quer e qe demant?"

E Bovo li responde, "Pax et acordamant. (1520)

A, çentil rois, qe tant sì manant,

3270

De una ren molto me vo mervelant,

Quant por conseil de li segnor de Magant,

Con l'oriaflame sì venu tant avant,

E non fais pais se no de niant; (1525)

E non savés coment l'ovra apant,

3275

E qe avenir poit da ste jor en avant.

En Antona ert tel .XX. mil conbatant,

Qe non vos renderà la tere si por niant.

Çentil rois, sire, faites·le saçamant; (1530)

Torneç en França con tota vestre jant,

3280

Da mo a Dodo partirò li convant."

Li rois l'intent, si·l tene por niant.

Rubric 78

[Coment Aquilon parole a le duse Bovo / dapoiske li rois Pepin li avoit parlé.]*

Laisse 79

Aquilon parloe a le dux Bovon:

"Bovo," fait il, "entendé sta rason; (1535)

Fa un convento, e nu li otrion.

3285

A Dodo rendi Blondoja a li çevo blon;

El è ta mere, si la ten en preson;

Por amor li rois, ora si le perdon,

Ten toa tere, cun fi ton per Gujon.* (1540)

Ben doit le filz avoir la reençon,

3290

Burgi e çasté, e çité e dojon;

Tu si fa ço, nu si s'en aliron

Cun nostra jent, se Dodo vol o non."

Dist li rois, "E nu li otrion, (1545)

Tot ensement cum dist Aquilon."

3295

E dist Bovo, "Vu parleç a perdon;

Quant me (remenbra) de la gran traison,*

Qe ma mer fe a mon per Gujon

Por lui trair a li conte Doon, (1550)

Se le tramis fora por venason,

3300

Creeç, rois, qe soja si garçon,

Qe no me remenbri de la mortel preson,

E quando m'envojè la tosegé paon,

E de quella ovra non porti pasion? (1555)

Qi me donast tot l'or de·l mon,

3305

Un sol çorno no la daria a Duon."

Rubric 79

[Coment Bovo parole a li rois de Françe / e coment li rois li respundì].*

Laisse 80

Quando li rois olde Bovo parler,

El vede ben q'el no li val projer.

El dist a Bovo, "Cun te cri defenser? (1560)

Encontra moi virà tu por çostrer?

3310

De la corona te farò sbanojer,

De tota França e davant e darer."

E dist Bovo, "Deo est mia sper.

Quant me voleç le droit calonçer, (1565)

Nen vojo plus avec vos tençer.

3315

Quando vos plais, v'en poeç aler,

Daqe me devés de França sbanojer;

Da Clarença ma spea vos convent guarder,

Qe me çinse Druxiana quant me fe çivaler; (1570)

Jamais nula spea non fu meltre d'açer."

3320

"Bon filz," dist Aquilon, "or no te coruçer.

Molto fu pro li dux Gujon ton per;

Jamais cun li rois el non volse tençer.

Ço qe te di, eo te vojo projer, (1575)

Qe por amor de li rois, tu lasi ta mer,

3325

E cun Dodo te deçi apaser.

E cest pla è ben droit a demander;

Ton per Gui oncis de Do son per.

Se la vença non è (pais) da blasmer;* (1580)

E de ta mer, oit filo q'è ton frer,

3330

Qe de rason, tu le di ben amer;

E in ta tera tu le di governer,

Qe a le besogne te poit avoir mester."

E dist Bovo, "De tel frer non quer. (1585)

Or vos alés, et eo vojo retorner;

3335

Prender mes armes, e montar en destrer,

E defender ma tere, qi la vol calonçer,

Açoqe nul m'en poust blasmer.

A vos, bon rois, e vos vojo nonçer, (1590)

Et avec vos Aquilon de Baiver,

3340

A Bernardo de Clermonte e Morando de River,

Por cortesia, vos en deça aler,

E laseç Dodo avec moi tençer,

Se vos le faites, fareç como ber. (1595)

E se no le faite, mal (v)os po encontrer;*

3345

E non serò da nul homo da blasmer."

Adoncha Bovo se pris a li strever;

Monta en palafroi, si s'en retorna arer.

Rubric 80

[Coment se partì li parlamento e Bovo / s'en retorna arere in Antone.]

Laisse 81

Bovo s'en vait, e Teris ensemant, (1600)

E Synibaldo, li saço e li valent;

3350

E li rois Pepin nen demorò nient.

Aquilon de Baivere e li altri erament

A·l pavilon tornent ireement;

Da Bovo non poit avoir nesun bon convent. (1605)

Ilec trovent dux Dodo qe li atent,

3355

Si le demande tot primerement

S'el averà sa muler e li son casament.

Dist li rois, "El non à quel talent;*

Nen vol laser sa tere por nient. (1610)

De soa mere vos dirò brevement:

3360

No la laseria par tot l'or d'Orient;

Morir la farà a dol e a torment."

Dodo, quando l'oldò, li cor toto li soprent;

Ben aleria l'on li trato d'un arpent* (1615)

Avantiqe un moto parlese de nient.

3365

Dist Aquilon, "Saçì ad esient:

Se vo avoir nesun restorement,

Avoir tel conven a li torniement.

Saçì por voir Bovo ni soa çent (1620)

No t'ama ren un diner valisent.

3370

Bovo s'aparecle, alò demantenent

Por defender sa tere e casament;

Le porà veoir a li pre verdojent.

Saçés, serà qi, averà bon guarniment." (1625)

Çil Aquilon parlò si altament

3375

Q'el mise Doo in si gran spavent;

Par un petit q'elo no l'atent,

En gran paure furent tota la jent.*

Rubric 81

[Coment Bovo retorna in Antone; / Coment Drusiana le mie por rason.]

Laisse 82

Ora fu Bovo in Antona tornée; (1630)

Dama Druxiana li fu encontra alée

3380

E si le oit por rason demandée,

"Qe dist li rois? Qe oit il en pensée?"*

"Dama," fait il, "el oit li sen cançée.

El me demanda Antona, ma çitée, (1635)

E mia mer, qe soja delivrée,

3385

E a·l dux Duo ela soja presentée.

Qe dites vos? Serà·lo otriée?

De questa onte, qe conseil me donée?"

Dist Druxiana, "Se ben vos porpensée (1640)

Zo qe avés soferto et endurée,

3390

Et avant et arer por le stran contrée,

Avantqe por lor recreant vos clamée,*

En devés estre pené e travailée.*

E se por arme defendre no la volée, (1645)

Rendés a moi, qe ben serà guardée,

3395

E çorno e noit serò sor le fosée."

Bovo, quant l'olde, oit un riso çitée;

Trois fois basa la dama por amistée.*

"Dama," fait il, "ben serà defensée." (1650)

El non oit mie pais l'ovra obliée;

3400

El oit sa jent e partie e sevrée,

A Teris n'oit doné una mitée.

E li altri se retent cun çivaler menbrée;

A Sinibaldo n'oit mile donée, (1655)

Por ben guarder Antona sa çitée.

3405

Bovo s'adobe, oit l'auberg endosée;*

E Druxiana li oit la ventaja fermée.*

Alaça l'elmo, si oit la spea cinté;

Le ganbere calça, e li speron dorée. (1660)

Rondel li fu davant amenée;

3410

E cil li monta, qe non bailì strevée;

D'altra parte Teris fu montée.

"Teris," dist Bovo, "le honor vu averée,

Porqe vu estes rois, vos soja otriée,* (1665)

X. mil homes avec vos menée.

3415

Et avec vos eo vegnirò darée."

Dist Teris, "Mille marçé n'açée."

A çival monte, est a Deo comandée;

La porta fu averta, e li pont abasée. (1670)

Fora ensent, le fren abandonée;

3420

Nen poit remandre ne le sia mes(l)ée.*

Rubric 82

[Coment Bovo donò a Terise li primer / Colpo de la bataille a .x. mil (cival)er.]*

Laisse 83

Teris çivalçe li nobel guerer;

En sa conpagna, .X. mil çivaler.

L'oste asalta a costé una river;* (1675)

Tende e pavilon fait a tera verser,

3425

Homes e çivals cair e trabuçer.

Li rois de Françe, quant oì li noser,

Demantenant fa sa çent monter.

Guarner l'infant se pris son corer; (1680)

Fil estoit de Dodo e de Blondoja a·l vis cler;

3430

En sa conpagna oit .XX. mil çivaler.

Grant fu la bataile a celle començer;

Li pro Teris molto se fait apriser;

A·l primeran vait tel colpo doner, (1685)

Ne le valse arme valisant un diner;

3435

Morto l'abate de·l corant destrer.

Atanto ecote vos pungant Guarner,

Frer de Bovo e fio de sa mer.

Mais no l'ama mie la monta d'un diner; (1690)

Vait a ferir Teris sor li scu a quarter.

3440

Li scu li speçe, mais non pote endaner

Li blanc auberg, nian maja falser.

L'asta fu fraita, fa li torson voler;

E Teris trait li brant forbi d'açer* (1695)

Qe li donò Braidamont sa muler.

3445

Guarner ferì desor l'eumo verçer,

E quel fu bon e d'un bon açer;

Trençer nen poit valisant un diner.

La spea torne, sor le scu ad or cler, (1700)

La guinca fait a·l preo voler.*

3450

Trença de l'auberg le guiron tot enter;*

Le çevo trença a·l corant destrer,

E cil caì in l'erba verdojer.

Quant fu a tera, n'ait qe coruçer; (1705)

Tosto se driçe, si trait li brant d'açer;

3455

Se il porà, el se vorà vençer.

La spea trait, c'oit li pomo dorer;

A Teris vait un gran colpo doner

Desor son heume o reluse l'açer. (1710)

De quelo trençe quant ne poit bailer;

3460

Deo le guardi, quant fi li brant torner

La spea avala sor li col de·l destrer.

Li çevo li trençe, si fait Teris trabuçer;

Avantqe Teris se poust redriçer, (1715)

Çelu se fait avant par lui contrarier.

3465

Ben li aust eu por presoner

Quant li secorse plus de mil çivaler;

Par liura força le font su lever;*

I·le amenent un corant destrer (1720)

E cil le salta, qe non bailì striver.*

3470

Avantiqe Guarner poust reparier,

Teris le fert ancora con li brando d'açer;

Por si gran force li vait un colpo doner

Trença li eume cun tot li çapeler.* (1725)

La blança cofie ne li valt un diner;

3475

Trosqua in le dente fait la spea coler;

Morto li fait a tera trabuçer.

E pois escria, "Monçoja, çivaler!

Fereç ben, qe Deo ne vol aider." (1730)

E cil le font de greç e volunter;

3480

Li .XX. mil qe furent de Guarner

Le virent ancir e mal bailer,

E qui gran colpi doner et enplojer;

Lasent li canpo a li .X. miler. (1735)

Li rois le vi, cuita li sen cançer;

3485

Dist ad Aquilon, "Nostra jent par scanper."

Dist Aquilon, "Ben vos disi l'autrer,

Qe mal fames altru guera pier.*

S'el est morto le filz, or ne demandec li per,* (1740)

Qe a lu perten de son filz vençer,

3490

E par lu vent tot ste guerojer."

"Dodo," dist li rois, "or vos aleç armer;

Qe lo otria Aquilon de Baiver."

E dist Dodo, "De greç e volunter." *(1745)

Rubric 83

[Coment li rois por li conseli d'Aquilon / Comanda a Dodo de Maga(n)çe qe se deust . . .]

Laisse 84

Dodo s'adobe a lois de conbatant;

3495

Veste l'aubers a la maje lusant,

Alaça l'eume e cintò li brant.

Monta a cival isnelo e corant;*

A col la tarçe tenis d'un olifant; (1750)

Fa soner ses grailes e darer e davant,

3500

XX. mil furent a verdi helmi lusant.

Lora vont a ferir tot comunelmant;

De ben çostrer i font le senblant.

Do de Magançe tent una lança trençant; (1755)

Vait a ferir un çivaler davant.

3505

Le scu li speçe, e l'auberg ensemant;

Morto l'abate enverso le canp,

E pois escrie, "Ferés ben mie çant!"

Teris l'oldì, molto li vait reguardant; (1760)

Ben le conoit a li son guarnimant;

3510

Ver lu s'en vait cun sa spea trençant.

Feri l'averoit, mes altri li sorvant;

A lui non poit aler ni mostrer son talant,

Por la gran presie quant vene çele jant. (1765)

E qui le fer e menu e sovant,

3515

Siqe qui d'Antone nen pote durer a·l canp.

Ça fusent metue en fue tuti quant,

Quando Bovo le secore con l'altra soa çant,

Ça oldirés bataile meravilosa e grant.* (1770)

Rubric 84

[Coment fu grant la bataille quando Bovo / entra en l'estor, e da l'autre parte (venin)ete Do.]*

Laisse 85

La gent d'Antone nen potent plus sofrir;

3520

Veent lor gent detrençer e morir,

E qui de Françe in la canpagne courir.

Teris vide qe no li poit resortir;

O voja o no, coven li canp gerpir. (1775)

Ben vos poso dir senca nesun mentir,

3525

Nen fust Bovo qe le fait retenir,

E dolçement li comença a dir,

"Segnur," fait il, "no me devés falir;

Se a Deo plais, vos donarò ben air; (1780)

Torneç cun moi e non diça foir."

3530

E cil le font; quando le vi venir

Do de Magançe, le vait a envoir.*

Qi donc veist tanti colpi ferir,

L'un morto sor l'autro trabuçer e cair. (1785)

Tot li plus meltre n'ait talento de joir,

3535

Qi de quel canpo pote li jor ensir;

En soa vite ben li doit sovenir,

E Bovo fer un çivaler por grant ir;

Morto l'abate, si·l fait a·l canpo cair; (1790)

Donc por cil colpo fait una presia sclarir,*

3540

Do(n)de nen foit sete morir.

Rubric 85

[Coment Dodo de Magançe conoit Bovo a l'armaire / et a li grant colpi de lançe, e forment se dota.]

Laisse 86

Quant qui de Françe ont Bovo veuç,

Li plus ardi est coardo devenuç;

E li plus sajes est par fol tenuç. (1795)

Do de Magançe nen fu pais esperduç;

3545

Una (spea) tent dont li fer fu aguç.

Le destrer ponçe qe randona menuç;

Apreso Bovo oit un d·i so feruç,

Li qual estoit son amigo e son druç. (1800)

Ne li valse auberg ni escuç;

3550

En me li canpo li çetò morto e sperduç.

Bovo le vi, tot en fu irascuç;

Ben li conoit a l'arme de le scuç;

Punçe Rondel, sovra li fo coruç. (1805)

Rubric 86

[Coment Bovo a(v)oit gran dol de son çivale(r)s / Qe Dodo avoit morto e comente le voit ferit.]*

Laisse 87

A gran mervele fu Bovo orgolos,

3555

Fort et ardi e de mal sofraitos.

En bataile fu a mervele ençegnos;

Vide son çivaler morir tot a estors,

De dol q'el oit, deventa tot ros. (1810)

Quant vide Dodo, tuto fu doloros.

3560

Quant Teris le dist, "Qe faites vos?

Secorés nostra jent qe sont en gran pavos,

Ça plus de cento ne sonto de le çevo blos."

E Bovo adoncha punç le milsoldors (1815)

Entro lor fer como fust un dra(g)oç.*

Rubric 87

[Coment fu grande quella bataille; e coment / Teris oncise don Albrigo, qe frer estoit Doon.]*

Laisse 88

3565

A grant mervelle si fu Bovo valant;

Ni ait nul si argolos ni valant

Q'elo li fer cun Clarençe li brant,

Qe en soa vite el vada vantant (1820)

Q'el no le çeti morto o recreant.

3570

Nean Teris ne fu pais enfant;

Le rege cercha e darer e davant.

Grande fu la bataile, mervelosa e pesant;

Teris reguarde una arçea davant,* (1825)

E voit don Albrigo venir speronant.

3575

Quando le vi, no l'apella de nojant;

A ferir le voit con la spea trençant

Desor li eume, qe tot li p(e)rfant.*

No li valse la cofie un diner valisant; (1830)

Morto l'abate in me logo de·l canp,

3580

Q'el non parlò, ni non dise niant.

Quando Dodo le vi, nen fo mais si dolant;

El vide ben sa morte li vait aproçant,

Quant vi son frer cair de l'auferant. (1835)

Voluntera guinchese, mais li cor no li consant;

3585

E quando el vait Bovo reconoscant,

E vi Clarençe tuta tinta de sang,

S'elo se smaie, ne vos çi mervelant.

Por gran paure, se vait guiscant, (1840)

E ven a·l pavilon, vi le rois enseant.*

3590

Elo li parloe, si le dist altemant:

"Ai, rois de Françe, el vos va malamant;

De nostra jent son morti mille sesant,

E a gran perigolo stoit li remanant. (1845)

Morto est mon frere, qe je amava tant."

3595

Li rois l'intende, por pois d'ire non fant;

En pe se drice por ire e maltalant,

E fa soner ses graile en ojant.

L'oriaflame fa desplojer a·l vant; (1850)

Li rois meesme prise son guarnimant,

3600

E Aquilon e li conte Morant,

A çival montent, li petit e li grant.

Rubric 88

[Coment li rois con tota sa baronie montarent; / e coment fu grande quella bataille in le canp.]

Laisse 89

Va s'en li rois, non ait qe coruçer;

Quant en l'estor elo vait a intrer, (1855)

Ses graile fa soner e davant e darer.

3605

Qi donc veist grant stormen començer,

Tant pe, tant pugni, e tant teste couper;

Grand è el dalmaço, ne se poroit staurer.

Li rois de Françe fu orgolos e fer;* (1860)

Brandist un aste, dove li fer fu d'açer,*

3610

Por maltalent ne vait un a çoster;

Morto l'abate, q'elo vede un (miler);*

Bovo le vi, molto li parse nojer.*

Ben li conoit, e le çerchò d(a)rer.* (1865)

Encontra lui stratorna son destrer;

3615

En me la voja encontra Morando de River.*

No li conoit, mais gran colpo li fer,*

Qe a la tere li fait trabuçer.

O voja o no, li oit por presoner; (1870)

A soa çent li doit a guarder,

3620

Dedens Antone li fait amener.

Li rois le vi, cuita li seno cançer;

Volunter ferist Bovo, quando se trait arer.

Rubric 89

[Coment Bovo d'Antone abatì Aquilon de·l çival, / e si l'oit por proesoner, si l'invoja en Antone avec . . .]*

Laisse 90

Por me li canpo si se vait Bovon; (1875)

Ben fu armés desor son aragon.

3625

El prist un aste qe furent d'un peon,

E vait a ferir sor le scu Aquilon.

Le scu li spece mais l'auberg fu bon;

L'asta fu roide ne s'en fi pais tronchon.* (1880)

El çivaler est de gran renon;*

3630

O voja o no, l'abatì a·l sablon;*

O voja o no, si l'oit por preson;

En Antona l'invoja, o il volist o non.

Quant en Antona fu mena Aquilon, (1885)

Quant Synibaldo le vi, ne le dist se ben non;

3635

El e Bernardo, le segnor de Clermon,

A Druxiana (l)i dà en sa prison.*

E ela fu saça e de bona rason,

Dist a Synibaldo, "Qi son quisti baron?" (1890)

Et elo l(e) dist, "L'uno è·l dux Aquilon,*

3640

E li altro est Bernardo de Clermon.*

En tota Françe et in la legion,*

Dos major baron atrover non poron;

E de li rois i sont conpagnon.* (1895)

Li rois non prende conseil se çestor no li don."

3645

Dist Druxiana, "E nu li guardaron;

Tel preson li daron cun a lor converon."

La çentil dame, qe fu de gran renon,*

Por man ela prist anbesdos li baron (1900)

E si le parle si le mis por rason:

3650

"Segnur," fait ella, "e vos do la preson,

Tota sta sala, li palés e·l dojon;

Por amor de Bovo, e vos faço ste don."

Rubric 90

[Coment li presunés fu doné a Druxiane, / e cella li mis por rason de son afaire.]

Laisse 91

"Segnur," dist Druxiane, "de la vestra venue (1905)

A gran mervelle me delete et a<r>gue.*

3655

De Bovo son sa muler e sa drue,

E son cella dama q'el avoja perdue.

De mala preson vu sì ben asolue,

Quant li traitor seroit confondue (1910)

E nostra jent seroit revenue,

3660

De vos ert molto bona proveue."

Quant li baron oit la dama entendue,

Nen le fu cil q'en fust irascue;

I la mercia, dolçement la salue. (1915)

Rubric 91

[Coment Drusiana fait grant / onor a li baron de Françe.]

Laisse 92

Quant li baron oit la dama oie,

3665

Q'ela li fa cotanta cortesie,

Çascun de lor dolçement la mercie

De le parole l'oit molto agraie.

"Segnur," fait ela, "tuto ço qe vos delie, (1920)

Diés·le moi, qe tot serà conplie."

3670

"Dama," dist Aquilon, "ça por nostra stoltie,

Ne qe por nos fust otrié ni graie.*

Non venimes ça en cesta oste banie,*

Ançi fo par nos tota fois contralie. (1925)

Mais li rois de Françe, par soa leçerie,*

3675

Consentì a Dodo de venir en sta vie.

Volunter aumes refusé sa conpagnie,

E de ço ben soit Deo, le filz sante Marie,

Qe asa contradise de questa gran folie.* (1930)

Mais li rois de França, por la gran manentie,

3680

Qe li donò li traito, qe Damenedé maldie,

Qe li rois n'avoit si le cor enbrasie,

Qe nul conseil no le valse a una alie

Qe lu poust retrar de soa vie." (1935)

Dist Druxiana, "Ço fu gran briconie."*

Rubric 92

[Coment Druxiana faxoit grant honor a qui çivaler / qe Bovo ma(n)doit por pris e si diron de la bataille.]*

Laisse 93

3685

Lasen de Druxiana, e d·i dos çivaler;

Tel preson oit, cun i demanda e quer,*

Asa stoit mejo qe eser a·l torner;*

I no sa ren querir ni demander* (1940)

Qe Druxiana ne li faça aporter;

3690

Si çoga sego a schachi e a tabler.

E Bovo fu en le stormeno plener,

E ten Clarençe, qe li dè sa muler.

Tanti non fer cun li brant forbi d'açer, (1945)

Qe in soa vie jamais non quer mançer.

3695

E Teris non fu mie lainer;

I cercha Dodo, e davant e darer;

Quando no·l trova, cuita li seno cançer.

De çella jent de França e de Baiver, (1950)

Plus de cento n'oit por personer,*

3700

Qe tuti font en Antona mander,

A Druxiana toti apresenter.

Grande fu la bataila, e li stormeno capler;

Tanti pe, tant pugni e teste da coper, (1955)

E tant çival, voide sele, scanper.*

3705

Li rois le vi, non po star de plurer;*

El maldist Dodo e sa muler.*

Mais no li valt la monta d'un diner,*

Qe Bovo non spar(m)ia ni amigo ni frer.* (1960)

Mejo fust a·l rois, an saça primer*

3710

Coment l'ovra deust afiner,*

Qe metere a mort tant bon çivaler.

Rubric 93

[Coment fu grande quella bataille, e coment / Bovo va cerchando Do de Magançe par tot li canp, / Q'el i <trova> e si le oncis e fu vençé son per.]*

Laisse 94

Bovo çivalçe qe oit gran dolor,*

Quant il no poit atrover li traitor (1965)

Qe oncis son per vignando da estor.*

3715

El oit guardé a l'onbra d'un arbor;

El vide Dodo ilec a seçor.

Quando Bovo oit veçu quel contor,

S'el oit çoie, ne l'oit unqe gregnor; (1970)

El ne regracie Jesu le Criator.

3720

E Dodo reguarde, si n'oit gran paor;

Qe por paure, nen pote star non plor;

Voluntera en faist retor.

Quando Bovo punçe le milsoldor, (1975)

Si le iscrie, "Non alirés, traitor!

3725

Mal veisés Blondoja, ta usor!"

El ten Clarençe, li brando de color,

E si le vait a ferir por tel valor

Desor li eume qe estoit pinto a flor. (1980)

Cusi li trençe, cum una ramo d'arbor;

3730

Trosqua in le spale li trença tot a estor.

Morto l'abate de·l destrer milsoldor;

"Via," (f)ait il, "malvasio traitor!"

Doné vos ai l'onguento de l'altro jor." (1985)

Li rois le vi, el n'oit si gran paor,

3735

En soa vite no l'oit unqa major.

Rubric 94

[Oi avés con Bovo oit morto Dodo de Ma/gançe, e vençé la morte de son per.

Or oldirés . . .]*

Laisse 95

Or oit Bovo son pere ben vençé;

Damenedé si l'oit molto amé,

En tote colse servi et honoré. (1990)

El vi li rois toto quanto spaventé;

3740

Voluntera s'en fust via alé.

Mais Bovo oit infra de soi rasné,

"A, rois de Françe, pa(r) toi son travalé;

Nen vos vantarés a Paris la cité (1995)

Qe vos m'aça qilois asedié;

3745

Mais no ve ofendì in moja viveté."

Una aste demande, tosto li fu aporté.

Non volse ocir li rois, qe li parse peçé,*

E q'el ne seroit durament blasmé.* (2000)

Li fer davanti; el se mise daré,*

3750

Com li restojo, tel colpo li oit doné,*

Qe a la tere li oit trabuçé.

Avantqe il fust en estant levé,*

Bovo li fu sovre cun Clarença sa spe; (2005)

E li rois li quer merçé e piaté:

3755

"No m'oncir, Bovo, qe t'en prego por Dé!"

E Bovo fu cortois, si li tole la spe;

En braçe li prent, belament e soé.

A çival le mis, Teris oit apelé, (2010)

"Mena li rois in la nostra çité;

3760

A Druxiana el soja apresenté,

E si le dites qe ben en soja guardé,

Tantqe eo averai li canpo delivré.

De mon per ai ben vengança pié; (2015)

Morto ai Dodo a·l trençar de ma spe;

3765

Ormais averon paxe e t<ranq>uilité,*

Si seçornaron d'inverno e d'esté."

E cil responde, "Ben serà otrié."

Rubric 95

[Coment T(e)ris mena li rois Pepin / e(n) Antone e si·lle presenta a Drusiane;

e como Aquilon ne menoit gran çoie.]

Laisse 96

Via va Teris qe li rois convoja; (2020)

Cento çivaler avec lui mena.

3770

Ven a 'Ntone, la porta trapasa;

E Druxiana encontra li ala,

E si le dist, e si demanda,

"Qi est de Bovo? Dites, coment il sta?" (2025)

"Por ma fois, dama, gentilment nos va.

3775

Vinto è li canpo, mais nen no serà;*

Dodo è morto, qe tant pené nos (à);

L'osto de França jamais no restorerà.*

Veés li rois, qe ça lì amena?* (2030)

Bovo vos manda, se de ren vu l'ama,

3780

Qe lo guardés tantq'elo revirà."

E Druxiana por la man le pia,

Avec li altri ela si l'amena.

Aquilon, quant le vi, gran çoja en mena; (2035)

De lui s'en rise e si se ne gaba.

3785

E Druxiana paxe no l'oblia;

Grant honor le fi, cun a rois enclina;

E·l pro Teris a li canpo torna.

Rubric 96

[Coment fu fenia la bataille dapois/qe Doo fu morto e li rois Pepin pris.]

Laisse 97

Quant Bovo oit ben aconpli son talant, (2040)

Et oit morto Dodo de Maganç,

3790

E preso li rois e d·i altri ben tant,

Com a lui vene en voja e in talant,

Vinto e sconfito el avoit li canp.

Recolse la proie e l'ar coit e l'arçant, (2045)

Tende e pavilon se fait porter avant.*

3795

Vent a Antone gran çoie demenant;

Ne le f<o> nul ni petito ni grant,*

N·en menì destrer o palafro anblant,

Quant in Antone i intra primemant. (2050)

Contra li vent Druxiana en riant,*

3800

E Synibaldo avec lei ensemant.

Druxiana l'apele, dolçement en ojant,

"Bovo," (f)ait elle, "con vos ert convenant?"*

"Molto ben, madame, mercé Deo e sant. (2055)

Vençé ai mun pere ver li traiti de Maganc,

3805

Morto e ò Doon a·l trençer de mun brant,

E Teris son frer, e son filz ensemant.

A vos envojè un tesor ben si grant,

Qe plus valt qe l'onor de Brusbant, (2060)

Qe vos avés Pepin, li rois de Frant,

3810

E de sa cort li çivaler plus grant."

Dist la dama, "Mile marcé vos rant."

E Druxiana nen demorò niant;

Por la man prist Bovo li conbatant; (2065)

Desor la sale le menò en riant.

3815

Ilec trovò li presoner seant -

Çogent a schachi et a tables lì alquant.

Quant virent Bovo, se levent en estant;

E Bovo dolçement li demant: (2070)

"Çugés, segnur, fa vos legri e çojant,

3820

Qe en petit d'or(e) vos (mua)rò convant.*

Metere vos farò en le perfondamant

D'una gran tor o è oscure tant.

Mais non verés li sol ni la luna lusant; (2075)

Ilec murirés a dol e a tormant."

3825

Li rois quando l'oldì, oit paura si grant,

Ne l'oit tel unques a son vivant.

E Druxiana s'en rise bellemant;

E dist a Bovo, "Vu nen farì niant; (2080)

Delivré m·i avés, fa<rò> li me talant."*

Rubric 97

[Coment li rois de Françe avoit gram paure / Quando Bovo li menaçoit de metere i(n) la tor, / e ço qe Drusiane li fist, qe molto fu saçe.]*

Laisse 98

3830

Quant li rois de Françe oit la parole oie,

Saçés por voir, non à talent qe rie;

De gran paor elo se omelie.

E Druxiana ver de Bovo desie,* (2085)

"Le mon segnor, questo non farés mie;

3835

Doné me li avés in la moja bailie,

Non averà da nos altro qe cortesie."

Dist Aquilon, "Vu farì gran stoltie;

Ben devemo morir et en carçer perie. (2090)

Avantiqe de França nu fosemo partie,

3840

Ben disi a·l rois qe questo era folie,

De prender guera s'ela no li soplie.

E ben li remenbre tota l'ançesorie,

Qi fo Gujon e sa sclata antie; (2095)

Jamais da li rois non farent partie,

3845

E senpre tenent la soa conpagnie.

Li rois de ço ne me volse croir mie;

Qi de Magançe el volse por amie,*

Qe ont França morta e perie. (2100)

Ça ste dalmaço non serà restaurie;

3850

Se vu n'apendés vu farì cortesie.

De mia vite non darie una alie,

Poisqe li rois avés in la vestra bailie."

Rubric 98

[Comente Aquilon de Bavire parlò a Bovo; / Coment Bovo li respose, e Durisiane.]

Laisse 99

In estant fu leveç Aquilon; (2105)

El dist a Bovo, "Ja ne vos çelaron;

3855

Ne eo ni Morando, ni Bernardo de Clermon,

Non receumes da D(o)o reençon.*

Pepin le fi entro lui e Duon;

Ben le contradise, planament a laron;* (2110)

Mais no me valse valisant un boton.

3860

Li rois ovra, ne no fe cun saç hon,

Quant fi asenbler de França e de Lion

La çivalerie e tot li baron,

Por venir a Antone, a mover tençon; (2115)

Mal voluntera e fo so conpagnon,

3865

Mais de la colse ne disi ne si ne non;

Obeir me convene si cun fare devon."

Li rois l'oì, si fronçì li gregnon;

De gran paure ven roso cun un carbon; (2[1]20)

Ne le voria eser par tot l'or de·l mon.

3870

E dist Bovo, "Entendés, Aquilon,

Ben vos conosco e qi de vos son;

Dolente sui de vos e de li conpagnon,

Quant por folie estes en sta preson; (2125)

E por altru ovre portarés pasion.

3875

Ad apender li rois ben seroit rason;

Ben me cu(i)toit metere a destruction,*

Quando cun Doo el se fe conpagnon,

Por venir a 'Ntone a mover tençon, (2130)

Zuzé serà si cun li converon."

3880

Li rois si trenble de paura qe il on,

E Druxiana si s'en rise a foson,

E dist a li rois, "Laseç dire Bovon;

Ço q'elo dist no monta un speron." (2135)

Rubric 99

[Coment Bovo fi grant honor a li rois, / e si aparilent li (tables) et alent a mancare,

E poi(s)q'(i) ont mançé tratarent de la pax.]*

Laisse 100

Druxiana, la dama, nen volse demor(er);*

3885

O vide Synibaldo, si le prist a 'peler,*

Si fe le tables guarnir e pariler.

E Druxiana, qe tant fait a loer,

Li rois Pepin vait por (m)an cobrer: (2140)

"Venés," fait ela, "aliron a mançer."

3890

E cil le fait, de greç e volunter.

E Bovo prist Aquilon de Baiver,

E Teris prist Morando de River,

E dan Sinibaldo nen fu pais darer; (2145)

Avec Bernardo se vont aseter.

3895

E Druxana tant se fe aloer,

Qe cun li rois ela fu a taler.*

Mais li rois fu a li çevo primer;

De gran dolor non pooit mançer. (2150)

Mais Druxiane le prist a conforter,

3900

Q'el no se diça de nula ren doter,

Qe cum Bovo li farà acorder.

E Aquilon prist Bovo a 'rasner

De molte colse dir e diviser, (2155)

E cum quella colse en poroit aler,

3905

Qe cun li rois se poust acorder;

Qe amisi fosen como erent en primer.

E dist Bovo qe apreso mançer,

Con Sinibaldo se vorà conseler. (2160)

Dist Aquilon, "De ço est agraer."

3910

Quant ont mançé, font le table lever,

E li baron si se vont a laver;

Por li palés se vont a deporter.

Rubric 100

[Coment li rois alirent por li palés deportant / E virent in le mur serée dame Blondoie et ella . . .]

Laisse 101

Si cum li baron furent por li palais alé, (2165)

En un canton de la sala pa(vé),

3915

Vide Blondoja en le mur aseré.

Quant la virent son a le aprosmé,

E si la conoit si l'oit aderasné:*

"Dama," font il, "coment vos esté?" (2170)

"Pur mal, segnur, si con vos veé;

3920

Qui fo pene(te)ncie de tot li me peçé.*

Mon fio Bovo m'oit qilo seré.

Qi estes vos, segnor? No me·l çelé."

"Dame, de França, de·l major parenté;* (2175)

E cestu ert li nostro rois clamé.

3925

Bovo n'avoit qi por presoner mené."

Dist la dama, "Dites moi verité;

Qe est de Doo? Est il arer torné?"

"Nenil, madame, el oit malovré; (2180)

Bovo s'est ben de lui delivré.

3930

Dodo est morto cun una sa rité."

La dama l'olde, par poi n'oit li seno cançé;

De gran dolor la dama fu pasmé.

Or ve·la ben, qe est abandoné; (2185)

Ela li quer merçé e piaté:

3935

"Segnur," fait ela, "e vos prego por Dé,

Qe a mon fio vu si me recordé,

Dapoisqe il oit li son per vençé,

De moi el faça la soa volunté. (2190)

Mejo me seroit eser en un fois brusé,*

3940

Qe en ceste mur stare quilo seré."

"Dama," dist li rois, "vu aveç ben parlé.

Vu non savés mie como nu avon ovré;*

Si durament Bovo n'à menaçé, (2195)

De nu apendre por la vestre bonté.

3945

Se avec lui nu seren acordé,

De vu, madame, li serà ben rasné."

Dist la dama, "Mile ma(r)çé n'açé."

E Bovo n'oit mie la ovra oblié, (2200)

Qe Aquilon li oit dito e conté;

3950

A Sinibaldo el s'est aconselé.

Rubric 101

[Coment Bovo se consela a Synibaldo e a Teris, / e a dama (D)rusiane de ço que Aquilon li avoit / a la tabra deras(n)é, e prist son conseil.]*

Laisse 102

Bovo se parte de la sala pavée;*

Por me la man oit Sinibaldo piée.

Rois, Teris, Druxiana la ensenée (2205)

En una çanbra entrent a la celée;

3955

Desor un banc furent asetée.

"Segnur," dist Bovo, "ben est nos encontrée,

Quant en ma vie e sui tanto penée.

Ora m'à Deo quel dono donée,* (2210)

Qe senpre li ò queri e demandée,

3960

Qe tanto poust viver in atée,

Qe eo aust li mon pere vençée;*

Et eo de ço en sui ben delivrée:

Vençé li ò a·l trençar de mia spee. (2215)

Preso nu avon de França li regnée,

3965

Tota flor qe po eser trovée,

Si avon li rois e(n) nostra poestée.

Car or me soja li mon consejo donée,

De lor tenir o eser delivrée." (2220)

Quant qui l'intent, çascun fu porpensée,

3970

Mais Druxiana oit primeram parlée,*

Si como dama saça e ben dotée.

"Bovo," fait ela, "se ben vos remenbrée,

Ço qe vos est venu e incontrée, (2225)

De tante pene cun aveç endurée

3975

Par tot li mondo e davant e darée,

E in preson è a morte çuçée,

Or vos oit Deo a tal porto menée

Qe retorné estes in la vestra citée,* (2230)

E da vestri enemisi vos estes delivrée;*

3980

E vestre per vu avés ben vençée.*

Or non avés plu de querir meslée*

Vu avés qui de França li bernée;*

Li rois meesmo aveç qui amenée.* (2235)

Çascun en soja tant honorée,

3985

Como çascun v'avese ençendrée.

Se i vol pax, par Deo, no la vée."

Rubric 102

[Coment a Drusiane parle Synibaldo / e si·lli dona li lojal conseil e li bon. ]*

Laisse 103

Sinibaldo parloe, qe oit li cor çojant,

"Bovo," fait (il), "tu consejo demant.* (2240)

Druxiane vos dona si bono e saçant,

3990

Ne son celu qe die plu avant,

Mais una colsa faroie por eser plus manant:*

A cil baron de·l reame de Franc,

Si vol avec vos pax e acordamant, (2245)

Ne li laseç aler si por niant,

3995

Se da lor non avés ostajes de ses enfant,

De non far·ve guere ni bubant,*

En soa vie da ste jor en avant."

Dist Bovo, "Ces consei est avinant; (2250)

Non est sajes qe questo ne contant."

4000

De la çanbra ensirent, Bovo vene avant;

O vi li rois, por me la man li prant,

Et Aquilon el prist ensemant;

E Sinibaldo si oit pris Morant. (2255)

A un canton se trait a parlamant;

4005

"Bon rois de Françe," dist Bovo en ojant,

"E vojo ben qe saçés a siant,

Quant nos fuimes a li torniemant,

Ben vos poeria oncire a·l trençer de mon brant,* (2260)

Da la lança da li fer trençant,

4010

Quando cun le restojo vos abatì a·l canp.*

E vojo avec vos pax e acordamant;

Ma vojo aver da vos ostajes bon e çant.*

Çascun de vos me donì ses enfant; (2265)

Avec moi le tirò a mon talant.

4015

Et ensi vos alirés baldi, legri e çojant."

Dist Aquilon, "Et altro non demant;

Lì me farò venir tot primeremant."

E dist li rois, "Et eo ensemant. (2270)

Lì farò venir Karleto, mon enfant."

4020

E dist Bovo, "Milor non demant."

"Qi lì alirà?" dist Bovo en ojant;

"Morando de Rivere, se vos li consant."

E dist Bovo, "Va aseguremant. (2275)

Meni li enfant avec lui ensemant."

4025

E cil responde, "Ben farò li convant."

Rubric 103

[Coment li rois parole a Morando de Rivere / Q'elo die a la raine Berte q'ele envoi son fil.]*

Laisse 104

"Morando," dist li rois, "e vos vojo projer,

Se unchamés vu me deveç amer,

Qe vos diça a nos tosto reparier. (2280)

Direç a Berte, moja çentil muler,

4030

Q'ela me diça ses filo envojer,

Qe se eo vojo en França reparier,

El me lo conven por ostajes laser

A Bovo d'Antone, li cortos e li ber; (2285)

E de nula ren no se diça doter,

4035

El non averà onta ni engonbrer;

Tosto averà a (n)os reparier."*

E dist Morando, "Alirò sens tarder."

Bovo li fait son çival delivrer, (2290)

E in apreso li arme e li corer.

4040

Un altra colsa fi Bovo da loer:*

Qe tot les autres qe erent presoner,

Toti li fait de preson delivrer,

Si le fa donar le arme e li destrer, (2295)

Q'i aportent quando vene a çostrer,

4045

Purq'i le posa conoser ni trover.

Rubric 104

[Coment s'en vait Morando de Rivere e li altri / Qe a l'istor furent pris si arent gran çoie.]*

Laisse 105

Via çivalçe Morando sença dotançe,

Avec lui avoit li presoner de Françe.

Par tota Françe aloit la nomenançe, (2300)

Qe preso estoit li rois, qe tot li autri avançe.

4050

Por Doo fu gran dol en Magançe;

Va s'en lo meso, qe non fe demorançe;

A l'intrer de Paris fu gran piatançe;

Le bele dame avoit gran pesançe, (2305)

Por ses mari sont en gran dotançe.

4055

Avantqe Morando alase a sa abitançe,

Ne qe il veist sa feme ne ses enfançe,

El misi çoso el scu e la lançe,

E si desis de li palafroi blançe. (2310)

Monta a·l palés sença nulla tardançe;

4060

Ilec trovò la raina de Françe.

Quando ela·l vi, si ne fu en gran balançe,

Por oldir novelle tot les autri avançe.

Rubric 105

[Coment Morand(o) entrò en Paris, e desis / a·l palés et aloit parler a la raine.]

Laisse 106

Davant la raine fu Morando en estant, (2315)

O il parole altament en ojant:

4065

"Çentil raine, entendés mun talant;

Li rois Pepin a chi França apant

Par moi vos mande, qe le sieç guarant.

En preson l'oit Bovo li conbatant, (2325)

E Aquilon e Bernardo ensemant.

4070

Par moi vos mande, se l'amés de nojant,

Qe l'invojés Karleto vos enfant.

Por ostajes serà en Antona là dant;

Tant cun a Bovo vegnirà por talant. (2325)

Ne vos dotés q'el aça enojamant,

4075

Qe Druxiane si est tant avenant,

Ela·l tirà avec ses enfant."

Dist la raine, "Vu parlé de nojant;

E li envojaria s'en aust ben çant. (2330)

Or li prendés, faites li ves talant."

4080

E cil le fait, alo demantenant;

Nen demorò e·l palés longemant,

Si cun da li rois avoit li comant.

El prise Karleto et un altro enfant, (2335)

Filz Aquilon, ben fu reconosant:

4085

Naimes avoit nome, si l'apela la jant;

Cosi petit avoit seno tant,

No le savoit conter nul hon qe soja vivant. *

Via le mene cun gra(n)z çoie façant. (2340) *

Rubric 106

[Coment Morando de Rivere enmena li / (e)n/fant Ka(r)leto e Naimon e retorna a 'Ntone.]*

Laisse 107

Via s'en vait Morando de River,

4090

Avec lui anbes li baçaler.

El non finò de broçer e d'aler,

Tantqe Antone se prist a 'prosmer.

Contra li vait peon e çivaler; (2345)

Karleto vi son pere, si le corse a 'braçer;

4095

E Naimes, Aquilon son per.

Gran fu la çoie de qui du baçaler;

Dos plu be enfanti ne se poroit trover.

Gujon e Synibaldo le corse a'mbraçer, (2350)

E qi son filz de Bovo e de sa muler.

4100

Druxiana le vi, si·n prist a larmojer;

Ela se pense de li tenpo primer,

Quant li convene por li bosco porter.

Lor dist a li rois, "Non aça re penser; (2355) *

Avec moi averà demorer,

4105

E si cun filz e tenir e guarder."

Li rois l'oldì, pris la mercier;

"Segnur," dist Bovo, "or no vos dè nojer;

A vos plasir soja li star e de aler." (2360)

Rubric 107

[Coment Drusiane parole a li rois et a li atris* / Baron e coment li on<o>ra e si le fi vestir e li rois . . .]

Laisse 108

Druxiana fu saça e de grande renon;

4110

Meltre dama trover non poroit hon:

Molto fu saça, e de bona rason

Avantqe se partise de ilec i baron,

Vestir le fait d'un vermi siglaton. (2365)

Dist a li rois, "Non ajés dotason,

4115

De ves enfanti ne de vestri garçon;

En breve tenpo nu vos envojaron.

E die e noit avec moi seron;

Cosi li tirò cun Sinibaldo e Gujon; (2370)

Jamais da Bovo nen averà si ben non."

4120

Dist li rois, "A Deo benecion;

E li comando en vest(r)a sobecion."

Dist Druxiana, "E cosi li tolon;

A Deo, e a vos, nu si li comandon." (2375)

Li rois de Françe non fi demorason;

4125

O el vi Bovo, si le dist son sermon:

"Bovo," fait il, "si cun vestre preson,

Me delivrés, moe et Aquilon, *

Morando de River, e Bernardo de Clermon, (2380)

Delivrés nos, qe aler s'en poson."

4130

E Bovo dist, "A Deo benecion."

Bo<v>o li done palafroi e rençon,*

E por çascun bon destrer aragon.

Quant li rois e le dux Aquilon (2385)

S'en volent aler, veent ses garçon;

4135

I le segnent de le benecion:

A Deo li comanden, e a son santo non.

Bovo s'en rise, cojament a laron; *

E dist a li rois, "Non aça dotason, (2390)

Qe vestre filz non reman en prison.

4140

En breve tenpo nu vos l'invojaron;

(V)e filz serà cun Sinibaldo e Gujon."

Li rois e le dux Aquilon

Si le mercie quant il poit e·l mon. (2395)

Rubric 108

[Coment (Pepin) avantqe s'en volust aler / Recomanda Karleto, son fiu, a Drusiana.]

Laisse 109

Li rois Pepin nen volse demorer;

4145

El dist a Bovo, "Ne vos (vojo) nojer; *

Senpre vos do servir et honorer.

De una ren vos voria projer,

Se ma pregere en poust çoer; (2400)

Qe vos remenbré de cele vestre mer,

4150

Qe tanta pena li faites endurer.

No la lasés en cele mur ester!

Dach'è morto Dodo, vestre guerer,

En cui la dama avea soa sper, (2405)

Or la farés guarder un monester,

4155

O ela posa Damenedé projer,

De ses peçé se posa amender;

Ancor se poit la soa arma saluer.

Vestra mer est, ces non poés çeler." (2410)

E dist Bovo, "Tuto ço laseç ester,

4160

Qe por so ovra fo morto mun per.

Quant me porpenso q'ela, me fasoit raçer.

E de mançer no me volea doner;

Plus de tros çorni me fasea ester. (2415)

E quant por pietà eo le querì da mançer,

4165

Cun un paon me volse envenener;

Dont me convene ad inçegne sçanper,

E çorno e noit me fa star en penser.

E de le me prega Druxiana ma muler. (2420)

De le farò ço q'e ò in penser;*

4170

Mais qe a le deust ben guarder-*

Ad albespine la deveroit far bruser."

E Druxiana prist li rois a guarder;

Segno le fait, nen diça plu parler. (2425)

Le rois de France nen se volse entarder;

4175

Por man el prist Aquilon de Baiver;

Desis de le palés, ven a çival monter.

A Druxiane pris conçé demander,

Li dos enfanti li lasò a bailer, (2430)

Et ella le prist de greç e volunter.

4180

Li rois se monte por volor soi aler,*

Et avec lui Aquilon de Baiver,

E Bernardo, e Morando de River;

Mais Bovo ne volse l'ovra oblier; (2435)

A çival monte, cun Teris e Rainer,

4185

Et avec lui plus de mil çivaler.

Li rois convoja plus de dos leges enter;

Quant à ço fato, q'i volent retorner,

A Deo li comande, si le lasa aler. (2440)

Rubric 109

[Comente li rois de Françe s'en tornarent / E(n) Françe, et avec lui Aquilon de Baviere.]

Laisse 110

Va s'en li rois, qe conçé oit pié;

4190

S'el oit çoja, or non demandé,

Qe de la morte molto fu spaventé.

Sor tote ren oit Bovo laudé,

E Druxiane, la saça e l'ensené. (2445)

Tant est a(l)é por vie e por stre, *

4195

Ven a Paris, soa nobel çité.

Quando la vi, n'oit Deo aoré;

Ven a·l palés, monta sor li degré,

E la raine li est encontra alé. (2450)

La prime colse donde l'oit demandé

4200

Fu de Karleto, soa nobel rité.

"Dama," fait il, "de lu ne vos doté;

A bon hoster nu l'avemo ostalé,

E per e mer el oit trové. (2455)

Dama Druxiana li ten por soa rité;

4205

Davanti le senpre i stont en pe,

Cum du ses filz li oit aconpagné."

Dist la raine, "Ela fa gran bonté;

Ela ne sia da Deo merité." (2460)

"Çentil raine, ora ne vos doté;

4210

Quando d'Antona eo me fu sevré,

I m'en promise por la soa lialté

Qe in breve termen, ne seroit envojé."

La dama l'olde, si n'oit larmojé. (2465)

Rubric 110

[Coment ancor parloit li rois a la raine, / Si li conta tuto l'afar de Bovo.]*

Laisse 111

"Çentil raine," dist li rois en ojant,

4215

"De cele Bovo e vos dirò alquant;

Qi cerchase li mondo, tuto d'in cant en cant,

Non trovaria un milor conbatant.

A li ses colpi non dura hon vivant. (2470)

Veor·le çostrer est un ençantamant,

4220

Q'el i atent un colpo de li brant,*

Mais en sa vie el non serà çojant.

De soa mer vos dirò li senblant;

Sor li palés en la sala plus grant, (2475)

L'oit serea en un muro davant,

4225

Porçoqe de son pere ela fi tradimant.

Una dama oit, qe est si saçant,

Qe çerchese ben li mondo tot quant,

Non trovaroit una soa parisant. (2480)

Tanto n'oit fato e darer e davant,

4230

Qe senpre serò ses benvojant.

Davanti nos el lasò nostra çant;

A tuti donò arme e guarnimant,

E nu si fe vestir cun est aparisant, (2485)

Si ne donò destrer e palafroi anblant;

4235

Pois si ne convojò dos legues en avant."

Dist la dama, "Laudés Deo e sant,

Qe sì scanpé da morte e da tormant.

Ma noportant conseil avisi d'infant, (2490)

Quant por le dito de Dodo de Maganç,

4240

Volivi prendre li altru casamant.

Se ben vos è venu, e si vos faites çojant,

De tel folie ma non ajeç talant."

Rubric 111

[Coment Terise se departe da Bovo / e prist conçé e aloit en son r(iam)e.]

Laisse 112

Quant li rois fu sor la sala pavé, (2495)

S'el oit çoja or ne m'en demandé.

4245

Or lasen de li rois, qe est çojant e lé;

Quant i se partì d'Antone, avoit ben ovré.

Conter vos vojo de Bovo l'aduré,

E de Druxiana, la saça e l'insené, (2500)

E de Teris, li bon rois coroné,

4250

Qe de Baldras el fo signor clamé;

E de Sindonie, e de longo e de lé.

Tant estoit en Antone como li vene a gre,

E quando a lu plait, el domandò conçé; (2505)

E Bovo si le done, qe molto l'oit agreé.

4255

Adoncha entrent e(n) nef et en galée,*

E si s'en voit por me la mer salé,

Tantqe il fu a Baldras arivé.

E Braidamont li fu encontra alé; (2510)

De sa venue i se font molt lé.

4260

E Braidamont si le oit demandé,

De Bovo e de Druxiana, coment sont esté.

"Dama," dist il, "nu avon ben ovré.

Morto avon li traitor renojé, (2515)

Qe tanto n'oit pené e travalé.

4265

E Bovo e Druxiana si son cojant e lé;

Nen furent si en soa viveté.

Li rois prendimes, e d·i altri asé;

Donde Bovo è si aseguré, (2520)

Nen averà plu guera in son aé."

4270

Dist Braidamont, "Deo ne soit aoré."

E Teris, poisq'el fu retorné,

Se seçornent en soa viveté.

Rubric 112

[Coment Bovo por li conseil de Druxane e de Synibaldo / envoja a li rois Pepin et a Aquilon de Baviere ses / enfant; e pois (contaron) de Bovo ço qe li avenì in / Engeltere, o il aloit por veor ses oncle li rois Gui.]*

Laisse 113

Segnor baron, plaça vos d'ascolter, (2525)

Questo roman non est da oblier;

4275

Oir porés colse molto strainer,

Dont v'en porés de l'oir merveler.

Ancor non est li plais adefiner,

Nian de Bovo fenio li çanter; (2530)

Mais tot por ordene vos li averò conter.

4280

Dapoisqe li rois Pepin s'en retornò arer,

E Aquilon son mastro conseler,

Avantqe da Bovo se poust sevrer,

Elo le fe e ple(v)ir e çurer (2535)

Qe en soa vie ne le faria engonbrer,

4285

Si le lasent ses filz por mejo asegurer.

Ma Druxiane tant li pote projer,

Pasa li mois, elo li mandò arer.

Ne l'invojò mie a mo de paltroner; (2540)

Molto ben le fi vestir e adorner.

4290

E Sinibaldo fi a çival monter,

Avec lui ben cento çivaler;

Trosqua a Paris nen vorent seçorner.

Quando li rois vide li baçaler, (2545)

De quella colse molto le pris merveler,

4295

E Bovo desor tuti lolder,

E Sinibaldo altament gracier.

Grant fu la çoie qe font li civaler,

Mais desor tot Aquilon de Bavier. (2550)

El dist a·l rois, "Entendés moi, meser,

4300

Çamais cil Bovo no devon oblier.

Se par nul tenpo li aust mester,

Nu le devon secorer et aider,

E l'oriaflame en li canpo porter." (2555)

Dist li rois, "E l'ò ben en penser."

4305

A Sinibaldo, qe fu li mesaçer,

Elo le dist, "Entendés, amigo çer,

A Bovo d'Antone vu me deverés conter,

Qe li rois de Françe est ses presoner. (2560)

En soa vite no li stoit doter;

4310

Se par nul ren li aust mester,

Eo le secoreria a cento mil çivaler.*

Et eo meesmo, sor mon corant destrer."

E Sinibaldo, quant l'oldì si parler, (2565)

Altament le pris a gracier.

4315

Sinibaldo nen vos plu lì ester;

Conçé demanda, q'el s'en volea aler;

E li rois li dona palafroi e destrer,

Et a Bovo mandò doni molto strainer, (2570)

Por l'amistà tenir e conserver;

4320

E fi far letre, e brevi sajeler,*

Q'el l'invojò por celle mesaçer

A mostrar ben q'el no·l vol oblier.

Rubric 113

[Coment Sinibaldo s'en torne a 'Ntone et aporte / a Bovo l'a(n)basée, e li don qe li rois l'i(n)vo(j)a.]

Laisse 114

Sinibaldo s'en torne por le çamin feré; (2575)

A Bovo oit retorné soa anbasé,

4325

Ço qe li rois li avoit envojé,

E como fu servi et honoré.

Da tota jent molto fu agraé,

E queli brevi (qe) li ont bailé;* (2580)

Cil françe la çira, si oit dentro guardé.*

4330

Savés, qe li rois li avoit mandé*

Qe l'oriaflame estoit aparé,

E cil meesme si le vent a gre?

Se Bovo à çoie, or no m'en demandé; (2585)

El dist a Druxiane, "Bona fu la mandé,*

4335

Quando li rois de Françe tant s'è decliné

Q'el m'oit letre e brevi envojé,

Qe l'oriaflame si m'est abandoné,*

E il meesme s'el m'est a gre."* (2590)

Dist la dama, "Questo è voloir de Dé;

4340

Daqe vos estes ensi asegur(é),*

Or secornon a nostra volunté."

E dist Bovo, "E l'ò ben en pensé;

Ormais non dote plus d'omo qe soja né,* (2595)

Daqe mon per e ò molt ben vençé,*

4345

E li traitur morti et afolé,*

E moja mer e ò enpresoné,*

Qe por le fu tant pené e travalé."

Dist Druxiana, "Ben aveç parlé; (2600)

Dapoisqe Deo v'à celle don doné,

4350

Non devés mie vilan eser clamé;

Vu avés vestre mer, qe in ses ventre ve portè.*

S'ela de ves pere (ela) fi li peçé,*

E de vos, ora, li perdoné, (2605)

Q'ela non soja en celle mur muré.

4355

Se me la donés, e me la delivré,

En un monster e la meterò seré.

Ilec farà penetencie, e serà confesé

De ses peçé quant n'avoit ovré,* (2610)

Qe vos dè eser li pla plus alonçé."

4360

Tanto l'oit Druxiana e die e noit projé,*

Q'elo la oit enfine delivré.

E Druxiana non à l'ovra oblié;

Par son amor defor da la cité, (2615)

Ela avoit un monester fondé;

4365

E si ge l'oit metua e conversé.

Par son amor li fu cento entré,

Qe cella dame à con tot conpagné.

E Druxiana spese fois la visitè,* (2620)

E si li fa donar ço qe li vent a gre.*

Laisse 115

4370

Bovo seçorne e legro e çojant;

Plu no se dote de nul homo vivant.

Gran çoja oit d'anbidos ses enfant,

E de Druxiane dont durò penetant (2625)

Plus de sete ani tot enter pasant.

4375

Atant ecote vos un mesaçer erant*

Ven a Antone, monta a li pavimant.

O el vi Bovo, si le dist en ojant:

"Li rois d'E(n)geltere, qe est vestre parant, (2630)

A vos envoie, se l'amés de niant,

4380

Veneç a lu alo demantenant,

Por honorer sa cort e sa çant;

Qe muler, fila d'un amirant,

El oit doné a son enfant." (2635)

E dist Bovo, "De ço sonto çojant.

4385

Direç a mon u(n)cle qe farò son comant;

A lui virò ben e cortesemant."

S'el saust Bovo la pene e li tormant

Qe li avene por li so auferant,* (2640)

No le seria alé por mil marche d'arçant.

4390

Bovo si fo pro, saço e avenant;

Quela anbasea no misi por niant.

El s'aparele e ben e çentilmant,*

De bele arme e de be guarnimant, (2645)

E de celle colse qe a cort apant.

4395

Mostrer vorà li ses grant ardimant,

En totes autres eser reconosant.

Laisse 116

Bovo çivalçe a la çera ardie;

A gram mervele oit gran segnorie;* (2650)

De tote colse el fu ben guarnie.

4400

Tre sento çivaler oit en sa conpagnie;*

Zascun avoit richa roba fusie.*

Se il porà el non serà scrinie*

Qe nesun die qe non vaga un alie. (2655)

Quando çunse a la cort, molto fo honorie;

4405

Sor tot les autres el fu ben hostalie,

Da tota gente honoré e servie.

Li rois Guielme no l'obliò ne mie;

Senpre li tenoit en sa conpagnie, (2660)

E de la cort li onor otrie,

4410

Q'elo ne faça la soa comandie.

Bovo menò Rondel, qe li altri castie

A·l bagorder li altri no val un alie,

Por corer ni salir una poma porie; (2665)

Le filz li rois molto l'aco(v)otie.

Rubric 116

Coment Bovo fi far mervelle a·lli camp / de Ru(n)del son destrer; e coment le filz li / Rois li con(v)ota, si le demanda a Bovo.*

Laisse 117

4415

A gran mervele fu Bovo da loer;

Qi le veist sor Rondel son destrer,

Et avant e arer aler e tornojer,

Sor tot les autres el se fait apriser. (2670)

Le filz li rois qi doit avoir muler

4420

Quelo çival prist a covoter.

El dist a Bovo, "Bel cosin, dolçe frer,

Un don, cosin, e vos vojo demander,

Qe a moi deça donar quel destrer." (2675)

"Cosin," dist Bovo, "el vos fala li penser,

4425

Qe mon çival eo aça ben si çer

Qe no lo donaria por or ni por diner.*

E d'autra part ne vos vojo enganer:

El no se lasa a nesun homo toçer, (2680)

Nian strejar ne sor lui monter;

4430

El à ça morto plu de .XX. scuer."

Dist l'infant, "Tuto ço laseç ester;

Ben averò le çival acostumer."

"Cosin," dist Bovo, "asa se poroit parler, (2685)

Qe le çival nen vos poria doner,

4435

Se Druxiana no·l savese in primer;

Qe le norì tros ani tot anter,

Quando a Syndonia eo era presoner.

S'ela l'otria, no ve l'averò veer." (2690)

Quant voit l'infant no li valoit projer*

4440

Qe le çival el li voja doner,

Entro son cor el pensò mal penser:

Qe quando Bovo seroit a·l mançer,

El alirà li çival a furer, (2695)

En altre parte e condur e mener.

4445

Mal fi le penseir, si le conprarà çer,

Qe quela cort farà tota destorber.

Rubric 117

Coment le filz li rois, poisqe il voit qe / Bovo no li voit (doner) son destré, se porpensa / De lui furé; e quant lì aloit por prendre le / Çival, li oncis; fu de lu fato gram dol.*

Laisse 118

Li damisel, qi oit nome Folcon,

Quant il oit ben saçu da Bovon (2700)

No le donerà son destrer aragon,

4450

Ne no lo daria par or ni por macon,

Gran felonie vene en cor a·l garçon;

Qe quel çival, qe tant li paroit bon,

De lui furer por mal entencion.* (2705)

Dont apelò a si dos conpagnon

4455

A celle ore qe le tables ponon.

A mançer sest civaler e baron,

E avec lor si estoit Bovon.

Savés qe fi le damisel Folcon? (2710)

Entro le stalle el entrò a laron,

4460

E avec lui celle dui conpagnon;

L'infant non fu sajes, andò a l'aragon,

Si·l volse prendere por la caveça enson.

Rondel le guarda, qe non era Bovon; (2715)

Elo porprende atraverso li gropon.

4465

Strençe·l par forçe, si l'abate enson

Tant li dona di pe e por testa e por fron,

Qe ocli e çervele fi cair lì enson;

Morto le çete, sença redencion. (2720)

Quando le vi li ses dos conpagnon,

4470

Via s'en fuit, criando ad alto ton,

"A, çentil rois," ço dient li garçon,*

"Un çival, qe est de Bovon,

Si oit morto vestre fio Folcon." (2725)

Li rois l'intent, ven tinto cun un carbon;

4475

Da tables se levent li cont e li baron,

En le stale corent çivaler e peon,

Altri cum stange et altri cun baston;

Bovo le vi ne le sait pais bon. (2730)

Rubric 118

Coment tota la cor tornent en dolor l'infant, / Si corerent en le stalle par lui aider; ma nul / Non fu qi li olsast apro(s)mer, se no Bovo.*

Laisse 119

Ora fu Bovo tuto enpris de dotançe;

4480

De son çival oit gran dubitançe,

Q'i no l'oncia et a spea et a lançe.

De cil enfant avoit gran pesançe;*

Tota la cort fo metu en tristançe, (2735)

Qe venua estoit a la cort so amançe;

4485

Morto est il in quo avoit fiançe.

L'infant prendent sença nul demorançe;

A un monster li portent sens tardançe.

Ilec fu seveli a dol e a tristançe. (2740)

Por Rondel fu Bovo en gran balançe;

4490

Volunter fust e·l riame de Françe,

O a 'Vignon o a la tera de Valançe.*

Rubric 119

Coment fu gram dol de le filz li rois, e comente / Le sevelirent a un monster a gran dol; et come(n)t / Le plure li rois e li baro(n), e sor tot Bovo.*

Laisse 120

Grant fu li dol mené por cele enfant;

De lui plurent le petit e li grant. (2745)

Mais desor tot Bovo li fait avant;*

4495

De son çival se dota duremant,

Qe par lu ert morto cel enfant.

Quant l'infant fu seveli, la cort fu en ojant;

Dist l'un a l'altro, "Droit est li çuçemant; (2750)

Si est droit e rason li comant,

4500

Qi fa li peçé, porte la penetanç;

Morir doit le çival droitmant,"

A li rois (le dient) le petit e li grant;*

Dist li rois, "Et eo si li comant, (2755)

Quando (s)i le çuçés li petit e li grant."*

4505

Quando Bovo l'olde dire, non à talant

Qe plu ama le çival qe ren qe fust vivant,

Enfra de soi el dist planamant,

"Ai, (bon) Rondel, cum tu me fa dolant,* (2760)

Par toi e vojo morir da une mior parant,*

4510

Quando non varà merçé ni pietanç."*

Rubric 120

Coment li çival fu çuçé a morir, e Bovo le / Plure e pur lui demande gran piaté a li rois.*

Laisse 121

Se Bovo oit dol non è da merveler,

Quant son çival vi a morte çuçer,

Qe tot li volent ferir et inavrer. (2765)

Mais li bon çival non fu si da toçer;

4515

Qe li veist ver de lor adriçer,

E cun pe e cun boçe traire e amener,

Qe tot li fa e foir e scanper.

Bovo le vi, n'ait en lu qe irer; (2770)

Ven a·l çival, si le va disliger;

4520

Quand cil li verent qe sovra li poit aler,

No le fo nul tanto ardi ni fer

Qe no s'en fuça por paura de·l destrer.

Segnur, saçés, grande fu li noser (2775)

Por li palés e davant e darer.*

4525

Si gran fu li dol de·l baçaler,

Ne vos poroie par nul ren conter.

Quand a la dama q'il devoit nocier . . .*

Qui qe l'amenent là, volse arer torner; (2780)

Qe ben verent en lui no è nula sper.

4530

Adoncha veisés li dol a inforçer,

Tant palme batre e de çavi tirer.

Bo(v)o si stoit como un hon strainer;

Tal oit li dol, ben ne cuitò raçer. (2785)

A sevelir l'infant sor lu veisés son per,

4535

Plançer e plurer e sovent pasmer.

"Fillo," fait il, "qi me doit eriter,

Aprés ma mort ma corona porter,

E ceste pople avoir a (ju)stier,* (2790)

Si altament v'avea dona muler

4540

Con se poroit ne dir ni penser;

Dont estes mort par un destrer;

No so cun de vos me diça vençer."

Quant li baron l'oldent si plurer, (2795)

Çascun prende(n)t Bovo a regarder,

4545

E a di et a palmes l'un l'altro mostrer.*

Bovo le vi, n'ait en lui qe irer.

Rubric 121

Coment li rois pluroit son fil, et coment / Por li barom (ç)uçé fu le çival a morir.

Laisse 122

Por celle enfant fu grande li dolor;

Desovra lui en pasment plusor. (2800)

Qui çivaler, li dux e li contor,

4550

Guardent Bovo por ira e por foror.

Si s'el mostrent por li palés entor,

Bovo le vi si n'oit ben paor,

Porqe la mort Rondel son milsoldor (2805)

Sovente fois el mua son color;

4555

E·l maleist cel di e(t) çel jor*

Qe unqesmais el vene (a la) cor.

Cuitoit fair a li rois grant honor;

Ora g'oit fato onta e desenor (2810)

Major qe austes unqes ses antesor.

4560

Bovo (ç)ura a Deo, li maine Criator,*

Avantqe mora Rondel son milsoldor

Ne qe lu aça onta ni desenor,

"El ne conven morir de lor plusor,* (2815)

Qe se tira plus grandi e major."

Rubric 122

Coment li rois demanda conseil / a li barons por far la justi(si)e, et ille

Donente d'oncir li çival; e Bovo li contra . . .*

Laisse 123

4565

Quant l'infant furent seteré,

Li rois e li baron furent arer torné;

Gran fu li dol quant sont reparié.

Adonqa li rois, quant se fu repolsé, (2820)

Ses saçes apela, si le oit demandé:

4570

"Segnur," fait il, "qe conseil me doné?"

E cil le dient, "Porqe le demandé?

Rason si volt e si est ordené,

Qe cil porti la pena qe oit fato li peçé. (2825)

Par droit çuçen, sença nul falsité,

4575

Qe cil çival soja preso e ligé,

Cum malfator soja justisié;

Li çevo li sia da li bust colpé

Desor la plaçe en le major merçé, (2830)

Qe veoir le pose tot qui de la cité."

4580

E dist li rois, "Daqe li otrié,

Si soja fato coment vos li çuçé."

Bovo l'oldì, qe estoit lì asenblé,

Par un petit nen trase soa spe (2835)

Sovra colu c'oit li conseil doné.

4585

Mais gran mesure li oit atenperé;

Davant li rois el fu ençenolé,

E dolçement li oit dito e parlé:

"Merçé, bon roi, por la vestra bonté, (2840)

Quest qi v'ont li consejo doné,

4590

E qe a morir ont mon çival çuçé,

No v'ont pais dita la verité.

E vos dirò cun la colsa est alé;

Se vestre filz est morto, ben l'oit merité, (2845)

Quant por furer fist tel folité.

4595

Prender le volse contra sa volunté;

Ben ge lo disi, non è tros çorni pasé,

Quant me l'avoit en don ademandé,

No le doneroie a hon de mer né, (2850)

Ne por avor, ne por nul riçeté,

4600

Qe mun çival si estoit costumé

Ne se lasa toçer a hon qe soit né.

Se il est mort, qi n'à doncha li peçé?

Quant nu foimes a·l mançer aseté, (2855)

Prender el volse le çival aduré

4605

Contra mon voloir, l'averoit via mené.

Le çival fe quel q'el oit acostumé:

Morti n'oit ça plu de quaranta sé,

Questo no savivi vu qe fi li çuçé." (2860)

Quant qi l'intent qi l'ont çuçé,

4610

A gran mervele furent spaventé.

Bovo virent de mala volunté;

Ben conosent son cors e sa ferté.

Tutor ten la man sor le tenir de la spe; (2865)

Li plus ardi voroit eser enteré.

4615

Ni ben ni mal i no ont parlé.*

Rubric 123

Coment Bovo mostrò por rason qe son / Çival non devoit morir; pois apreso si le querì en don por humilité.*

Laisse 124

Gran dol oit Bovo, mervelos e pesant;

Por son çival el fu en gran tormant.

Si dolente non fu unqa a son vivant; (2870)

El maldist cel jor e cil tanp,

4620

Qe a la cort menò quel auferant.

Davant li rois en çenoclon s'estant;

"Mercé, bon rois, par Deo onipotant,*

Se mon çival v'à forfato de niant,* (2875)

Morto ves filz dont sui tant dolant,

4625

Come poroie l'eser par nul convenant?*

S'el oit fato li peçé, farò la penetant;

Quando vos plait, e vos ven por talant,

Parilé sui aler en Jerusalant, (2880)

A le sepolcro servire lojalmant,*

4630

Por arma de l'infant dè servir ge quatro ant;*

A mon avoir, cun quatrocento conbatant

A bone arme e a destrer corant;

Questo si çoarà a l'arma de l'infant. (2885)

Por ancir le çival seroit gran viltanç,*

4635

Qe bestia non soit rason de nojant."

Quant cil l'intendent qe fi le çuçemant,

Dient a li rois, "Quest'è bon convant!

Mal à quel qi melor li demant." (2890)

Tuti li baron dient comunelmant,

4640

"Otrié·li, rois," ces loen tuti quant.*

E dist li rois, "Ne eo no li contant;

A (m)un Bovo, l'otrio son comant."*

Me no sa Bovo la pena e li tormant, (2895)

Qe il durò por cele auferant

4645

Oltra la mer cun la pa(i)ne jant*

Quant il oncis le mervelos serpant,

Et in apreso lo me(r)veloso çigant

Qe a lu non dura nesun hon vivant. (2900)

Rubric 124

Coment Bovo por scanper son cival da mort / Promis a li rois de aler oltra (mer) a li sepolcre.*

Laisse 125

Quant Bovo oit son çival delivrés

4650

Qe a morir el estoit çuçés,

De tel colse oit çoja menés;

Donde pois nen fu e gramo e irés.

A gran mervele fu Bovo ben dotés; (2905)

Li rois oit altament merciés,

4655

E in apreso toto quanto li bernaés.

A demorer ilec molto fose ranpognés

Por son çival, qe oit fato la folités.

Doncha oit il li conçé demandés, (2910)

E li rois li oit mantenant donés:

4660

"Ne vo vos . . . , si v'en alés;*

Por arma de mon filz farì la carités.

Vu savi ben qe promeso m'avés."*

E dist Bovo, "De ço ne vos dotés. (2915)

E farò ben la vestra voluntés

4665

A vos e vini e çojant e lés;

Arer m'en torno e gramo e irés.

E d'una colsa e vojo qe vu saçés:

Se nesun hon aust fato tel folités (2920)*

Cum fi mon çival, qe non est ensenés,

4670

Eo n'averò·ge la vengança pres;

Par soa mort zamais non serò lés."

Li rois li oit de ço amerciés;

Li conçé li donè, e cil s'en est alés. (2925)

Ses civaler sont a çival montés,*

4675

Qe tot li av<o>ient por amor convojés.*

A l'aler qi il n'oit, mil li ont reguardés,*

Por le çival q'el oit via menés.

Dist l'un a l'altro, "Cil oit ben ovrés; (2930)

Mal ait li rois, nen valt un pel pelés,

4680

Quant sor cestu non è son filz vençés."

E Bovo çivalçe cun sa bela masnés,

Do sento çivaler molto ben coroés.

Rubric 125

Coment Bovo prist conçé da li rois / e da li barons e se s'en torne ad Antone

Sa cité; e contoit a Druxiane ço qe li ert / avenu e ço que far devoit, donde ne fi gra(n)z dol.*

Laisse 126

Bovo s'en vait, li cortois çivaler, (2935)

Con sa masnea qe sont e pros e ber;*

4685

Qui qi le convoient, qe furent un miler,

Qe tot li ament por amor de son per;

A Deo li rende, pois retornent arer.

Tanto çivalça Bovo, ne se volse arester; (2940)

Ven a Antone (son) mastro terer.*

4690

E Druxiana quant le voit reparier,

S'el oit çoja non è da demander.

Contre le vait por la man asaçer,

Ela le guarde si·l vi de mal penser;* (2945)

Ne no le vi ni rir ne treper,

4695

Ne cun le ne rir ne çuger,

Cum autre fois era usa de fer.*

Ela le prist por rason demander:*

"Ai, sire Bovo, coment vos veço ester? (2950)

V'ait nu hon fato nul enojer?"*

4700

"Nenil, madame, me son en gran penser

Por Rondel, nos corant destrer.

Le ver diable si me·l fe amener;

El no è bestia, anç è·l li vor malfer. (2955)

A la cort alè por mon oncha onorer;*

4705

Saveç vos qe me fi li destrer?

Quando estoie asis a·l mançer

Le filz li rois, qe oit mena muler,

Me le querì qe li dovese doner. (2960)

Et eo le disi no se deust pener,

4710

No le donaria par or ni por diner.

Quando el vi non valoit projer,

El alò a·l çival, si le voloit furer.

E quando volse le civalo asaçer (2965)

Le çivalo le pris por li flanco darer.

4715

No li lasò si l'avè a strangoler;*

Dont çuçarent p(e)on e çivaler

Por far justisie si cun rason requer,

La testa far trençer a li destrer. (2970)

S'eo avea doja, non è da demander;

4720

Non era in la cort nul hon si lainer

Non me guardast como fose un çubler.*

Plesor fois i me fe remenbrer

De trar Clarençe, li bon brando d'açer;* (2975)

Mais astinencie si me fe repolser,

4725

Porqe me voie contre tant averser.*

Se fose esté defors a li verçer

Tel me tenoit vil qe m'averoit tenu çer.

A molto gran pene potì le çival scaper;* (2980)

Avantqe le poust de tot delivrer,

4730

Me le convene e plevir e çurer

Qe eo pasaroie oltra l'aigua de·l mer

Ander en Jerusalen cun quatrocento çivaler,

Servir a li sepolcro quatro ani tot enter." (2985)

Druxiana l'olde, n'oit qe coruçer;

4735

A gran mervele el li parse nojer.

Mais son segnor ne volt contraster,

Qe son voloir conoit tot enter.

Rubric 126

Coment Bovo ancor parloit a la dame; / e coment Drusiana li respondì.*

Laisse 127

Bovo parole a la dame in ojant, (2990)

"Dama," fait il, "come eo son dolant,

4740

Quant me vos convent laser si por niant,*

E li me filz, qe je amo cotant;

Mal acontè Rondel l'auferant."*

Dist Druxiana, "El no vos val niant.* (2995)

Dapoisqe vos faistes li sagramant,

4745

Ça non pois tradir li convenant.

Se vos aleç oltra Jerusalant,

De ves peçé farì la penetant;

A·l revenir vu serì tuto sant. (3000)

Ben guardarò anbidos vestri enfant,

4750

E la çité e darer e davant."

Molto li vait Druxiana confortant,

Açoqe de l'ovre no s'en vada nojant.

"Bovo," dist Druxiane, "un don e vos demant; (3005)

Quant vos serés en çele tere sant,

4755

De moi e de ves filz vos sovegna sovant,

Si me aportarés de le requilie sant*

Qe trovarés là en Jerusalant."

"Dama," fait il, "farò li ves talant. (3010)

Tosto a vos farò retornamant."

4760

Un mois seçorne por far son guarnimant;

E si fe pariler ses homes e sa çant.

De li milor e de li plus valant

Avec lui n'oit pris quatro çant, (3015)

Qe çascun li vait volunter por talant,

4765

A bone arme e a destrer corant.

E çascun de lor porta de l'avoi(r) tant

Cun spender poit por cele tot tanp.

Rubric 127

Coment Bovo s'apareille et lui e soa çant / Por paser mer et aler en Jerusalant.*

Laisse 128

Bovo d'Antone li ardi e li pros, (3020)

Nen fu uncha hon si perigolos,

4770

Ne tante pene durese pauros.

Mais Damenedé, li per glorios,

Senpre en sa vite si le donò secors;

Mais non teme ni amiré ni ros.* (3025)

D'estar en pais senpre fo desidros,

4775

E de mal faire senpre fo vergognos.

Mais non amò coardo ni traitors;

Senpre el fu dolçe e piatos,

Contra li malvés felon et orgolos. (3030)

En soa tere molto fu poderos;

4780

Dever li povre nen fu voluntaros

De questa vie molto fo ocios,

E çorno e noit el n'estoit ir(o)s.*

Druxiana li conforte, q'el sia sofraitos, (3035)

E si se reputì a hon pecaors.*

4785

De ses peçé se clamì doloros,

"Ma senpre mais sireç desiros*

De retorner, bel nos amigo dos."

Rubric 128

Coment Bovo fu parilés, e lui e soa jent; / E si parloit a Synibaldo si le reconmande

Sa feme e ses enfant e soa çité aprés . . .*

Laisse 129

Quant Bovo fu de tot aparilé, (3040)

Sinibaldo apele, si l'oit aderasné:

4790

"Sinibaldo," fait il, "molto vos ò amé,

E vos estes par moi pené e travailé;

Ne vos ai mie de nojant oblié.

Aler me convent oltra la mer salé; (3045)

Prendés ma tere e mes anbes rité,

4795

E ma muler qe tant avì amé,

Par cui eo sonto tanto tenpo pené,*

Si le guardés a vestre volunté."

Dist Sinibaldo, "Si con vos comandé; (3050)

Mais d'una ren e vos prego por Dé,

4800

Qe tosto a nos vu sia retorné."

Responde Bovo, "De ço ne vos doté."

Adonqa Bovo nen oit plus parlé;

Muli e somer, cento n'oit encarçé, (3055)

De vitualie, d'arnois, e de coré.

4805

Tanta enportent defor de la cité,

Qe por gran tenpo, ela no le fu manché.

Quant oit ço fato, q'elo fu parilé,

A Druxiana el demanda li conçé. (3060)

Qi donc veist coment sont acolé,

4810

E l'un l'autro e strençu e basé,

E cum larmoient cun li ocli de·l çe;

Nen est homo nen prendist piaté.

Druxiana l'oit a Deo comandé, (3065)

E Sinibaldo fo a çival monté.

4815

Avec lui tuti qui de la cité,

Tant li convoient cun li vene a gre.

Bovo s'en vait e qui retorna aré,

Por le çamin e por la strea feré. (3070)

Cil le condue qi de la Vergene fu né,

4820

Qe a gran travaile elo fu envojé.

Rubric 129

Coment Bovo s'en vait por le çamin, / e lui e soa çant; e pasarent la mer,

Si s'en voit a li seporcre en Jerusalant.*

Laisse 130

Or s'en vait Bovo por aler oltra mer;

A Sinibaldo el lasò sa muler,

E ses enfanti e sa tera guarder. (3075)

Tanto s'en vait, q'el fu (ç)onto a la mer;*

4825

Ilec se fi en nef et en dormon lever;

E Damendé si dè bon orer.

Tant naçarent q'i venent a river,

Verso Alexandre de cella part de mer. (3080)

Droit en Jerusalen venent ad alberçer;

4830

Pois alent a·l sepolcro por dever visiter.

Ilec trovent un mortel engonbrer,*

Qe da Baldras estoit venu un Sarasin, Corcher,

Com trea mile de cela jent averser, (3085)

Por le sepolcro veoir e guarder,

4835

E qe Cristian no le venist a rober,

E le reliquie tore et anbler.

Quant virent qe venu sont qui çivaler

Si le volent de·l tot contraster, (3090)

Qe non devent in le sepolcro entrer.

4840

Adoncha Bovo fe soa çent armer

Quatro cento sont, qui son trea miler.*

Mal fi Bovo li sacramento çurer;

Devoit paser oltra l'aigua de·l mer, (3095)

Cum si petita conpagna de çivaler.

4845

Se Deo non pense, li vor jus(t)isier,

Ça averà Bovo un si fer engonbrer

Qe çero averà Rondelo son destrer.

Rubric 130

Coment Corché cum li paim venent / a li sepolcro e atrovarent Bovo.

Laisse 131

Bovo d'Antone non senblò pais enfant; (3100)*

Quando el voit venir qui mescreant,

4850

Davanti lor Corcher, qe estoit un çigant,

Con trea mile Serasin e Persant.

Saçés de quel Corcher, il estoit si grant,

Qe tot les spales e lo çevo en avant (3105)

Major estoit de nul altro conbatant.

4855

Quando Bovo le vi venir cosi avant,

S'elo se smaie, no ve ci mervelant.*

Dist a ses homes, "Nos sumes a·l presant,

Por Damenedé sostenir gran tormant. (3110)

Mais d'une colse nos sumes ben certant;

4860

Qi morirà en porà eser çojant,

En Paradiso averò corona d'or lusant."*

Quant cil l'entendent, sença demoramant

Çascun se segne, fait soi la cros davant. (3115)

E dist Bovo, "Vos faites saçemant;

4865

Ne vos movés, se je ne vos comant.

Avantqe feré de lança ni brant,

Ve vo parler a quel qi ven davant;*

A moi resenble qe soja un çigant." (3120)

Qui li dient, "Soja a li Dé comant."

4870

Arester le foit en un pre verdojant;

Da lor se parte tuto quant en ojant,

E si s'en vait ver celle amirant.

E quel Corcher si fu reconosant, (3125)

Quant solo le vi sença hon vivant.

4875

Dist a sa jent, "Non venés plus avant;

Quel me resenble de Cristiane jant.

A moi vol parlé, como mostra senblant."*

E cil le font, daqe i·le comant. (3130)

Rubric 131

Coment Bovo aloit verso li Sa(rasin), / E si pa(r)lò a Corcher, qe çigant estoit.*

Laisse 132

Le Sarasin non fu pais garçon;

4880

Punçe son çival, si vent ves Bovon.

E si le dist, "Qi est cil baron?

Cristian me resenbli, qe as la cros e·l fron;

Ben es armé, si à bon aragon. (3135)

Porqe pasè a ta confosion,*

4885

De toa vite non daria un boton,

Se no è venu por adorer Macon,

E Apolin, e nos deo Balatron."

"Par fois," dist Bovo, "ja no vos çelaron; (3140)

E son ben Cristian, ne non croi altro non,

4890

S(e) no en quel Deo qe sofrì pasion,*

En su la cros si cun por vor saçon.

Pasé ò la mer en neve et en dormon,

Por servir le sepolcro qe ilec veon. (3145)

Çentil hon, sire, qe me parés si (b)on,*

4895

Por cortesie e vos demando un don,

Qe non faça nula engonbrason.

Lasa a nos recever li perdon

Qe avon por penetencie e por confesion, (3150)

Et avec moi quisti me conpagnon;

4900

Colsa como no, ça ne vos çelaron,

Deo par nos sostene pasion

E nu par lui sostenir la volon."

Dist li pain, "Tu parli a bandon; (3155)

Parole di qe resenbla a garçon.

4905

Nu si savon et è droit e rason,*

Qe vestra loi non val un speron.

Saçì por voir, se non aorì Macon

Nu vos donaron una tel benecion, (3160)

Qe mais non tornaresi en la vestre mason."

4910

Bovo l'oldì, ven tinto cun un carbon;

Le pain g(u)a(r)de da li pe jusqua enson;*

A gram mervele elo li parse felon,

E si le parse homo de gran renon; (3165)

S'(e)lo li dote, no se mervil nul hon.

Rubric 132

Coment Bovo parle a li Sarasin, / li Sarasin parole a lui.*

Laisse 133

4915

"Sarasin, frere," (dist) Bovo enn ojan,*

E vos prego, nen siés pais vilan;

Pasé avon mer en neve et en çalan,

Por fare qui la nostre penetan. (3170)

Non seria cortexie torber nos de nian;

4920

Nu avon soferto gran poine e torman.

E quando el non poroit aler altreman,

Morir volun por Deo onipotan,

Defenderen nos a (n)ostre spee trençan; (3175)

Encontra vos se fustes doa tan,

4925

Deo averon por nostre capetan.

Et avec lui serà tot li san."

Dist li pain, "Or m'entendì, Cristian;

De cele gent, è tu li plu manan?" (3180)

E dist Bovo, "I son a me coman;

4930

E de lor e sonto li plus gran."

Dist le pein, "Tu è a grant achan;*

Avec moi tu resenbli un enfan.

Or a me dì, no me·l çeler nojan:* (3185)

En toa tere è tu conte ni amiran?*

4935

Se tu fusi çentil, con tu à li senblan,

Avec moi sença hon vivan

A un a un conbateria a li can.

Se conquerer me poisi a la spea trençan, (3190)

Segnur po star pois en Jerusalan,

4940

E guarder li sepolcro a tuto li to coman."

Bovo l'oldì, si s'en mostrò çojan.

Rubric 133

Coment Bovo oldì parler quel Sarasin, (28ra) / Que a mervelle estoit grant, que li demande / de far sego la bataille; e coment Bovo li respondì.*

Laisse 134

"Sarasin, sire," dist Bovo en ojant,

"Tu me domandi bataile et eo si la consant. (3195)

Ben me senblés de moi asa plus grant;

4945

Ora me dites, meterì vu li convant:*

Se vos conquer a·l trençer de mon brant,

A li sepolcro starò e pois seguremant?"

"Oil voir, sir," ço dist li mescreant; (3200)

"E s'eo conquer toi, farò cortesia tant

4950

Qe toa çent qe son a·l to comant

Eo li lasarò aler a salvamant."

E dist Bovo, "Et altro (non) demant."

"Ora tornés," ço dist li mescreant, (3205)

"A vestra jent; fa vos legro e çojant,

4955

Trosqu'a deman, a l'aube aparisant,*

Et eo farò tot li somiant.*

Deman seremo anbidos a li canp;

Qi vinçerà serà richo e manant; (3210)

Qi perderà serà tristo e dolant."

4960

"Par foi," dist Bovo, "e questo non contant."

Corcher s'en vait, qe non dota hon vivant;

E Bovo d'Antone retorne a sa jant.

La novela li conte dont forte se spavant, (3215)

Qe i verent le pain cosi grant.

Rubric 134

Coment Bovo parole a sa jent / de la bataille qe far devoit.*

Laisse 135

4965

"Segnur," (dist) Bovo, "e no vos quer çeler;

Con quel pain el me conven çostrer.

Cum tal cove(n)to cun vos averò deviser,

Se le porò vincer ni afoler, (3220)

Nu poren pois le sepolcro guarder,

4970

A nos voloir stare e seçorner,

Qe de pain non estoit plus doter;

Q'elo est sire de tota sta river.

E s'el conquer moi, vos porés retorner (3225)

A salvamento, sença nul engonbrer;

4975

E vojo ançi morir qe vos desariter.

Ma arma serà salva, de ço non ò penser.

E vos comando Druxiana ma muler,

E mes enfanti vos diça conserver, (3230)

Et anbidos como moi reguarder."

4980

Quando cil le oldent si parler,

Tuti ensenble començent a plurer,

"O, çentil dux, ne ves (volon) si laser!*

Se vos morés, mais non volun torner; (3235)

Avec nos mais non queron sper."*

4985

En cella noit, trosqua a l'alba cler

Elo se fi una mesa çanter,

Et apreso se fi comuner*

De·l corp Jesu, por soa arma salver. (3240)

Quant à ço fato, non fu longo entarder,

4990

Elo demande le arme e li corer;

E cil le aporte qe le ont a guarder.

Bovo s'adobe a lois de çivaler;

Veste l'aubers e calça le ganber, (3245)

Alaça l'eume, çinse li brant d'açer.

4995

Fa s'amener Rondel, son destrer;

E cil li monte, qe non bailì striver.

Pois pris conçé da li ses çivaler,

Ver la bataile prist a çaminer. (3250)

Quando l'oit veçu venir Corcher,

5000

Qi le veist de ses arme adober,

E monter a çivale corser,

Dever de Bovo vait como corser;

Ça serà la bataile meravilosa e fer. (3255)

Quando Bovo se vait a 'prosmer a·l corser,

5005

Elo l'apele, "Benvenés, çivaler!

A Deo plasese li vor justisier

Sença bataile s'aumes acorder."

Dist le pain, "E le vojo otrier, (3260)

Se vos volés Damenedeo renojer,

5010

Croir en Macon e lasar li Batister."

E dist Bovo, "De ço n'estoit parler;

Ançi me lasaria tot li menbre coper,

Qe colu renojase qi me doit justisier. (3265)

Vegna de moi, qe ne po encontrer;

5015

Daqe altrament la no poit aler.

E vos desfi, ben vos stoit guarder."

Dist le pain, "Et eo vos sens tarder."

Rubric 135

Coment començente la bataille e fer(i)rent / L'um l'autre des lançes gram colpi.

Laisse 136

A gran mervele fu li baron orgolos, (3270)

Fort et ardi como lion e ors.

5020

L'un contre l'autre punçe le milseldors;

Brandist le lançe a li fer perigolos.*

Gram colpi se fer sor li scu de colors;

Le scu se speçe, tros a li aube(r)s blos; (3275)

Le aste se frosent, via volent li tors.*

5025

Ne l'un ni l'autre nen fu si vigoros,

Qe de la sella se plegase en jos.

Rubric 136

Coment dapoisqe le a(s)te(s) furent fraites / Se ferirent de le spee l'um l'a(u)tre mervelos / colpi, e tren(ç)ent tot ses armes.*

Laisse 137

Tot primeran a la prima envaée,

Bovo d'Antone si oit trato sa spee, (3280)

Ço fu Clarençe, c'oit li pomo endorée.

5030

Fer le pain desor l'eume gemée;

Tanto le trova e duro e serée,

Nen po trençer valant una derée.

La spea torna, qe le scu oit frapée; (3285)

Cum tota la guincha li çeta a le pree,

5035

E de l'aubers tota (la) ghironée;

Mais en la carne ne l'oit pais toçée.*

Dist le pain, "De nient m'amée!

A gran mervelle trença ben quella spee; (3290)

Ancora non avés de la moja cerchée."

5040

Li Sarasin fu forte et adurée

E a mervelle fu grande e desmesurée;

La spea trait, a Bovo l'oit presentée

Desor li elme gran colpo li oit donée.* (3295)

Bon fu li elme, tel li oit donée,

5045

Nen fu un milor in la Cresteneté;*

Ver Luchafer l'avoit conquistée,

Quando l'oncis soto Arminia a·l pree.

Por celle heume Bovo fu guarentée; (3300)

Nen po trençer valant una derée.

5050

Si grande fu li colpo qe li dè quel malfé,

Qe sor l'arçon li oit enbronçée;

Par un petit ne le çeta a li pree.

Rubric 137

Coment fu grant la bataille de celle dos / Baron, e coment se ferirent de le spede.

Laisse 138

Quant le pain oit Bovo veu, (3305)

Ne l'oit mie de·l çival abatu;

5055

Nen oit son heume peçoré un festu.

El dist a Bovo, "Ben vos est avenu;

Nen cuitoie mie qe austes tel vertu,

Mais a la fin, se non lasi Jesu, (3310)

E non croi in Macometo e Cau,

5060

Tu serà morto e confondu."

E dist Bovo, "Deo me seroit en aju;

Cil me secoré, qe de Verçene né fu."

Bovo ten Clarençe, sovra li è coru. (3315)

Gran colpo li fer desor l'eume agu;

5065

De quel non trençe valisant un festu.

A li desendere, c'oit li brando desendu,

De l'auberg trençe quant n'oit conseu.

E in le flanco si durament feru (3320)

Qe a li canpo el l'oit abatu,

5070

Et a·l çival oit li çevo tolu.

Quando Bovo vi qe ço ert avenu,

Demantenant fo de·l çival desendu.

A·l Sarasin averoit li çevo tolu, (3325)

Mais cel li quer e marçé e salu:*

5075

"Ai, çivaler, por amor de Jesu,

No me onciré, qe me son proveu

Qe Macometo no à força ni vertu."

Rubric 138

Coment Bovo ferì le pain et durament / li navra se le çitò da çival.

Laisse 139

Quando Bovo oit cella parola oie, (3330)

A gram mervelle li delecte et agrie.

5080

El dist a le pain, "Nen vos dotés ne mie;

Se orer voleç le filz sante Marie,

E laser Macon, qe non val una alie,

Avec li santi averés conpagnie." (3335)

Dist le pain, "Questo non contralie;

5085

De servir Deo ò li cor abrasie,

E ceste lois, o el fu sevelie."

Bovo li prent, en estant li metie;

A ses pavilon elo lo condusie. (3340)

Rubric 139

Coment Corchers re(n)egò Machon / E si prist bateseme.

Laisse 140

Quant Bovo fu a·l pavilon torné,

5090

Le Sarasin oit vinto et amaté.

De totes oit li pain desarmé;*

Ses mires oit queri e demandé,

Qe avec soi el avoit amené, (3345)

Si fa çercher le plaie e davant e daré,

5095

E si la oit e streta e ligé;

De bon unguant li oit metesiné.

E quant à ço fato, si cun oit demandé

Elo fu lavé e bateçé. (3350)

E dis Corcher, "Bovo, or m'entendé;

5100

E vos demando qe conçé me doné,

Tantoqe aça a ma çente parlé,

E qe soja torna en ma çité.

Si non farà la moja volunté, (3355)

Par vos envojarò qe secorso me doné;

5105

Quanti non serà de fonte ençendré,

En serà tot a mala mort çuçé."

E dist Bovo, "El vos soja otrié."

Bovo li oit un palafroi doné, (3360)

E cil li monte, c'oit preso conçé,

5110

Ven a sa jent, o erent asenblé.

"Segnur," fait il, "nu avon ben esploité.

Tot tenpo sumes pené e travalé,

Tanto aumes Macometo projé, (3365)

Qe ver de nos el est coruçé.

5115

El non val plus una poma poré;

Men esiant, e vojo qe vu saçé,

Qe li rois d·i Franchi no è endormençé,

E qi li serve si fait gran bonté, (3370)

Qe a le besogne li serve ben a gre.

5120

Par son amor eo sui bateçé,

E lui servirò en moja viveté."

Quant cil l'intendent, toti son spaventé;

Mal ait quel de lor, ni bon ni re, (3375)

Qe po paure aça li çevo levé;*

5125

Ne un sol moto ver lui aça parlé.

Rubric 140

Coment la gent Corcher se farent / bateçer et homes et femes.

Laisse 141

Corcher parole irés come lion,

"Segnur," fait il, "saçés qe nu faron?

Çascun de nos aça bona entencion, (3380)

De delinquir Trivigant e Macon,

5130

E servir Deo qe sofrì pasion

En su la cros par nostra redencion.

Qi prenderà batesmo, serà me conpagnon;

E qi far no li vorà non averà de·l perdon. (3385)

Morti serà como engresun felon."*

5135

Quant cil l'intendent, crient a alto ton:

"Zo qe vos plais, nu si li otrion."

Adoncha Corcher si mandò per Bovon,

E cil li vent qe non fi arestason; (3390)

Avec lui quatro cento conpagnon.

5140

A Baldras alirent, qi ne pi si o non;*

Bovo apelle ses presti e clerençon,

De un flume el oit fato un fon;

E si le dè la soa benecion. (3395)

Olio e cresme li çetò a foson,

5145

Salmi le dist, e mante leçion.

Doncha veisés veilard e g(arç)on,*

Homes e femes, e petit valaston,

Por amor Deo çetar·se in le fon. (3400)

Pois alirent e trovarent Macon;

5150

Tot li ont brisé la teste e li gropon.

Bovo le voit, si s'en rise a foson;

Corches apela Bovo, si le mis por rason,

"Çivaler, sire, ça no vos çelaron; (3405)

Preso ò li batesmo, la Deo salvacion;

5155

Par tot teres alirà questo non.

Jusqua in Persie si l'aportarà l'on,

E in Alexandre entorno et inviron.

Quant li soldan li saverà per non (3410)

A nu non falla ni nosa ni tençon."

Rubric 141

Coment Corcher se convertì / E si parlò a Bovo de la fe.

Laisse 142

5160

"Corchés," dist Bovo, "e no ve·l quer çeler;

Quando eo pase da cesta part de mer,

Ne le veni mie por çanter ni danser.

Ançi, le vini por mia arma salver, (3415)

E por Deo conbatre e çostrer,

5165

Contra color qe volust li sepolcro violer.

Vegna qi volé, si fust cento miler,

Tuti no li doto la monta d'un diner.

Savés porqoi eo me faço si fer? (3420)

Qe so par voir, e no creço eser mençoner,

5170

Qe çascun qi ven da questa part de mer,

Por le sepolcro servir et honorer,

Se il more, lì no est da parler;*

Avec li santi li fa Deo coroner; (3425)

Unde nu no doten morte ni engonbrer."

5175

Dist Corcher, "Vu avì bona sper;

Serà si de nos, qe aumes pris batister?"

"Oil," dist Bovo, "ne vos estoit doter.

Corona d'or vos farà Deo porter." (3430)

Quella parole li fait si conforter,

5180

Qe plus non dota de la çent averser.

Rubric 142

Coment Corchés fu batiçé et pois / alioit a convertir soa çant.

Laisse 143

Quant Corchés oit pris bateçamant,

E de sa tere li petit e li grant,

La novelle se porte darer e davant. (3435)

Quando li soldan li soit, nen fu pais çojant;

5185

Qe quel Corchés era le plus manant,

Qe trover se poust en tot Jerusalant.

Adonc apelle Baldichin, son enfant,

"Filo," fait il, "prendés, e vos comant,* (3440)

Çinquanta mil d·i meltri de nos çant.

5190

Aleç a Corchés, dites qe je li mant,

Qe demanes vegna a li mon comant."

S'el no·l vol fare, morto sia eramant;

Ne ge lasés tera ni casamant. (3445)

Si le prendés, si me·l mené davant."

5195

E cil le dist, "Faron li ves talant."

Quel Baldichin si fo pro e valant;

Filz li soldan, si l'amoit dolçemant;*

Ancora estoit çovençel et enfant. (3450)

El fa soner ses grailes en ojant,

5200

Dont s'armarent çele jent mescreant.

Çinquanta mille montent en auferant;

Tant çivalcent e darer e davant,

Venent a Baldras una deman por tanp. (3455)

Corcher se leve a l'aube parisant;

5205

Quando vi quelle ensegne, si le va reconosant,

O el vi Bovo, si le dist en ojant,

"Çivaler Deo, el vos va malamant;

Venu è li soldan, cun una çente grant; (3460)

Par voir saçés, averon torniemant."

5210

Bovo responde, "E altro non demant,

Qe de ma vie nen curo plus niant.

Qe çest mondo ert cun un trepas de vant;

Qi en lui s'en fie, si vene a niant; (3465)

Deo soit ben qi ait bon talant,*

5215

E qi lu serve n'oit guerdon tant.

Nen saust dire hon qe soit vivant,

Tant cuito ferir de·l trençer de mun brant.

Sor celle jent qi venent d'Oriant (3470)

Qe ma venue conprarà si çeramant

5220

Qe no l'oit si unques nul merçaant."

A le parole qe çesti vont disant, . . .*

E Baldichin, qe filz est li soldant,

Si oit pris tuto son guarnimant, (3475)

E fu monté sor un çival ferant.

5225

Ven a la tere da la porta davant;

Ad alta vos el criò altamant,

"Corchés," dist il, "fates vos qi davant;

Parler vos vojo e dir de mon talant, (3480)

Ço qe vos manda mon per li s(o)ldant."*

5230

E quel le dist qe se fait en avant,

"Veeç moi? E son qi a·l presant."

Rubric 143

Coment Baldachi, qe filz estoit li soldan, / Alloit a la tere por pa(r)ler a Corcher.*

Laisse 144

Baldichin parole quant oit Corcher veu:*

"Dì mo, Corcher, parquoi es recreu? (3485)

Ça à arenojé Macometo e Cau,

5235

E cri en Deo, qe fo preso e (v)endu,

E da li Çudé en su la cros metu?"

Dist Corcher, "È tu parço venu?

Saçì par voire, eo creço ben in Jesu." (3490)

Dist Baldichin, "Tu ne serà deçeu;

5240

Qe por la gorçe en serì apendu."

Dist Corcher, "Ne te doto un festu;

E e defenderò a lança et a scu,

La fe de Deo e la soa salu; (3495)

Qe Machometo e li (s)o Deo Cau

5245

Nen valt mie la monte d'un fu."*

E si le dist, "Ça sereç asalu,*

Si parerà com el averà vertu."

Rubric 144

Coment Baldechin retorne a sa jent, / Si·lli foit armer et allent a·lla bataille.

Laisse 145

A soa çent fu Baldichin torner,* (3500)

De graille fa soner plus de quaranta ser.

5250

Pain s'adobe, quella jent renojer;

Cinquanta mile sunt a çival monter

Por asalir la tere, se sonto aprosmer.

Bovo oldì la nose, le cri et la uer, (3505)

Dist a Corcher, "El nos conven armer;

5255

Alen defors cun qui a tornojer,

Se nu muron nu averon bon loer;*

Mejo vojo morir, qe star qi presoner."

"Por la ma fois," ço le dist Corcher, (3510)

"Questa parole ben est d'agraer."

5260

Or doncha veisés qui çivaler

Le arme prendre, e salir a destrer.

Bovo si fi soa çent armer,

E si le fait çascun de lor croxer,* (3515)

Davant le piç por mejo reguarder.

5265

Quant fu armé, no se volse entarder;

La porta fa avrir e li pont abaser.

Fora ensirent, sens nosa e tençer

Bovo davanti, sor Rondel son destrer. (3520)

A·l primer colpo ne fait un trabuçer;

5270

Pois fer un altro, si ne fe a·l tel ter*

Avantqe l'aste el poust briser,

Nen fait .vii. si vilment aler,

Qe de soa vite non ert nula sper. (3525)

Pois tra Clarençe, qe trença volunter,

5275

A qi un colpo el ne poit doner,

De soa vite non ait nulle penser.

Aprés de lui si se vait Corcher;

Da l'altra part, fu Baldichin li Escler. (3530)

Doncha veisés un gran stor començer,

5280

Tant pe, tant pugni por la plaça voler,

E tante testes veisés colper,

A voide selle foir tanti destrer,

Qe de·l veoir s'en poroit l'on merveler. (3535)

En me la voie atraverso un senter,

5285

Bovo e Baldichin se voit a incontrer;

L'un contra l'altro lasa aler le destrer;

Ça olderì bataila meravilosa e fer.

Rubric 145

Coment Bovo e Baldechin s'encontrent / a li canpo e Bovo li oncis a la spee.*

Laisse 146

Quant en le canpo s'encontrent li baron, (3540)

Bovo e Baldichin ensenbre se çostron.

5290

Baldechin guarde e si vide Bovon,

Qe davant soi avoit la cros enson;

Dont conoit ben qe non era Sclavon,*

Ne non estoit de celle legion (3545)

De qui qe adorent Trivigant e Macon.

5295

Ferir le vait desor l'elmo enson;*

Nen poit trençer la monta d'un boton.

E Bovo fer lui, se(n)ça nul question;

Desor li eume a l'ovre Salamon. (3550)

Cosi li trençe, con faroit un baston,

5300

Ni por la cofie non oit guarison.

Cosi la trençe, como un pano d'aquiton;*

Tota la teste por mité li deron

Si le trençò li peito e li gropon, (3555)

Tros in la selle, non fi arestason.

5305

En do mité li mis tros li arçon.

Quant Sarasin vi cair quel baron,

Dist l'un a l'altro, "Porqe le çelaron?

A gran mervelle celu est prodon; (3560)

A quelo colpo no resenbla garçon.

5310

Qi l'atenderà non averà guarison."

En fua torne e par poi e par mon.*

Rubric 146

Coment (pain) furent morti e scunfiti / Par la mort de Baldechin.*

Laisse 147

Quant qui pain de la lo mescreant

Vi son segnor aler si malamant, (3565)

Tot li plus meltre avoit tel spavant,

5315

Ne l'atenderoit par tot l'or d'Oriant.

En fua torne a miler e a çant;

E Bovo si le incalçe cun Clarença ses brant.

Tanto l'oit porté Rondel son auferant, (3570)

Q'el oit pasé un pois e un pendant;

5320

L'oste se lasa darer dos legue grant.

A·l paser de cel pois, el s'oit guardé davant;

El vi da una chaverne ensir un mal serpant.

Plus estoit il noire, non est ag(r)amant;* (3575)

Par boce bute e fois e vanp.*

5325

Bovo le vi, de rir non à talant;

Volunter retornase l'auferant.

Quant cil serpent li vait tutor davant,

E·l bon Rondel li vait guischisant,* (3580)

Ne se le lasa aprosmer de niant.

5330

Bovo mena la spee, e menu e sovant,

Se il se smaie, ne vos çi mervelant;

Deo reclame e la majesté sant.

Rubric 147

Coment Bovo por la paure de quel serpant / dist la oracion, e fi a Deo la pregere.

Laisse 148

Bovo fu en cel po molto doloros e (las),* (3585)

E vide li serpant qe senbla Satanas;

5335

Reclama Deo e·l baron san Nicholas:*

"Ai, sire Deo, qe tot li mondo f(o)rmas,*

Adam li primer hon de tes dos man crias,

De limon de la tere si cun tu comandas, (3590)

Et Eva sa muler de sa costa gitas,

5340

Paradis perdirent en esilio li mandas;

E viverent a po(in)e e vestirent dras

Porçoqe contra fe, ço qe tu comandas

E lu e lor legnages en Enferno mandas, (3595)

Ilec starent tantqe le visitas.

5345

De çelo venisi en tera, par nu qe ta(n)t amas;*

San Gabriel angle a la Verçen mandas,

Q'ela te reçevese, e pois si l'enonbras.

En Belieme nasisi, quando la stela mostras;* (3600)

Li trois rois te quirirent, Merchior e Jaspas;

5350

Oro et encenso et mira portarent in lor bras.

Son oferta prendisi, pais ne la refuas;

Trenta trois anni in çesto mondo duras,

Pois vos vendè li traitor de Judas.* (3605)

Trenta diner vos vendè cil malvas;

5355

Metu fosi en cros en meço de dos las.

A·l terço çorno, susitasi Deo veras,

En l'Asension de sovra celo montas,

E·l jorno de Pasche le Spirto santo envojas,* (3610)

A li Apostole qe vu tant amas;

5360

Si cun è voir qe Laçaro susitas

Si me guardé, e moi e mon çivals,

Da questa bestie qe senbla Satanas;

Qe tel paure non avì unqa jamas."* (3615)

Rubric 148

Coment Bovo por paure de cil (serpant) . . . / soa orason; e quando l'oit dite, si vait vi/gorosemant con li serpant, et si le oncis.

Laisse 149

Quant Bovo oit fenia soa orason,

5365

Dont fo plu fer qe no(n) ert un lion,

El ten la spee, don a or è li pon;

Por maltalant vait sovra li dragon,

E cil a lui qe pais ne le doton, (3620)

Bovo li fer desovra li gropon.

5370

Nen po trençer valisant un boton;

Tros colpi li fer desovra enson.

Non po trençer, tanto dur son,

E quela serpe de malvasa rason, (3625)

Morto l'aust, nen fust l'aragon*

5375

Qe si li fer de li pe environ,

Q'elo li fait cair a·l sablon.

Bovo le vi, si·l ferì en ponçon;

Por me li vent(r)e dont non oit guarison. (3630)

Elo li trençe le figa e·l polmon;*

5380

Morto li verse aprés un çexon.*

Quant Bovo le vi morto a li peron,

Nen seria si çojant par tot l'or de·l mon.

Ormais se tent il a guarison; (3653)

Da lu se parte, ponçe son aragon,

5385

Et oit pasé e li po e li mon.

Davanti soi el vide li dojon,

E de Baldras le gran tore enson.

A(n)cora d·i pain vide a gran foson, (3640)

Qe s'en fuçent entorno et environ.

5390

Tanto l'oit travalé çelle malvas dragon,

Q'elo non cure qi s'en fuça o non.

Rubric 149

Coment Bovo quant oit morto li serpante, / si s'en retorna ver li campo tuto lasés, e dist / A Corchés la novelle, dond(e) s'en merveilla.

Laisse 150

Quant Bovo fu arer retorné,

A Corchés oit la novella nonçé, (3645)

Ço qe li ert venu et incontré.

5395

Corchés l'oì, toto fu spaventé;

"Bovo," fait il, "vu avés ben ovré.

Daqe Deo v'oit da·l serpant delivré,

A gran mervele Deo si v'oit amé. (3650)

Tanto estoit cil serpant doté,

5400

Nul homo olsava stare in sta contré;

Ça n'oit morto plus de quaranta sé."

E dist Bovo, "Molto m'à travalé;

Nen fust Rondel qi m'oi ben aidé,* (3655)

Qe le ferì con boçe e cum pe."*

5405

Dist Corchés, "Poisqe estes scanpé,

Deo e santi ne soja adoré.

Nu si avon cest canp afiné,

Deo e santi ne soja adoré." (3660)

Tota la proja, q'i trovent pro li pre,*

5410

Tota la ont e covi e levé.

A Bovo fu la proja delivré;

Muli e çival, palafroi enfeltré,

Non retene Bovo un diner moené. (3665)

A soa çent et a qui de la çité,

5415

Tota n'ont partia e doné;

E vo, segnurs, par voir qe vu saçé,

Tanto stete Bovo oltra la mer salé,

Qe li termen fu venu et apros(m)é,* (3670)

De li quatro ani e conpli e pasé.

5420

Molto i oit ben sa ovra devisé,

E le sepolcro servi et honoré.

Quant à ço fato, elo prist conçé

Por retorné se fu aparilé; (3675)*

Avec lui, ses çivaler prisé.

5425

Ven a Corchés, si le oit arasné:

"Corchés," fait il, "eo sui porpensé;

Conpli ai tota ma volunté.

Da moi avanti e vojo tornar aré." (3680)

Rubric 150

Coment Bovo dapoisqe il oit conpli / li terme q'el avoit in promesis a li rois

d'Ingeltere prist çonçé a Corcher et a soa / Gent, si s'en torna ad Antone.*

Laisse 151

Bovo d'Antone nen volse plus demorer;

5430

Quant li termen li vent a 'prosmer,

Qe a·l sepolcre devoit servir et honorer,

Adoncha prist conçeo da Corcher.

"Corcher," fait il, "el me conven aler, (3685)

En mia tere a veor ma muler,*

5435

E mes enfant qe sont baçaler.

Se le volés avec moi herer,

Nen vojo avoir valisant un diner,

Qe con eso moi non sia parçoner."* (3690)

Corcher, quan l'olde, si prist a larmojer;

5440

Ben alase l'on li trato d'un arçer

Avantiqe il posa un sol moto parler.

"Bovo," fait il, "doncha me volés laser.

Daqe vos plais de l'aler, (3695)

A Deo vos vojo et a santi comander.

5445

Mais d'una ren e vos vojo en projer:

Se ma de ça venise mesaçer,

De vos afaire me manda a conter.

Si vonter li oldirò como d'un me frer." (3700)

Responde Bovo, "Ben est da otrier;

5450

Et eo si le farò de greç e volunter."*

Quando l'un da l'altro se ven a desevrer,

Çascun prendent des oil a larmojer.

Bovo s'en vait a un dormun entrer, (3705)

Avec lui furent ses çivaler.

5455

Cola le vele et vait por l'alto mer;*

Tant naçarent por vento e por orer,

E por la tere par mont e par river,

Trosqu'a Antone nen volse seçorner. (3710)

Quando Druxiana le vi reparier,

5460

S'ela oit çoja, non è da demander;*

Anbi se vont a 'coler e baser.

Rubric 151

Coment Bovo fu d'oltra mer reparié et vent / A 'Ntone, et il le trova Drusiana sa mu(i)ler et / A(vec) le Sinibaldo et si li contò novelle.*

Laisse 152

Quando Druxiana oit Bovo veu,*

Unqua jamés si çojant nen fu, (3715)

Qe de sa promese el ert asolu.

5465

E Druxiana l'oit por rason metu,

Qe tere son qu'el oit veu.*

"Dama," fait il, "e ò ben veu

Celle lois o Deo fo metu; (3720)

La tera santa çercha tot por menu,*

5470

E gran bataile e fate e vençu,

Dont a li batesmo ne son plus de .X. mil venu,*

Li qual creent Macometo e Cau."

Dist Druxiana, "Beneto soja Jesu, (3725)

Qe sano e salvo vos estes revenu."

Rubric 152

Coment Bovo ancora parole a Drusiane / Si li conte de li serpant q'el i oncise.*

Laisse 153

5475

"Dama," dist Bovo, "entendés mun talant,*

Nen savés mie la pena et li tormant,

Qe e ò enduré contra un mal serpant.

Morto m'aust nen (fust) me auferant, (3730)

Qe li ferì si forte e duremant,

5480

Q'elo·l çetò roverso en le canp,

E pois l'ancisi a ma spea trençant.

Por cella bestie tant proi e Deo e sant,*

Qe ver de le i me farent guarant." (3735)

Dist Druxiana, "Non siés plus enfant."

5485

Da qui avanti vait li çanter enforçant;

Nu lasaren de Bovo da ste çorno en avant;

Asa durò e pene e tormant.

De li rois Pepin ben est qe je vos çant, (3740)

E de dama Berte, qe avoit li pe grant,

5490

Ço qe li vene en un petit tanp.*