Le Livre de l'eschiele Mahomet, 1264
Le Livre de l’eschiele Mahomet: die französische Fassung einer alfonsinischen Übersetzung, herausgegeben von Peter Wunderli, Bern, Francke, 1968 («Romanica Helvetica», 77).
Edizione digitalizzata a cura di Serena Modena
Marcatura digitale a cura di Luigi Tessarolo
Permalink:
XVII. C'est le devisement du .\Mxvii\M. chapitre.
[1] Li sesisme ciel qui je, Mahomet, et Gabriel trovames quant nos fumes la, si estoit en ceste maniere q'il ere tot d'esmeraude si tres vert qu'il sormontoit tottes choses de verdour. [2] Et avoit en espés aleure de .v. cent ans; et autretant estoit entre celui et l'autre settisme ciel. [3] Et atant Gabriel hurta ad la porte. [4] Et maintenant vint ad nos un ange qui estoit plus grant qe nul des autres qui nos eussom veu primierement .lxx. mil tant. [5] Et sa grandour estoit en maniere qe, si il le vousist faire, il assorbiroit le ciel et la terre, et ne le sentiroit ja. [6] Et cesti ange nos ovri la porte et nos dit:
[7] - Entréz en pes!
[8] Et nos i entrames. [9] Et quant fumes laenz, nos i veimes anges qui estoient .lxx. mil tant plus granz qe touz les autres qe nous aviom primierement veu. [10] Et ces anges avoient visages de chivaulx, et trestoz erent arméz; et chasqun d'elx avoit .lxx. mil chivalx, et chasqun de ces chivaulx .lxx. mil selles que erent totes d'esmeraudes, de rubins et de perles, entremeslees avec or et argent. [11] Et li chilval de Gabriel si estoit entre les autres. [12] Et ces anges erent ordinéz par eschiels, et lor armeures res plendissoient si forment qe nul ne le porroit conter. [13] Et je demandei ad Gabriel qui estoient ces anges. [14] Et il me respondi qu'il erent la masné Nostre Seignour. [15] Et tantost je les saluei, et il demanderent ad Gabriel qui jeo estoie. [16] Et Gabriel lor conta. [17] Et il adonques distrent:
[18] - Est Mahomet le grant messagier Nostre Seignour envoiéz ja?
[19] Et Gabriel lor dist:
[20] - Oil!
[21] Et maintenant il me saluerent et me distrent assés de bones noveles dom je fui mout liéz. [22] Et aprés ce, je demandei ad Gabriel por quoi ces anges tenoient si lor chivalx ensellés devant soi. [23] Et il me dist:
[24] - Sachez Mahomet qe ce est par le comandement Nostre Seignour, et que quant auqun de ses sers a mestier d'aide, je preign de ces anges tant com je en ai meistier et vois la. [25] Et ces chivalx ne defferrent pas; et le mangier et le boire qu'il font n'est autre chose for qe loer Nostre Seignour. [26] Et toz ces anges te eiderunt si tu n'avras mestier; et je ausinc descendrai avec elx por tei eidier quant tu me demanderas.
[27] Et quant il m'ot ce finé du dire, je me pris garde et vi entre les anges devantditz un hom qe seoit sur un siege de clarté; et estoit tot envolupéz de dras de clarté qui relusoient plus qu'il ne fait en esté le soleil; et avoit en son chief corone de clarté. [28] Et aprés ce si estoit tot environéz d'anges qui loent Nostre Seignour avec li ensemble. [29] Et je demandei ad Gabriel qui il estoit. [30] Et Gabriel me respondi qu'il ere Abraham, li ami Nostre Seignour. Et quant je oi ce, si alei ver lui et le saluei. [31] Et Gabriel lui dist com je ere Mahomet. [32] Et tantost il me salua et me dist issinc:
[33] - Sachez Mahomet qe Nostre Sires te aime mout et t'a eleuz entre les autres messagiers, et aime mout ton poeple por amour de toi. [34] Et si te di qe li paradis est tot plein de ces paroles: «Çohan halla bille dille ylle halla»; et ce vuolt dire: ‘Diex ahores, et ad lui rendom graces qu'il n'est autre Diex for lui, ne autre vertuz; ne autre pooir n'est for de Diex, li aultisme et li granz’.
[35] Et puis me pria Abraham qe je deisse a mon poeple qu'il deussent mout savent dire ces paroles. [36] Quar de tant com il plus les dirront, plus avrunt du delit de paradis; et qe je lor deisse ausinc qe li paradis est en itel maniere fait qe trestoz les murs sunt de fin or jusqua as creneaux; mes les creneaux sunt de fin argent; et les [c]hales dom sunt les murs ovrés si est de musc.
[37] - Et ce paradis est appareilliés ad toi et a toz celx qui ad toi crerunt et terrunt ta loi.
[38] Et quant il m'ot ce dist, nos en partimes entre moi et Gabriel, et alames avant tant qe nos venimes au settisme ciel.
